Lucknow , 08 ഓഗസ്റ്റ് (H.S.)

2027-ലെ ഉത്തർപ്രദേശ് നിയമസഭാ തിരഞ്ഞെടുപ്പ് ലക്ഷ്യമിട്ട് സമാജ്വാദി പാർട്ടി (എസ്പി) അധ്യക്ഷൻ അഖിലേഷ് യാദവ് നടത്തുന്ന രാഷ്ട്രീയ നീക്കങ്ങൾ സംസ്ഥാന രാഷ്ട്രീയത്തിൽ വലിയ സംവാദങ്ങൾക്ക് വഴിതുറന്നിരിക്കുന്നു. പാർട്ടിയുടെ മുഖ്യ രാഷ്ട്രീയ മുദ്രാവാക്യമായ 'പിഡിഎ'യിലെ (PDA) 'പി' എന്നാൽ 'പണ്ഡിറ്റ്' (ബ്രാഹ്മണർ) കൂടിയാണെന്ന അഖിലേഷിന്റെ പുതിയ പ്രസ്താവനയാണ് ഭരണകക്ഷിയായ ബിജെപിയെയും പ്രധാന പ്രതിപക്ഷ പാർട്ടിയായ ബിഎസ്പിയെയും ഒരുപോലെ ചൊടിപ്പിച്ചിരിക്കുന്നത്. തിരഞ്ഞെടുപ്പ് അടുക്കുമ്പോൾ വോട്ട് ബാങ്ക് ലക്ഷ്യമിട്ട് അഖിലേഷ് ഓന്തിനെപ്പോലെ നിറംമാറുകയാണെന്ന് ബിജെപിയും ബിഎസ്പിയും കടുത്ത ഭാഷയിൽ വിമർശിച്ചു.

അഖിലേഷ് യാദവിന്റെ പ്രസ്താവന

ലഖ്നൗവിലെ സമാജ്വാദി പാർട്ടി സംസ്ഥാന ആസ്ഥാനത്ത് നടന്ന ബ്രാഹ്മണ സമ്മേളനത്തിൽ സംസാരിക്കവെയായിരുന്നു അഖിലേഷിന്റെ വിവാദ പരാമർശം. അന്തരിച്ച മുതിർന്ന സോഷ്യലിസ്റ്റ് നേതാവ് ജനേശ്വർ മിശ്രയുടെ ജന്മദിനാഘോഷ ചടങ്ങിലായിരുന്നു ഇത്.

ആളുകൾ പിഡിഎയെക്കുറിച്ച് നിരന്തരം സംസാരിക്കുകയും അതിന് പുതിയ നിർവചനങ്ങൾ നൽകാൻ ശ്രമിക്കുകയും ചെയ്യുന്നു. പിഡിഎയോട് തിരഞ്ഞെടുപ്പിൽ പരാജയപ്പെട്ടതുമുതൽ ബിജെപി അതിന് പുതിയ വ്യാഖ്യാനങ്ങൾ കണ്ടെത്താനുള്ള ശ്രമത്തിലാണ്. എന്നാൽ പിഡിഎയിലെ (പിച്ച്ഡേ, ദളിത്, അല്പസംഖ്യാക്) 'പി' എന്നാൽ 'പണ്ഡിറ്റ്' കൂടിയാണെന്ന കാര്യം അവർ മറന്നുപോയി. ഭരണകൂടം ജനങ്ങൾക്ക് എത്രത്തോളം വേദനയും പീഡനവും നൽകുന്നുവോ അത്രത്തോളം പിഡിഎ കൂടുതൽ ശക്തമാകും, എന്ന് അഖിലേഷ് യാദവ് പറഞ്ഞു.

ഉത്തർപ്രദേശിലെ ബിജെപി സർക്കാർ പ്രതിപക്ഷ പ്രവർത്തകർക്ക് പുറമെ ബ്രാഹ്മണരെയും ശങ്കരാചാര്യർ ഉൾപ്പെടെയുള്ള പ്രമുഖ മതനേതാക്കളെയും വേട്ടയാടുകയാണെന്നും അദ്ദേഹം ആരോപിച്ചു.

