Enter your Email Address to subscribe to our newsletters
Idukki, 16 ഒക്റ്റോബര്‍ (H.S.)
ഗവൺമെൻറ് നഴ്സിങ് കോളേജിലെ വിദ്യാർഥികൾ അനിശ്ചിതകാല സമരത്തിൽ. ഹോസ്റ്റൽ ഉൾപ്പെടെയുള്ള അടിസ്ഥാന സൗകര്യങ്ങൾ ഒരുക്കണമെന്ന് ആവശ്യപ്പെട്ടാണ് സമരം. വിദ്യാർത്ഥികൾക്ക് പിന്തുണയുമായി വിവിധ നേഴ്സിങ് സംഘടനകളും രക്ഷിതാക്കളും ഒപ്പമുണ്ട്.
2023 ൽ ആരംഭിച്ച ഇടുക്കി നഴ്സിങ് കോളേജിൽ 120 വിദ്യാർത്ഥികൾ ഉണ്ട്. 96 പേരും പെൺകുട്ടികൾ. ഇടുക്കി മെഡിക്കൽ കോളേജിന്റെ താൽക്കാലിക കെട്ടിടത്തിൽ ഒരുക്കിയ ക്ലാസ് മുറികളിൽ, അടിസ്ഥാന സൗകര്യങ്ങൾ പോലുമില്ലാതെയാണ് വിദ്യാർഥികളുടെ നഴ്സിങ് പഠനമെന്നാണ് പരാതി.
മെഡിക്കൽ കോളേജിന് സമീപം സ്വകാര്യ സ്കൂൾ കെട്ടിടത്തിലാണ് പെൺകുട്ടികൾക്കുള്ള ഹോസ്റ്റൽ സൗകര്യം. ഒരു മുറിയിൽ 16 പെൺകുട്ടികളാണ് താമസിക്കുന്നത് . ആൺകുട്ടികൾക്ക് ഹോസ്റ്റൽ സൗകര്യം പേരിനു പോലുമില്ല. സർക്കാരും മന്ത്രി റോഷി ആഗസ്റ്റിനും പലതവണ ഉറപ്പ് നൽകിയിട്ടും നടപടി യാതൊന്നും ഉണ്ടായിട്ടില്ലെന്ന് വിദ്യാർഥികൾ പറയുന്നു.
പുതിയ നഴ്സിങ് ബാച്ചിലേക്ക് 60 വിദ്യാർഥികൾ കൂടി എത്തുന്നതോടെ പ്രതിസന്ധി അതി രൂക്ഷമാകുമെന്നും അടിയന്തര പോംവഴി ഉണ്ടാകണമെന്നും രക്ഷിതാക്കളും പറയുന്നു. പ്രശ്നപരിഹാരം ഉണ്ടാകുന്നതുവരെ ഇടുക്കി മെഡിക്കൽ കോളേജ് അത്യാഹിത വിഭാഗത്തിന് മുന്നിൽ സമരം തുടരാനാണ് വിദ്യാർഥികളുടെ തീരുമാനം. സർക്കാർ എൻട്രൻസ് എഴുതി മെറിറ്റിൽ പഠനത്തിനെത്തിയ വിദ്യാർഥികൾക്കാണ് ഈ ദുരവസ്ഥ.
---------------
Hindusthan Samachar / CHANDHU CHANDRASEKHAR
