Lucknow, 27 ഒക്റ്റോബര്‍ (H.S.)

ലഖ്‌നൗ: ഉത്തർപ്രദേശിലെ ലഖിംപൂർ ഖേരി ജില്ലയിലുള്ള മുസ്തഫാബാദ് ഗ്രാമത്തിന്റെ പേര് 'കബീർധാം' എന്ന് പുനർനാമകരണം ചെയ്യാൻ സർക്കാർ നിർദ്ദേശം നൽകുമെന്ന് മുഖ്യമന്ത്രി യോഗി ആദിത്യനാഥ്. സന്ത് കബീറുമായി ബന്ധപ്പെട്ട പ്രദേശത്തിന്റെ ചരിത്രപരവും സാംസ്കാരികവുമായ തനിമ വീണ്ടെടുക്കാൻ ഈ പേരുമാറ്റം സഹായിക്കുമെന്ന് അദ്ദേഹം തിങ്കളാഴ്ച പ്രസ്താവിച്ചു.

സ്മൃതി മഹോത്സവ് മേള 2025 ൽ സംസാരിക്കവെ, മുൻ സർക്കാരുകൾ 'കബറിസ്ഥാനുകളുടെ' (ശ്മശാനങ്ങൾ) സംരക്ഷണ ഭിത്തികൾ നിർമ്മിക്കാൻ ഫണ്ട് ചെലവഴിച്ചിരുന്ന സ്ഥാനത്ത്, തന്റെ സർക്കാർ ഇപ്പോൾ മതപരവും സാംസ്കാരികവുമായ പ്രാധാന്യമുള്ള സ്ഥലങ്ങളുടെ പുനരുജ്ജീവനത്തിനാണ് പണം വിനിയോഗിക്കുന്നതെന്ന് ആദിത്യനാഥ് പറഞ്ഞു.

മുസ്ലീം ജനസംഖ്യ ഇല്ലാതിരുന്നിട്ടും ഗ്രാമത്തിന് മുസ്തഫാബാദ് എന്ന് പേരിട്ടതിൽ താൻ അത്ഭുതപ്പെട്ടുവെന്ന് മുഖ്യമന്ത്രി പറഞ്ഞു. ഞാൻ ഇവിടെ വന്നപ്പോൾ ഈ ഗ്രാമത്തെക്കുറിച്ച് ചോദിച്ചു, അതിന്റെ പേര് മുസ്തഫാബാദ് എന്നാണെന്ന് അറിഞ്ഞു. ഇവിടെ എത്ര മുസ്ലീങ്ങൾ താമസിക്കുന്നുണ്ടെന്ന് ഞാൻ ചോദിച്ചപ്പോൾ, ആരുമില്ലെന്നാണ് മറുപടി ലഭിച്ചത്. അപ്പോൾ ഞാൻ പറഞ്ഞു, ഈ പേര് മാറ്റണം. ഇതിനെ കബീർധാം എന്ന് വിളിക്കണം, അദ്ദേഹം പറഞ്ഞു.

പേരുമാറ്റത്തിനുള്ള ഔദ്യോഗിക നിർദ്ദേശം തേടുമെന്നും ആവശ്യമായ ഭരണപരമായ നടപടികൾ സ്വീകരിക്കുമെന്നും മുഖ്യമന്ത്രി കൂട്ടിച്ചേർത്തു.

മുൻപ് ഭരിച്ചിരുന്നവർ അയോധ്യയെ ഫൈസാബാദ് എന്നും, പ്രയാഗ്‌രാജിനെ അലഹബാദ് എന്നും, കബീർധാമിനെ മുസ്തഫാബാദ് എന്നും പുനർനാമകരണം ചെയ്തു. ഞങ്ങളുടെ സർക്കാർ അത് തിരുത്തുകയാണ് - അയോധ്യയെയും പ്രയാഗ്‌രാജിനെയും വീണ്ടെടുക്കുന്നു, ഇപ്പോൾ കബീർധാമിന് അതിന്റെ യഥാർത്ഥ പേര് പുനഃസ്ഥാപിക്കുന്നു, അദ്ദേഹം പറഞ്ഞു.

സംസ്ഥാനത്തുടനീളമുള്ള എല്ലാ വിശ്വാസ കേന്ദ്രങ്ങളും വികസിപ്പിക്കാനും മനോഹരമാക്കാനും ഭാരതീയ ജനതാ പാർട്ടിയുടെ ഇരട്ട എഞ്ചിൻ സർക്കാർ പ്രതിജ്ഞാബദ്ധമാണെന്നും മുഖ്യമന്ത്രി ഊന്നിപ്പറഞ്ഞു. കാശി, അയോധ്യ, കുശിനഗർ, നൈമിഷാരണ്യം, മഥുര-വൃന്ദാവനം, ബർസാന, ഗോകുൽ, ഗോവർദ്ധൻ തുടങ്ങി എല്ലാ പ്രധാന വിശ്വാസ കേന്ദ്രങ്ങളും ടൂറിസം, സാംസ്കാരിക വകുപ്പുകളിലൂടെ ഞങ്ങൾ പുനരുജ്ജീവിപ്പിക്കുകയാണ്, അദ്ദേഹം കൂട്ടിച്ചേർത്തു.

പൊതുപണം ഇപ്പോൾ സാംസ്കാരികവും മതപരവുമായ പുനരുജ്ജീവന പദ്ധതികൾക്കാണ് ഉപയോഗിക്കുന്നതെന്ന് അവകാശപ്പെട്ട അദ്ദേഹം, ഇത് നമ്മുടെ നാഗരിക സ്വത്വത്തിന്റെ പുനരുജ്ജീവനമാണ്. ഇന്ത്യയുടെ ആത്മീയവും സാംസ്കാരികവുമായ വേരുകളെ പ്രതിഫലിപ്പിക്കുന്ന സ്ഥലങ്ങളുടെ പ്രതാപം വീണ്ടെടുക്കാൻ സർക്കാർ തുടർന്നും പ്രവർത്തിക്കും, എന്നും കൂട്ടിച്ചേർത്തു.

---------------

Hindusthan Samachar / Roshith K