ബിജെപിയുടെ രൂക്ഷവിമർശനം

അഖിലേഷിന്റെ ഈ നീക്കത്തിനെതിരെ ശക്തമായ പ്രതികരണവുമായി ഉത്തർപ്രദേശ് ഉപമുഖ്യമന്ത്രിയും ബിജെപിയുടെ പ്രമുഖ ബ്രാഹ്മണ മുഖവുമായ ബ്രിജേഷ് പഥക് രംഗത്തെത്തി. അഖിലേഷ് യാദവ് ബ്രാഹ്മണ സമൂഹത്തിന്റെ ക്ഷേമകാംക്ഷിയായി അഭിനയിക്കുകയാണെന്ന് പഥക് കുറ്റപ്പെടുത്തി.

വാർത്താ സമ്മേളനത്തിനിടെ ഒരു മാധ്യമപ്രവർത്തകനോട് ജാതി ചോദിക്കുകയും 'മിശ്രജി, കുറച്ച് നാണമില്ലേ' എന്ന് അഖിലേഷ് ചോദിക്കുകയും ചെയ്ത പഴയ വീഡിയോ ചൂണ്ടിക്കാട്ടിയായിരുന്നു പഥകിന്റെ മറുപടി: ഇന്ന് നിങ്ങൾ ബ്രാഹ്മണ സമൂഹത്തിന്റെ സുഹൃത്താണെന്ന് ഭാവിക്കുന്നു. എന്നാൽ അന്ന് ഒരു മാധ്യമപ്രവർത്തകനോട് നിങ്ങൾ പറഞ്ഞ വാക്കുകൾ ഇന്നും ബ്രാഹ്മണ സമൂഹത്തിന്റെ മനസ്സിൽ കുന്തമുന പോലെ തറഞ്ഞുനിൽക്കുകയാണ്. ഒരു കുടുംബത്തിന് മാത്രം അധികാരം ഉറപ്പാക്കുന്നതല്ല, മറിച്ച് സമൂഹത്തിലെ എല്ലാ വിഭാഗങ്ങൾക്കും തുല്യ അവസരവും നീതിയും ബഹുമാനവും നൽകുന്നതാണ് യഥാർത്ഥ വികസനം, എന്ന് സോഷ്യൽ മീഡിയ പ്ലാറ്റ്ഫോമായ എക്സിൽ (X) കുറിച്ച ദീർഘമായ കുറിപ്പിൽ ഉപമുഖ്യമന്ത്രി വ്യക്തമാക്കി.

ബിഎസ്പിയുടെ പ്രതികരണം

അഖിലേഷിന്റെ 'പിഡിഎ' ഫോർമുലയെ തള്ളിക്കളഞ്ഞുകൊണ്ട് ബിഎസ്പി ദേശീയ അധ്യക്ഷയും മുൻ മുഖ്യമന്ത്രിയുമായ മായാവതിയും വിമർശനവുമായി രംഗത്തെത്തി. സമാജ്വാദി പാർട്ടിയുടേത് വഞ്ചനാപരമായ രാഷ്ട്രീയമാണെന്നും അവരുടെ വാക്കുകളിൽ ജനങ്ങൾ വീണുപോകരുതെന്നും അവർ മുന്നറിയിപ്പ് നൽകി.

സ്വന്തം ഇടുങ്ങിയ ജാതി രാഷ്ട്രീയത്തിനും തിരഞ്ഞെടുപ്പ് സ്വാർത്ഥ താൽപ്പര്യങ്ങൾക്കുമായി സമാജ്വാദി പാർട്ടി ഓന്തിനെപ്പോലെ തുറന്ന രീതിയിൽ നിറം മാറിക്കൊണ്ടിരിക്കുകയാണ്. എന്നാൽ ബിഎസ്പി അധികാരത്തിലിരുന്ന നാല് ഘട്ടങ്ങളിലും എല്ലാ വിഭാഗങ്ങളുടെയും തുല്യ ക്ഷേമത്തിനും ക്രമസമാധാനത്തിനുമാണ് മുൻഗണന നൽകിയത്, മായാവതി പറഞ്ഞു. ഇത്തരം സ്വാർത്ഥ ജാതീയ രാഷ്ട്രീയത്തിന് ഒരിക്കലും സമൂഹത്തിന്റെ സമഗ്രമായ വികസനം സാധ്യമാക്കാൻ കഴിയില്ലെന്നും അവർ കൂട്ടിച്ചേർത്തു.

---------------

Hindusthan Samachar / Roshith K