Enter your Email Address to subscribe to our newsletters

Newdelhi , 19 നവംബര് (H.S.)
ന്യൂഡൽഹി: ബംഗാൾ ഉൾക്കടലിൽ രൂപംകൊണ്ട 'അക്വാൻ' (Cyclone Akvan) ചുഴലിക്കാറ്റ് ശക്തിപ്രാപിച്ച് ഇന്ത്യൻ കിഴക്കൻ തീരത്തേക്ക് അടുക്കുന്നതിനാൽ ആന്ധ്രാപ്രദേശ്, പുതുച്ചേരിയുടെ ഭാഗമായ യാനം, ഒഡീഷ എന്നിവിടങ്ങളിൽ കേന്ദ്ര കാലാവസ്ഥാ വകുപ്പ് (IMD) കനത്ത ജാഗ്രതാ നിർദ്ദേശം പുറപ്പെടുവിച്ചു. നവംബർ 20 ഉച്ചയോടെ വടക്കൻ ആന്ധ്രാപ്രദേശ്, യാനം, തെക്കൻ ഒഡീഷ തീരങ്ങളിൽ നരസാപൂരിനും പുരിക്കും ഇടയിലായി ചുഴലിക്കാറ്റ് കരതൊടുമെന്നാണ് നിലവിലെ പ്രവചനം.
ചുഴലിക്കാറ്റ് കരതൊടുന്ന സമയത്ത് മണിക്കൂറിൽ 90 മുതൽ 100 കിലോമീറ്റർ വരെ വേഗതയിൽ ശക്തമായ കാറ്റ് വീശാൻ സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ചില അവസരങ്ങളിൽ കാറ്റിന്റെ വേഗത മണിക്കൂറിൽ 110 കിലോമീറ്റർ വരെയായി ഉയർന്നേക്കാം. ബംഗാൾ ഉൾക്കടലിലൂടെ വടക്ക്-വടക്കുപടിഞ്ഞാറൻ ദിശയിലാണ് നിലവിൽ ചുഴലിക്കാറ്റ് നീങ്ങുന്നത്. അതേസമയം, ചുഴലിക്കാറ്റിന്റെ കൃത്യമായ സഞ്ചാരപഥം, തീവ്രത, കരതൊടുന്ന സ്ഥലം, സമയം എന്നിവയിൽ നേരിയ മാറ്റങ്ങൾ ഉണ്ടായേക്കാമെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നുണ്ട്.
കാറ്റിന്റെ വേഗതയും തീവ്രതയും കുറയാൻ സാധ്യത
നവംബർ 18 വൈകുന്നേരം മുതൽ നവംബർ 19 രാവിലെ വരെയുള്ള സമയത്ത് കാറ്റിന്റെ വേഗത മണിക്കൂറിൽ 100-110 കിലോമീറ്റർ വരെയും, പരമാവധി 120 കിലോമീറ്റർ വരെയും എത്താൻ സാധ്യതയുണ്ട്. എന്നാൽ, നവംബർ 19 രാത്രിയോടെ കാറ്റിന്റെ വേഗത 90-100 കിലോമീറ്ററായി (പരമാവധി 110 കി.മീ) കുറയുകയും നവംബർ 20-ഓടെ ചുഴലിക്കാറ്റ് ക്രമേണ ദുർബലമാകുകയും ചെയ്യുമെന്നാണ് വിലയിരുത്തൽ. തീരത്തോട് അടുക്കുമ്പോൾ തണുത്തതും വരണ്ടതുമായ വായുവുമായി കൂടിച്ചേരുന്നതും അന്തരീക്ഷത്തിലെ കാറ്റിന്റെ ഗതിയിലുണ്ടാകുന്ന മാറ്റങ്ങളും (wind shear) കരതൊടുന്നതിന് മുൻപ് തന്നെ ചുഴലിക്കാറ്റിന്റെ ശക്തി കുറയാൻ കാരണമായേക്കും. നവംബർ 20 രാത്രിയോടെ കാറ്റിന്റെ വേഗത മണിക്കൂറിൽ 40-50 കിലോമീറ്ററായി താഴുമെന്നും പ്രവചിക്കപ്പെടുന്നു.
മത്സ്യത്തൊഴിലാളികൾക്കും തീരദേശവാസികൾക്കും നിർദ്ദേശം
ചുഴലിക്കാറ്റിന്റെ പശ്ചാത്തലത്തിൽ കടൽ അതിപ്രക്ഷുബ്ധമാകാൻ സാധ്യതയുള്ളതിനാൽ മത്സ്യത്തൊഴിലാളികൾ യാതൊരു കാരണവശാലും കടലിൽ പോകരുതെന്ന് അധികൃതർ കർശന നിർദ്ദേശം നൽകിയിട്ടുണ്ട്. ആന്ധ്രാപ്രദേശ്, യാനം, ഒഡീഷ എന്നിവിടങ്ങളിലെ തീരദേശ ജില്ലകളിൽ താമസിക്കുന്നവർ അതീവ ജാഗ്രത പാലിക്കണമെന്നും കാലാവസ്ഥാ വകുപ്പും പ്രാദേശിക ഭരണകൂടവും നൽകുന്ന ഔദ്യോഗിക നിർദ്ദേശങ്ങൾ കൃത്യമായി പിന്തുടരണമെന്നും മുന്നറിയിപ്പിൽ പറയുന്നു. സ്ഥിതിഗതികൾ കാലാവസ്ഥാ നിരീക്ഷണ കേന്ദ്രം സൂക്ഷ്മമായി നിരീക്ഷിച്ചുവരികയാണ്.
---------------
Hindusthan Samachar / Roshith K