Thiruvananthapuram, 21 ഒക്റ്റോബര്‍ (H.S.)

മണ്‍സൂണ്‍ സമയക്രമം പിൻവലിച്ചതോടെ കൊങ്കണ്‍ റെയില്‍വേ പാതയിലൂടെ സർവീസ് നടത്തുന്ന 38 ട്രെയിനുകളുടെ സമയത്തില്‍ ഇന്നുമുതല്‍ മാറ്റം വരും.

മണ്‍സൂണ്‍ കഴിയുന്നതിനാല്‍ ട്രെയിനുകളുടെ വേഗവും മാറും.

ഇന്നു മുതല്‍ ജൂണ്‍ 15 വരെ 110-120 കിലോമീറ്ററിലാണ് ട്രെയിനുകള്‍ ഓടുക. കൊങ്കണ്‍ പാതയിലെ മണ്‍സൂണ്‍ വേഗം 40-75 കിലോമീറ്ററാണ്. മഴയില്‍ മണ്ണിടിച്ചില്‍ സാധ്യത കണക്കിലെടുത്തായിരുന്നു വേഗനിയന്ത്രണം. എല്ലാ ട്രെയിനുകളുടെയും സമയക്രമം റെയില്‍വേയുടെ വെബ്സൈറ്റ് വഴി പരിശോധിച്ച്‌ ഉറപ്പാക്കാം.

പുതിയ സമയക്രമം വരുന്നതോടെ എറണാകുളം-നിസാമുദ്ദീൻ മംഗള എക്സ്പ്രസ് (12617) മൂന്നു മണിക്കൂറോളം വൈകിയാണ് പുറപ്പെടുക. എറണാകുളത്തുനിന്ന് നിലവില്‍ രാവിലെ 10.30ന് പുറപ്പെടുന്ന ട്രെയിൻ ഇനി ഉച്ചയ്ക്ക് 1.25ന് പുറപ്പെടും.

നിസാമുദ്ദീൻ-എറണാകുളം മംഗള (12618) ഒരുമണിക്കൂർ നേരത്തെ എത്തും. രാത്രി 10.35ന് മംഗളൂരു വിടുന്ന ട്രെയിൻ ഷൊർണൂരില്‍ പുലർച്ചെ 4.10ന് എത്തും.

തിരുവനന്തപുരം-ലോകമാന്യതിലക് നേത്രാവതി എക്സ്പ്രസ് രാവിലെ 9.15ന് പുറപ്പെടും. എറണാകുളം ജംക്‌ഷനില്‍ ഉച്ചയ്ക്ക് 1.45ന് എത്തുന്ന ട്രെയിൻ കോഴിക്കോട്ട് വൈകിട്ട് ആറിന് എത്തും.

ലോകമാന്യതിലക്- തിരുവനന്തപുരം നേത്രാവതി എക്സ്പ്രസ് (16345) ഒന്നര മണിക്കൂർ നേരത്തെ എത്തും. കോഴിക്കോട്ട് രാവിലെ 8.07നാണ് എത്തുക. നിലവില്‍ കോഴിക്കോട് 9.42നാണ് എത്തുന്നത്.

എറണാകുളം-അജ്മീർ മരുസാഗർ-12977 രാത്രി 12.12ന് കോഴിക്കോട്ടെത്തും. തിരുവനന്തപുരം- ഭാവ്നഗർ (19259) രാത്രി 12.07ന് കോഴിക്കോട്ടെത്തും. എറണാകുളം-ഓഖ ( 16338) രാത്രി 12.07നും തിരുവനന്തപുരം-വെരാവല്‍ (16334) രാത്രി 12.07നും കോഴിക്കോട്ടെത്തും. തിരുവനന്തപുരം- ചണ്ഡീഗഢ്‌ (12217) വൈകിട്ട് 4.27ന് എത്തും.

എറണാകുളം നിസാമുദ്ദിൻ മംഗള എക്സ്പ്രസ് ( 12617) എറണാകുളം ജംക്‌ഷനില്‍ നിന്ന് ഉച്ചയ്ക്ക് 1.25നു പുറപ്പെടും.

തിരുവനന്തപുരം ലോക്മാന്യതിലക് നേത്രാവതി എക്സ്പ്രസ് (16346) തിരുവനന്തപുരം സെൻട്രലില്‍ നിന്നു രാവിലെ 9.15നു പുറപ്പെടും.

എറണാകുളം -പുണെ സൂപ്പർഫാസ്റ്റ് എക്സ്പ്രസ് (22149): രാവിലെ 2.15ന് എറണാകുളം ജംക്‌ഷനില്‍ നിന്ന്.

വെരാവല്‍ വീക്ക്‌ലി എക്സ്പ്രസ് (16334); തിരുവനന്തപുരം സെൻട്രലില്‍ നിന്നു വൈകിട്ട് 3.45ന്

മുംബൈ എല്‍ടിടി ഗരീബ് എക്സ്പ്രസ്(12202); തിരുവനന്തപുരത്ത് നിന്നു രാവിലെ 7.45ന്.

---------------

Hindusthan Samachar / CHANDHU CHANDRASEKHAR