Kerala, 17 ഒക്റ്റോബര്‍ (H.S.)

ഉപരാഷ്ട്രപതി സി.പി. രാധാകൃഷ്ണന്റെ വീടിനു നേരെ ബോംബ് ഭീഷണി. ചെന്നൈ മെലാപ്പുരിലെ വസതിയില്‍ ബോംബ് വച്ചിട്ടുണ്ടെന്നായിരുന്നു അജ്ഞാത ഇ-മെയില്‍ സന്ദേശം. ഇതോടെ ചെന്നൈയില്‍ സുരക്ഷാ ഭീതി പരത്തി. ഇന്നലെ രാത്രിയോടെ പൊലീസ് സംഘം സ്ഥലത്തെത്തി പ്രദേശം വളഞ്ഞു. സമഗ്രമായ പരിശോധന നടത്തിയെങ്കിലും സ്‌ഫോടക വസ്തുക്കളൊന്നും കണ്ടെത്തിയില്ല. ഭീഷണി വ്യാജമാണെന്ന് അന്വേഷണ ഉദ്യോഗസ്ഥര്‍ പിന്നീട് സ്ഥിരീകരിച്ചു.

ഇന്നലെ വൈകിട്ട് സിറ്റി പൊലീസ് സ്റ്റേഷനിലാണ് ഇമെയില്‍ സന്ദേശം എത്തിയത്. മൈലാപ്പുരിലെ വീട് കുറച്ചുകാലമായി അടച്ചിട്ടിരിക്കുകയാണ്. സി.പി. രാധാകൃഷ്ണന്റെ പോയസ് ഗാര്‍ഡനിലെ വസതിയിലും പൊലീസ് സംഘം പരിശോധന നടത്തി. ചെന്നൈയിലെ വിഐപികള്‍, സ്‌കൂളുകള്‍, മാധ്യമസ്ഥാപനങ്ങള്‍, ഐടി കമ്പനികള്‍, മറ്റു സ്ഥാപനങ്ങള്‍ എന്നിവ ലക്ഷ്യമിട്ട് ബോംബ് ഭീഷണി വര്‍ധിക്കുന്നതിനിടെയാണ് ഉപരാഷ്ട്രപതിയുടെ വസതിയിലേക്കും ഭീഷണി സന്ദേശം എത്തിയത്.

അടുത്തിടെ, നടനും ടിവികെ നേതാവുമായ വിജയ്ക്ക് ഇത്തരത്തില്‍ രണ്ട് ഇമെയില്‍ ഭീഷണികള്‍ ലഭിച്ചിരുന്നു. ഇതോടെ അദ്ദേഹത്തിന്റെ സുരക്ഷ വര്‍ധിപ്പിച്ചിട്ടുണ്ട്. ഒരു കേസില്‍, വ്യാജ മെയില്‍ അയച്ചതിന് ഹോട്ടല്‍ ജീവനക്കാരനെ പൊലീസ് അറസ്റ്റ് ചെയ്തിരുന്നു.

---------------

Hindusthan Samachar / Sreejith S