Pala, 25 ഒക്റ്റോബര്‍ (H.S.)

രാഷ്ട്രത്തിൻ്റെ പരമോന്നത പദവിയിലിരിക്കുന്ന ദ്രൗപദി മുർമു എന്ന വ്യക്തിത്വം, ഔദ്യോഗിക പദവിയുടെ അതിർവരമ്ബുകള്‍ മാറ്റിനിർത്തി, തൻ്റെ സ്നേഹം കൊണ്ട് ഒരു സാധാരണക്കാരിയുടെ ജീവിതത്തില്‍ ചരിത്രമെഴുതിയ കാഴ്ചയാണ് കഴിഞ്ഞ ദിവസം പാലായിലെ സെന്റ്.തോമസ് കോളേജില്‍ കണ്ടത്.

പ്രോട്ടോക്കോള്‍ നിയന്ത്രണങ്ങളെ സ്നേഹബന്ധം കൊണ്ട് മറികടന്ന്, രാഷ്ട്രപതി ഭവനില്‍ 26 വർഷം സേവനം അനുഷ്ഠിച്ച ഏറ്റുമാനൂർ ചകിരിയാംതടത്തില്‍ ബിന്ദു ഷാജിയോടും മകളോടും രാഷ്ട്രപതിക്ക് ഒപ്പം മുൻനിരയില്‍ തന്നെ ഇരിക്കണമെന്ന് ആവശ്യപ്പെട്ട ആ വാത്സല്യം, വെറുമൊരു ഔദ്യോഗിക ബന്ധമല്ല, ഹൃദയബന്ധമാണ് വെളിവാക്കുന്നത്.

കെ.ആർ. നാരായണൻ മുതല്‍ ദ്രൗപദി മുർമു വരെയുള്ള ആറ് രാഷ്ട്രപതിമാർക്ക് രാഷ്ട്രപതി ഭവനില്‍ പരിചരണം നല്‍കിയ പാരമ്ബര്യമുണ്ട് ബിന്ദു ഷാജിക്ക്. 1999-ല്‍ ഡല്‍ഹി അപ്പോളോ ആശുപത്രിയില്‍ നിന്ന് രാഷ്ട്രപതി ഭവനിലെ നഴ്‌സായി എത്തിയതുമുതല്‍, രാഷ്ട്രപതി ഭവനിലെ ഒരു യുഗം തന്നെ ബിന്ദു ഷാജിയുടെ സേവനത്തിലൂടെ കടന്നുപോയി.

18 വർഷം മുൻപ് ഭർത്താവ് ഷാജി ചാക്കോയുടെ മരണശേഷം, തൻ്റെ മക്കളായ സാന്ദ്ര മേരി ഷാജിക്കും സ്നേഹ മരിയ ഷാജിക്കും വേണ്ടി അവർ നടത്തിയ ത്യാഗപൂർണ്ണമായ ജീവിതയാത്രയുടെ അടയാളപ്പെടുത്തല്‍ കൂടിയാണ് ഈ അംഗീകാരം.

രാഷ്ട്രപതി ദ്രൗപദി മുർമുവുമായുള്ള അടുപ്പം എല്ലാ ഔദ്യോഗിക അതിർവരമ്ബുകളെയും ഭേദിക്കുന്നതായിരുന്നു. ഈ ആത്മബന്ധത്തിൻ്റെ സാക്ഷ്യമായിരുന്നു, പാലായിലെ ആഘോഷവേളയില്‍ രാഷ്ട്രപതിയുടെ സ്നേഹത്തോടെ ഉള്ള ക്ഷണം: പാലായിലെ ആഘോഷവേളയില്‍ മോളുമായി മുൻസീറ്റിലുണ്ടാകണം. സെന്റ്. തോമസ് കോളേജ് വിദ്യാർത്ഥിനിയായ ഇളയ മകള്‍ സാന്ദ്ര മേരി ഷാജി, അമ്മ ബിന്ദു ഷാജിക്കൊപ്പം വി.ഐ.പി.കള്‍ക്കൊപ്പമുള്ള മുൻനിരയില്‍ ഇടംപിടിച്ചപ്പോള്‍ അത് കേവലം ഒരു ഇരിപ്പിടമായിരുന്നില്ല. ആ അമ്മയുടെ ആത്മാർത്ഥമായ സേവനത്തിനുള്ള ഉന്നതമായ അംഗീകാരമായിരുന്നു.

ബിന്ദു ഷാജിയുടെ മക്കളുടെ ജീവിതത്തിലും രാഷ്ട്രപതിയുടെ സ്നേഹം പ്രോത്സാഹനമായി എത്തിയിട്ടുണ്ട്. മക്കളുടെ നൃത്തത്തിലുള്ള അഭിരുചിയെ രാഷ്ട്രപതി പ്രോത്സാഹിപ്പിക്കാറുണ്ടായിരുന്നു.

തെയ്യം വേഷത്തില്‍ സ്നേഹയുടെ നൃത്തം രാഷ്ട്രപതിക്ക് സ്വാഗതമോതിയത്, അമ്മയുടെയും മക്കളുടെയും ജീവിതം രാഷ്ട്രപതി ഭവനിലെ അന്തേവാസികളുടെ സ്നേഹവലയത്തില്‍ എത്രമാത്രം സുരക്ഷിതമായിരുന്നു എന്നതിൻ്റെ ഉദാഹരണമാണ്.

മക്കളെ അധ്യാപകരാക്കണമെന്ന ഉപദേശവും രാഷ്ട്രപതി നല്‍കാറുണ്ടത്രേ. ബിന്ദു ഷാജിയുടെ ഈ ജീവിതം, ആത്മാർത്ഥമായ സേവനത്തിന് അധികാരത്തിൻ്റെ ഉയർന്ന പടവുകളില്‍ പോലും അംഗീകാരവും സ്നേഹവും ലഭിക്കുമെന്നതിൻ്റെ പ്രചോദനാത്മകമായ സാക്ഷ്യമാണ്.

രാഷ്ട്രപതി ഭവൻ വെറുമൊരു ഔദ്യോഗിക മന്ദിരമല്ല, മറിച്ച്‌ ബിന്ദു ഷാജിക്കും കുടുംബത്തിനും സ്നേഹത്തിന്റെ കൈത്താങ്ങ് ലഭിച്ചൊരിടം കൂടെയാണ്.

---------------

Hindusthan Samachar / CHANDHU CHANDRASEKHAR