Thiruvananthapuram , 23 മെയ് (H.S.)

തിരുവനന്തപുരം: സംസ്ഥാനത്തെ വനിതകൾക്ക് വലിയ കൈത്താങ്ങേകുന്ന പ്രഖ്യാപനവുമായി ഗതാഗതവകുപ്പ് മന്ത്രി സി പി ജോൺ. വരാനിരിക്കുന്ന ജൂൺ 15 മുതൽ കേരള സംസ്ഥാന റോഡ് ട്രാൻസ്പോർട്ട് കോർപ്പറേഷൻ (കെഎസ്ആർടിസി) ബസുകളിൽ സ്ത്രീകൾക്ക് യാത്ര പൂർണ്ണമായും സൗജന്യമാക്കുമെന്ന് മന്ത്രി വാർത്താസമ്മേളനത്തിൽ അറിയിച്ചു. കെഎസ്ആർടിസിയുടെ സാമ്പത്തിക പ്രതിസന്ധികളെക്കുറിച്ചും ജീവനക്കാരുടെ ആനുകൂല്യങ്ങളെക്കുറിച്ചും ഉയർന്നുവരുന്ന ആശങ്കകൾക്ക് മറുപടി പറയവേയാണ് മന്ത്രി ഇക്കാര്യം വ്യക്തമാക്കിയത്.

വ്യക്തമായ പ്ലാനുമായി സർക്കാർ മുന്നോട്ട്

കെഎസ്ആർടിസിയിൽ സ്ത്രീകൾക്ക് സൗജന്യ യാത്ര അനുവദിക്കുന്നത് വഴി സ്ഥാപനത്തിന് വൻ സാമ്പത്തിക ബാധ്യത ഉണ്ടാകുമെന്ന തരത്തിലുള്ള റിപ്പോർട്ടുകൾ പുറത്തുവന്നിരുന്നു. എന്നാൽ ഇതിനെക്കുറിച്ച് ജീവനക്കാരോ പൊതുജനങ്ങളോ യാതൊരുവിധ ആശങ്കയും വെച്ചുപുലർത്തേണ്ടതില്ലെന്ന് ഗതാഗതമന്ത്രി ഉറപ്പുനൽകി.

ഈ പദ്ധതി നടപ്പിലാക്കുന്നതിനായി സർക്കാരിന് കൃത്യമായ പ്ലാനുകളുണ്ട്. വോട്ട് ബാങ്ക് ലക്ഷ്യം വെച്ചുള്ള വെറുമൊരു പ്രഖ്യാപനമല്ല ഇത്. സാധാരണക്കാരായ സ്ത്രീകളുടെ, പ്രത്യേകിച്ച് നിത്യേന തൊഴിലിടങ്ങളിലേക്ക് പോകുന്ന വനിതകളുടെ യാത്രാച്ചെലവ് കുറയ്ക്കുകയും അവർക്ക് സുരക്ഷിതമായ യാത്ര ഉറപ്പാക്കുകയുമാണ് ലക്ഷ്യം. - ഗതാഗതമന്ത്രി സി പി ജോൺ പറഞ്ഞു.

ഏതൊക്കെ തരത്തിലുള്ള സർവീസുകളിലാണ് (ഓർഡിനറി, സിറ്റി ഫാസ്റ്റ്, ഫാസ്റ്റ് പാസഞ്ചർ) സൗജന്യം നൽകേണ്ടത് എന്നതിനെക്കുറിച്ച് നിലവിൽ ഉന്നതതല ചർച്ചകൾ പുരോഗമിക്കുകയാണ്. ഇതിന്റെ അന്തിമ രൂപരേഖ ഉടൻ തന്നെ പുറത്തുവിടുമെന്നും അദ്ദേഹം കൂട്ടിച്ചേർത്തു.

ശമ്പളവും പെൻഷനും ഒന്നാം തീയതി തന്നെ

കെഎസ്ആർടിസി ജീവനക്കാരുടെ ദീർഘനാളത്തെ ആവശ്യമായ കൃത്യസമയത്തുള്ള ശമ്പള വിതരണ കാര്യത്തിലും മന്ത്രി വ്യക്തമായ ഉറപ്പ് നൽകി. വരും മാസങ്ങളിൽ ഒന്നാം തീയതി തന്നെ ജീവനക്കാർക്ക് ശമ്പളവും വിരമിച്ചവർക്ക് പെൻഷനും അക്കൗണ്ടുകളിൽ ലഭ്യമാക്കാനുള്ള നടപടികൾ സർക്കാർ സ്വീകരിക്കും. നിലവിലുള്ള എല്ലാ സാമ്പത്തിക പ്രശ്നങ്ങളും പരിഹരിക്കാൻ തക്കവണ്ണമുള്ള ഫണ്ട് മാനേജ്മെന്റ് പ്ലാൻ സർക്കാരിന്റെ പക്കലുണ്ടെന്ന് അദ്ദേഹം വ്യക്തമാക്കി.

സംസ്ഥാനത്തിന് ആവശ്യമായ സമ്പത്തുണ്ടെന്നും, അതിനെ കൃത്യമായ രീതിയിൽ വിനിയോഗിക്കുകയാണ് വേണ്ടതെന്നും മന്ത്രി ചൂണ്ടിക്കാണിച്ചു. പൊതുമേഖലാ സ്ഥാപനമായ കെഎസ്ആർടിസിയെ നഷ്ടമില്ലാത്ത ഒരു മികച്ച പൊതുഗതാഗത സംവിധാനമാക്കി മാറ്റുക എന്ന ലക്ഷ്യത്തോടെയാണ് പുതിയ ഗതാഗതവകുപ്പ് മുന്നോട്ട് പോകുന്നത്. ഇതിനായി കെഎസ്ആർടിസിക്ക് സർക്കാർ പ്രത്യേക അധിക സാമ്പത്തിക സഹായം ഉറപ്പാക്കുമെന്നും മന്ത്രി സി പി ജോൺ വ്യക്തമാക്കി.

---------------

Hindusthan Samachar / Roshith K