New Delhi, 28 ഒക്റ്റോബര്‍ (H.S.)

കെപിസിസി നേതൃത്വത്തിനെതിരെ ഹൈക്കമാൻഡ് വിളിച്ചുചേർത്ത അടിയന്തര യോഗത്തില്‍ മുതിർന്ന നേതാക്കള്‍ കടുത്ത അതൃപ്തി അറിയിച്ചു.

ഗ്രൂപ്പ് വഴക്കുകളും നേതൃതലത്തിലെ ഏകോപനമില്ലായ്മയും സംസ്ഥാനത്തെ പാർട്ടിക്ക് ദോഷകരമായി ബാധിക്കുന്നുവെന്നായിരുന്നു പ്രധാന വിമർശനം.

പാർട്ടിയിലെ ഐക്യമില്ലായ്മയെ കെപിസിസി പ്രസിഡന്റ് കെ. സുധാകരൻ തുറന്നടിച്ചു. ചില നേതാക്കള്‍ തന്നെയാണ് പാർട്ടിയില്‍ അനൈക്യം ഉണ്ടാക്കുന്നത്, ഇങ്ങനെ പോയാല്‍ പാർട്ടി വെള്ളത്തില്‍ ആകും, എന്ന് അദ്ദേഹം മുന്നറിയിപ്പ് നല്‍കി. പുനഃസംഘടനയിലെ കാലതാമസം, കെപിസിസി സെക്രട്ടറിമാരുടെ പട്ടിക പ്രസിദ്ധീകരിക്കാത്തത്, യൂത്ത് കോണ്‍ഗ്രസ് അധ്യക്ഷന്റെ നിയമനം തുടങ്ങിയ വിഷയങ്ങളില്‍ നേതാക്കള്‍ തഴയപ്പെട്ടതായി പരാതി ഉയർത്തി. സുപ്രധാന വിഷയങ്ങളില്‍ കൂടിയാലോചനകളോ കൂടിയാലോചനകളോ നടക്കുന്നില്ലെന്നും പരാതിയുണ്ടായി.

പ്രതിപക്ഷ നേതാവിന്റെയും കെപിസിസി അധ്യക്ഷന്റെയും പ്രവർത്തന രീതിക്കെതിരെയും വിമർശനം ഉയർന്നു. കെപിസിസി നേതൃത്വത്തിനെതിരെ ഉയർന്ന വിമർശനങ്ങള്‍ കോണ്‍ഗ്രസ് അധ്യക്ഷൻ മല്ലികാർജുൻ ഖാർഗെ സ്ഥിരീകരിച്ചു.

നേതാക്കളെ വിശ്വാസത്തിലെടുത്ത് മുന്നോട്ട് പോകുമെന്നും കേരളത്തില്‍ വിജയം ഉറപ്പാണെന്നും ഖാർഗെ വ്യക്തമാക്കി. നിർണായകമായ രണ്ട് തെരഞ്ഞെടുപ്പുകള്‍ അടുത്തിരിക്കെ, എല്ലാ നേതാക്കളും ഐക്യത്തോടെ മുന്നോട്ട് പോകണം എന്ന് എഐസിസി ശക്തമായി നിർദേശം നല്‍കി.

പ്രശ്നങ്ങള്‍ പരിഹരിക്കുക എന്ന ലക്ഷ്യത്തോടെ, ഭാരവാഹി പട്ടികയില്‍ തഴഞ്ഞതില്‍ അതൃപ്തി അറിയിച്ച നേതാക്കളെ മല്ലികാർജുൻ ഖാർഗെ, രാഹുല്‍ ഗാന്ധി, പ്രിയങ്ക ഗാന്ധി, കെ.സി. വേണുഗോപാല്‍ എന്നിവർ പ്രത്യേകം പ്രത്യേകം കണ്ടു സംസാരിച്ചു.

കേരളത്തിലെ തദ്ദേശ തെരഞ്ഞെടുപ്പ് പ്രചരണത്തിന് നവംബർ ഒന്നിന് ഔദ്യോഗികമായി തുടക്കം കുറയ്ക്കാൻ എഐസിസി നിർദേശിച്ചു. പ്രതിപക്ഷ നേതാവും കെപിസിസി അധ്യക്ഷനും ചേർന്ന് അവതരിപ്പിച്ച പ്രചാരണ പദ്ധതിക്ക് ചെറിയ ഭേദഗതികളോടെ എഐസിസി അംഗീകാരം നല്‍കി. കേരളത്തില്‍ മുഖ്യമന്ത്രി സ്ഥാനാർത്ഥിയെ ഉയർത്തിക്കാട്ടുമോ എന്ന ചോദ്യത്തിന് ഖാർഗെ ചിരിച്ചു തള്ളി. അത് പറയേണ്ടത് തന്റെ ഉത്തരവാദിത്തമല്ല, എന്നായിരുന്നു ശശി തരൂരിന്റെ പ്രതികരണം.

---------------

Hindusthan Samachar / CHANDHU CHANDRASEKHAR