Newdelhi , 24 മെയ് (H.S.)

ന്യൂഡൽഹി: ഡെമോക്രാറ്റിക് റിപ്പബ്ലിക് ഓഫ് കോംഗോ (DRC), ഉഗാണ്ട എന്നീ രാജ്യങ്ങളിൽ എബോള രോഗബാധ പടർന്നുപിടിക്കുന്ന സാഹചര്യത്തിൽ അന്താരാഷ്ട്ര തലത്തിൽ 'ആഗോള ആരോഗ്യ അടിയന്തരാവസ്ഥ' (PHEIC) പ്രഖ്യാപിച്ച് ലോകാരോഗ്യ സംഘടന (WHO). അന്താരാഷ്ട്ര ആരോഗ്യ ചട്ടങ്ങൾ (IHR 2005) മുൻനിർത്തി മേയ് 17-നാണ് ലോകാരോഗ്യ സംഘടന ഈ സുപ്രധാന തീരുമാനം കൈക്കൊണ്ടത്. നിലവിലെ സാഹചര്യം അതീവ ഗുരുതരമാണെന്ന് വിലയിരുത്തിയാണ് ഈ നടപടി.

ഇതിന് പിന്നാലെ, ആഫ്രിക്കൻ രാജ്യങ്ങളിലെ സ്ഥിതിഗതികൾ കണക്കിലെടുത്ത് 'ആഫ്രിക്ക സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ' (Africa CDC) ഈ എബോള വ്യാപനത്തെ ഭൂഖണ്ഡാന്തര സുരക്ഷാ ആരോഗ്യ അടിയന്തരാവസ്ഥയായി (PHECS) ഔദ്യോഗികമായി പ്രഖ്യാപിച്ചിട്ടുണ്ട്. നിലവിൽ ആഫ്രിക്കയിൽ പടരുന്നത് എബോള വൈറസിന്റെ 'ബുന്ദിബുഗ്യോ' (Bundibugyo) എന്ന വകഭേദമാണെന്ന് കേന്ദ്ര ആരോഗ്യ-കുടുംബക്ഷേമ മന്ത്രാലയം പുറത്തിറക്കിയ വാർത്താക്കുറിപ്പിൽ വ്യക്തമാക്കുന്നു.

യാത്രാ നിയന്ത്രണങ്ങളും കർശന നിരീക്ഷണവും

മേയ് 22-ന് ചേർന്ന ലോകാരോഗ്യ സംഘടനയുടെ അടിയന്തര സമിതി യോഗം രോഗവ്യാപനം തടയുന്നതിനായി വിവിധ താൽക്കാലിക നിർദേശങ്ങൾ പുറപ്പെടുവിച്ചു. എബോള സ്ഥിരീകരിച്ച പ്രദേശങ്ങളിൽ നിന്നുള്ള യാത്രക്കാരിൽ കൃത്യമായ കാരണങ്ങളില്ലാതെ പനി കാണപ്പെടുന്നുണ്ടെങ്കിൽ, പ്രവേശന കവാടങ്ങളിൽ (വിമാനത്താവളങ്ങൾ, തുറമുഖങ്ങൾ) വെച്ച് തന്നെ അത് കണ്ടെത്താനും ആവശ്യമായ പരിശോധനകൾ നടത്താനും റിപ്പോർട്ട് ചെയ്യാനും നിർദേശമുണ്ട്. കൂടാതെ, രോഗബാധ റിപ്പോർട്ട് ചെയ്ത മേഖലകളിലേക്കുള്ള അനാവശ്യ യാത്രകൾ പരമാവധി ഒഴിവാക്കാനും ലോകാരോഗ്യ സംഘടന ആവശ്യപ്പെട്ടിട്ടുണ്ട്.

കോംഗോ, ഉഗാണ്ട എന്നീ രാജ്യങ്ങളുമായി അതിർത്തി പങ്കിടുന്ന ദക്ഷിണ സുഡാൻ ഉൾപ്പെടെയുള്ള അയൽരാജ്യങ്ങൾ നിലവിൽ രോഗവ്യാപനത്തിന്റെ ഉയർന്ന ഭീഷണിയിലാണ്. വൈറസ് മൂലമുണ്ടാകുന്ന 'ഹെമറാജിക് ഫീവർ' (ശരീരത്തിനകത്തും പുറത്തും രക്തസ്രാവമുണ്ടാക്കുന്ന പനി) ആണ് എബോള. മരണനിരക്ക് വളരെ കൂടുതലുള്ള ഈ രോഗത്തിന്, നിലവിൽ ബുന്ദിബുഗ്യോ വകഭേദത്തിനെതിരെ അംഗീകൃത വാക്സിനുകളോ കൃത്യമായ ചികിത്സകളോ ലഭ്യമല്ല എന്നത് ഇതിന്റെ തീവ്രത വർദ്ധിപ്പിക്കുന്നു.

ഇന്ത്യൻ പൗരന്മാർക്ക് കേന്ദ്ര സർക്കാരിന്റെ നിർദേശം

ഇന്ത്യയിൽ ഇതുവരെ ബുന്ദിബുഗ്യോ വകഭേദം മൂലമുള്ള എബോള കേസുകളൊന്നും തന്നെ റിപ്പോർട്ട് ചെയ്യപ്പെട്ടിട്ടില്ല. എങ്കിലും, ആഫ്രിക്കൻ രാജ്യങ്ങളിലെ നിലവിലെ ഗുരുതര സാഹചര്യം കണക്കിലെടുത്ത് മുൻകരുതൽ നടപടിയെന്നോണം ഭാരത സർക്കാർ തങ്ങളുടെ പൗരന്മാർക്കായി കർശനമായ ജാഗ്രതാ നിർദേശം പുറപ്പെടുവിച്ചിട്ടുണ്ട്.

ഡെമോക്രാറ്റിക് റിപ്പബ്ലിക് ഓഫ് കോംഗോ, ഉഗാണ്ട, ദക്ഷിണ സുഡാൻ എന്നീ രാജ്യങ്ങളിലേക്കുള്ള അത്യാവശ്യമല്ലാത്ത എല്ലാ യാത്രകളും അടുത്ത അറിയിപ്പ് ഉണ്ടാകുന്നത് വരെ ഒഴിവാക്കണമെന്ന് കേന്ദ്ര സർക്കാർ ഇന്ത്യൻ പൗരന്മാരോട് ആവശ്യപ്പെട്ടു. നിലവിൽ ഈ രാജ്യങ്ങളിൽ താമസിക്കുന്നവരോ അല്ലെങ്കിൽ അവിടെ യാത്ര ചെയ്യുന്നവരോ ആയ ഇന്ത്യൻ പൗരന്മാർ പ്രാദേശിക ആരോഗ്യ അധികൃതർ നൽകുന്ന നിർദേശങ്ങൾ കർശനമായി പാലിക്കണമെന്നും അതീവ ജാഗ്രത പുലർത്തണമെന്നും കേന്ദ്ര ആരോഗ്യ മന്ത്രാലയത്തിന്റെ വാർത്താക്കുറിപ്പിൽ വ്യക്തമാക്കുന്നു.

---------------

Hindusthan Samachar / Roshith K