Enter your Email Address to subscribe to our newsletters
Alappuzha, 18 ഒക്റ്റോബര്‍ (H.S.)
അരൂർ മണ്ഡലത്തില്‍ പത്തുവർഷംകൊണ്ട് പത്ത് പാലങ്ങള്‍ നിർമ്മിക്കാൻ സാധിച്ചു. അതില്‍ 100 കോടി മുടക്കി നിർമ്മിക്കുന്ന സംസ്ഥാനത്തെ ഏറ്റവും വലിയ പാലമായ പെരുമ്ബളവും ഉള്‍പ്പെടുന്നുവെന്നത് അഭിമാനകരമായ കാര്യമാണെന്ന് ദലീമ ജോജോ എംഎല്‍എ പറഞ്ഞു.
അരൂക്കുറ്റി ഗ്രാമപഞ്ചായത്തില്‍ സംഘടിപ്പിച്ച വികസന സദസ്സ് വടുതല അബ്റാര്‍ ഓഡിറ്റോറിയത്തില്‍ ഉദ്ഘാടനം ചെയ്തു സംസാരിക്കുകയായിരുന്നു എംഎല്‍എ.ഹൈടെക് ക്ലാസ് മുറികളോട് കൂടി നിരവധി സ്കൂള്‍ കെട്ടിടങ്ങളാണ് മണ്ഡലത്തില്‍ യാഥാർത്ഥ്യമായത്. സ്മാർട്ട് അങ്കണവാടികള്‍, മികച്ച നിലവാരത്തിലുള്ള റോഡുകള്‍, മണ്ഡലത്തിലെ വിവിധ ഭാഗങ്ങളില്‍ സ്ഥാപിച്ച വഴിവിളക്കുകള്‍ തുടങ്ങി കോടികളുടെ വികസന പ്രവർത്തനങ്ങളാണ് ചുരുങ്ങിയ കാലയളവില്‍ അരൂർ മണ്ഡലത്തിന് ലഭിച്ചതെന്നും എംഎല്‍എ പറഞ്ഞു.
പഞ്ചായത്തിലെ എല്ലാ വീടുകളിലും സ്ഥാപനങ്ങളിലും കുടിവെള്ളമെത്തിച്ചുകൊണ്ട് കുടിവെള്ള വിതരണത്തില്‍ പൂർണ്ണത കൈവരിക്കാൻ കഴിഞ്ഞുവെന്നത് അഭിമാനകരമായ നേട്ടമാണെന്ന് പഞ്ചായത്തിന്റെ വികസന നേട്ടങ്ങളുടെ റിപ്പോർട്ട് അവതരിപ്പിച്ച്‌ സെക്രട്ടറി പ്രീത വി പ്രഭു പറഞ്ഞു. ജലസമൃദ്ധ ഗ്രാമം എന്ന ലക്ഷ്യത്തിന്റെ ഭാഗമായി ജല ബജറ്റ് തയ്യാറാക്കി പ്രസിദ്ധീകരിച്ചതായും കാലാവസ്ഥ വ്യതിയാനവുമായി ബന്ധപ്പെട്ട പ്രശ്നങ്ങള്‍ പരിഹരിക്കുന്നതിനുള്ള വിഭവസ്രോതസ്സ് രൂപപ്പെടുത്തുന്നതിനായി സംസ്ഥാന സർക്കാർ ആവിഷ്കരിച്ച ഡി. കാറ്റ് പദ്ധതിക്ക് തുടക്കമിട്ടത് അരൂക്കുറ്റി ഗ്രാമപഞ്ചായത്തിലാണെന്നും പ്രോഗ്രാസ് റിപ്പോർട്ടില്‍ പറയുന്നു. കഴിഞ്ഞ അഞ്ചുവർഷ കാലയളവില്‍ 200 പേർക്ക് ലൈഫ് പദ്ധതിയിലുള്‍പ്പെടുത്തി വീടുകള്‍ നിർമ്മിച്ചു നല്‍കി. സ്വകാര്യ സ്‌കൂളുകളടക്കം പഞ്ചായത്തിലെ എല്ലാ സ്‌കൂളുകളിലും സാനിറ്ററി സമുച്ചയങ്ങള്‍ സ്ഥാപിച്ചതായും റിപ്പോർട്ടില്‍ ചൂണ്ടിക്കാട്ടി.
സദസ്സില്‍ പഞ്ചായത്ത് പ്രസിഡന്റ് അഷറഫ് വെള്ളേഴത്ത് അധ്യക്ഷനായി. തൈക്കാട്ടുശ്ശേരി ബ്ലോക്ക് പഞ്ചായത്ത് പ്രസിഡന്റ് വി ആർ രജിത മുഖ്യപ്രഭാഷണം നടത്തി. റിസോഴ്സ് പെഴ്സണ്‍ സന്തോഷ് കുമാർ സംസ്ഥാന സർക്കാരിന്റെ വികസന നേട്ടങ്ങള്‍ അവതരിപ്പിച്ചു.പഞ്ചായത്തിന്റെ വികസനനേട്ടങ്ങള്‍ ചിത്രീകരിച്ച വിഡീയേ സദസ്സില്‍ പ്രദർശിപ്പിച്ചു മാധ്യമപ്രവർത്തകൻ പി.ആർ. സുമേരൻ പഞ്ചായത്തിന്റെ നിർമ്മാണത്തിലാണ് വിഡീയോ തയ്യാറാക്കിയത്.
ജില്ലാ പഞ്ചായത്തംഗം ബിനിത പ്രമോദ്, ബ്ലോക്ക് പഞ്ചായത്തംഗങ്ങളായ അനിമോള്‍ അശോകൻ, അനീസ്, പഞ്ചായത്ത് വൈസ് പ്രസിഡന്റ് സറീന ഹസൻ, സ്ഥിരംസമിതി അധ്യക്ഷരായ ഷൈജു രാജ്, അൻസില നിഷാദ്, പി എം ഷാനവാസ്, സിഡിഎസ് ചെയർപേഴ്സണ്‍ ഷമീല ഹാഷിം, ആസൂത്രണ സമിതി ഉപാധ്യക്ഷൻ പി ശശിധരൻ നായർ, ജനപ്രതിനിധികളായ ടി. കെ മജീദ്, കെ. എ മാത്യു, പ്രകാശൻ വെള്ളപ്പനാട്ട്, മുംതാസ് സുബൈർ, ആഗി ജോസ്, വിദ്യാരാജ്, റാഹില ശാരി മനോജ്, മറ്റ് ഉദ്യോഗസ്ഥർ തുടങ്ങിയവർ പങ്കെടുത്തു. സദസ്സിന്റെ ഭാഗമായി വിവിധ മേഖലയിലെ വ്യക്തികളെ ആദരിച്ചു.
---------------
Hindusthan Samachar / CHANDHU CHANDRASEKHAR
