Enter your Email Address to subscribe to our newsletters
Kochi, 29 നവംബര്‍ (H.S.)
നടിയെ ആക്രമിച്ച കേസില്‍ അന്തിമവിധി പ്രഖ്യാപനം അടുത്തിരിക്കെ, കേസിലെ മൂന്നാം പ്രതി മണികണ്ഠന്‍ ജീവനൊടുക്കാന്‍ ശ്രമിച്ചു. കൈ ഞരമ്പ് മുറിച്ച നിലയില്‍ കണ്ടെത്തിയ മണികണ്ഠനെ ആശുപത്രിയില്‍ എത്തിച്ച് ചികിത്സ നല്‍കി. ഇന്ന് പുലര്‍ച്ചെ മദ്യലഹരിയിലാണ് മണികണ്ഠന്‍ ആത്മഹത്യാശ്രമം നടത്തിയത്.
മദ്യപിച്ച് പ്രശ്നമുണ്ടാക്കിയതിനെ തുടര്‍ന്ന് പാലാരിവട്ടം പോലീസ് ഇയാളെ കസ്റ്റഡിയിലെടുത്തിരുന്നു. അറസ്റ്റ് രേഖപ്പെടുത്തിയ ശേഷം വിട്ടയച്ചതിന് പിന്നാലെയാണ് അടുത്തുള്ള കടയില്‍ നിന്ന് ബ്ലേഡ് വാങ്ങി ഞരമ്പ് മുറിച്ചത്.
ഇയാള്‍ക്ക് ഉടന്‍ തന്നെ ആശുപത്രിയില്‍ ചികിത്സ ലഭ്യമാക്കി. പ്രാഥമിക ചികിത്സയ്ക്ക് ശേഷം മണികണ്ഠനെ വീട്ടിലേക്ക് വിട്ടു. ഇയാള്‍ നിരന്തരം മദ്യപിച്ച് പ്രശ്‌നങ്ങളുണ്ടാക്കുന്ന സ്വഭാവക്കാരനാണെന്ന് പോലീസ് അറിയിച്ചു. നടിയെ ആക്രമിച്ച കേസില്‍ ഡിസംബര്‍ 8-ന് വിധി പറയാനിരിക്കെയാണ് മൂന്നാം പ്രതിയുടെ ഭാഗത്തുനിന്ന് ഇത്തരമൊരു ശ്രമം ഉണ്ടായത്.
ക്വട്ടേഷന്‍ പ്രകാരം നടിയെ തട്ടിക്കൊണ്ടുപോയി അപകീര്‍ത്തികരമായ ദൃശ്യങ്ങള്‍ പകര്‍ത്തി പീഡിപ്പിച്ചുവെന്നാണ് കേസ്. ഒന്നാം പ്രതി പള്‍സര്‍ സുനിയും എട്ടാം പ്രതി ദിലീപും ഉള്‍പ്പെടെ ആകെ ഒമ്പത് പ്രതികളാണ് കേസില്‍ വിചാരണ നേരിട്ടത്. ഡിസംബര്‍ എട്ടിനാണ് കേസില്‍ അന്തിമവിധി. എല്ലാ പ്രതികളും അന്ന് ഹാജരാകണം. എറണാകുളം പ്രിന്‍സിപ്പല്‍ സെഷന്‍സ് കോടതിയിലാണ് കേസ്.
---------------
Hindusthan Samachar / Sreejith S
