Koch, 09 ജൂണ് (H.S.)

കൊച്ചി: അന്തരിച്ച പ്രിയ നടൻ സലിം കുമാറിന്റെ സംസ്കാര ചടങ്ങുകൾക്കിടെ ചില ഓൺലൈൻ മാധ്യമപ്രവർത്തകർ കാണിച്ച പെരുമാറ്റത്തിനെതിരെ നടനും സംവിധായകനുമായ രമേഷ് പിഷാരടി കടുത്ത അമർഷം രേഖപ്പെടുത്തി. മരണവീട്ടിലെ സ്വകാര്യതയെപ്പോലും മാനിക്കാതെ, എല്ലാ അതിർവരമ്പുകളും ലംഘിക്കുന്ന രീതിയിലായിരുന്നു ഒരു വിഭാഗം മൊബൈൽ മാധ്യമപ്രവർത്തകരുടെ പെരുമാറ്റമെന്ന് പിഷാരടി മാധ്യമങ്ങളോട് തുറന്നടിച്ചു. സലിം കുമാറിന്റെ വിയോഗത്തിൽ വിങ്ങിപ്പൊട്ടി നിൽക്കുന്ന കുടുംബാംഗങ്ങളെയും ബന്ധുക്കളെയും വലിഞ്ഞു മുറുകിയ അന്തരീക്ഷത്തിൽ പോലും ഉപദ്രവിക്കുന്ന തരത്തിലാണ് ക്യാമറകളുമായി ഇവർ തിരക്ക് കൂട്ടിയതെന്ന് അദ്ദേഹം ആരോപിച്ചു.

ചടങ്ങുകൾക്കിടെ അനാവശ്യമായി തിരക്കുണ്ടാക്കിയ ഓൺലൈൻ ചാനലുകാരോട് സലിം കുമാറിന്റെ മകൻ ചന്തുവിന് ഒച്ചയിടേണ്ടി വന്ന സാഹചര്യത്തെക്കുറിച്ചും രമേഷ് പിഷാരടി വ്യക്തമാക്കി.

ചിത കത്തിയമർന്നതിന് ശേഷം മുറിയിലേക്ക് എത്തിയപ്പോൾ ചന്തു ഏറെ വിഷമത്തോടെയാണ് എന്നോട് സംസാരിച്ചത്. 'ചേട്ടാ, ഞാൻ അവിടെ അങ്ങനെ ഒച്ചയെടുത്തത് മോശമായിപ്പോയോ?' എന്ന് അവൻ എന്നോട് ചോദിച്ചു. എന്നാൽ, 'ഇല്ലെടാ, മറ്റൊരു വഴിയും ഇല്ലാത്തതുകൊണ്ടല്ലേ നീ അങ്ങനെ ചെയ്തത്' എന്നാണ് ഞാൻ അവന് നൽകിയ മറുപടി. അത്രമാത്രം അസഹനീയമായ സാഹചര്യമാണ് അവിടെ ചിലർ ഉണ്ടാക്കിവെച്ചത്. - പിഷാരടി പറഞ്ഞു.

മുഖ്യമന്ത്രി മുതൽ മകൻ വരെ അപേക്ഷിച്ചിട്ടും ഫലമുണ്ടായില്ല

ഒരു മനുഷ്യന്റെ മരണസമയത്തും അദ്ദേഹത്തിന്റെ കുടുംബം അനുഭവിക്കുന്ന ദുഃഖത്തിലും മിനിമം പാലിക്കേണ്ട മര്യാദകൾ പോലും ഇവിടെ കാറ്റിൽപ്പറത്തപ്പെട്ടു. മുഖ്യമന്ത്രി മുതൽ മരിച്ചുകിടക്കുന്ന ആളുടെ മകൻ വരെ ദയവായി മാറിനിൽക്കണമെന്നും തങ്ങളുടെ സ്വകാര്യതയെ മാനിക്കണമെന്നും അപേക്ഷിച്ചിട്ടും ചില ഓൺലൈൻ മാധ്യമങ്ങൾ അതൊന്നും വകവെക്കാൻ കൂട്ടാക്കിയില്ല. ഒരു മരണവീടാണെന്ന പരിഗണന പോലും നൽകാതെ, മികച്ച 'വിഷ്വലുകൾക്കും' വാർത്തകൾക്കും വേണ്ടി മാത്രമാണ് ഒരു പറ്റം ആളുകൾ അവിടെ അനാവശ്യ തിക്കും തിരക്കും ഉണ്ടാക്കിയതെന്നും പിഷാരടി കൂട്ടിച്ചേർത്തു.

മരണശേഷം വന്ന് ഉപദ്രവിക്കരുത്, ചടങ്ങുകൾ വേണ്ടെന്ന് സലീമേട്ടൻ പറഞ്ഞിരുന്നു

തന്റെ മരണാനന്തര ചടങ്ങുകളെക്കുറിച്ച് സലിം കുമാർ മുൻപ് പങ്കുവെച്ചിരുന്ന ആഗ്രഹങ്ങളും പിഷാരടി ഓർത്തെടുത്തു. മരണശേഷം ആളുകൾ വന്ന് കൂട്ടംകൂടി നിന്ന് തന്നെയും കുടുംബത്തെയും ഉപദ്രവിക്കരുതെന്ന നിർബന്ധം സലീമേട്ടന് ഉണ്ടായിരുന്നു. എനിക്ക് ചടങ്ങുകൾ ഒന്നും വേണ്ട, മരണശേഷമെങ്കിലും വന്ന് നിങ്ങൾ എന്നെ ഉപദ്രവിക്കരുത് എന്ന് അദ്ദേഹം മുൻപ് പലപ്പോഴും തമാശയായും അല്ലാതെയും പറഞ്ഞിരുന്ന കാര്യമാണ്. എന്നാൽ അദ്ദേഹം ഭയപ്പെട്ടതുപോലെ തന്നെയാണ് മരണദിവസം സംഭവിച്ചതെന്നും, ഇത്തരം പ്രവണതകൾക്കെതിരെ വലിയ രീതിയിലുള്ള ജനകീയ പ്രതികരണങ്ങൾ ഉണ്ടാകേണ്ട സമയം അതിക്രമിച്ചിരിക്കുന്നുവെന്നും രമേഷ് പിഷാരടി വ്യക്തമാക്കി.

മതപരമായ ചടങ്ങുകൾ പൂർണ്ണമായും ഒഴിവാക്കി, ഔദ്യോഗിക ബഹുമതികളോടെ വടക്കൻ പറവൂരിലെ വസതിയായ 'ലാഫിങ് വില്ല'യുടെ വളപ്പിലായിരുന്നു സലിം കുമാറിന്റെ സംസ്കാരം നടന്നത്. പ്രിയ താരത്തിന് അന്ത്യവിടചൊല്ലാൻ രാഷ്ട്രീയ-സാംസ്കാരിക-സിനിമ രംഗത്തെ പ്രമുഖരടക്കം ആയിരങ്ങളാണ് എത്തിച്ചേർന്നത്. വിയോഗത്തിന്റെ വേദനയ്ക്കിടയിലും മാധ്യമങ്ങളുടെ അതിരുകടന്ന കടന്നുകയറ്റം വലിയ രീതിയിലുള്ള പ്രതിഷേധങ്ങൾക്ക് വഴിതുറന്നിരിക്കുകയാണ്.

---------------

Hindusthan Samachar / Roshith K