Patna, 29 ഒക്റ്റോബര്‍ (H.S.)

പാറ്റ്ന: ബീഹാറിൽ എൻ ഡി എ യുടെ മുഖ്യമന്ത്രി സ്ഥാനാർഥിയെ പ്രഖ്യാപിച്ചിട്ടില്ലെന്ന വിമർശനങ്ങളെ തള്ളി കേന്ദ്ര ആഭ്യന്തര മന്ത്രി അമിത് ഷാ. നിതീഷ് കുമാർ ബിഹാർ മുഖ്യമന്ത്രിയായി തുടരുമെന്ന് സ്ഥിരീകരിക്കുകയും ചെയ്തു.

ബിഹാറിലെ ഒരു പൊതുയോഗത്തെ അഭിസംബോധന ചെയ്യവെ ഷാ പറഞ്ഞു: മുഖ്യമന്ത്രിയുടെയോ പ്രധാനമന്ത്രിയുടെയോ സീറ്റുകൾ ഒഴിവില്ല... ഇവിടെ നിതീഷ് കുമാറുണ്ട്, അവിടെ പ്രധാനമന്ത്രി മോദിയുണ്ട്.

നിതീഷ് കുമാർ ബിഹാർ മുഖ്യമന്ത്രിയായി തുടരുന്നുവെന്നും നരേന്ദ്ര മോദി പ്രധാനമന്ത്രിയായി തുടരുന്നുവെന്നും അടിവരയിട്ട് പറഞ്ഞുകൊണ്ട്, സംസ്ഥാനത്ത് എന്തെങ്കിലും രാഷ്‌ട്രീയ മാറ്റങ്ങളോ പുതിയ അധികാര ക്രമീകരണങ്ങളോ ഉണ്ടാകുമെന്ന അഭ്യൂഹങ്ങൾ ഇല്ലാതാക്കാൻ ഷാ ശ്രമിച്ചു.

തന്റെ പ്രസംഗത്തിനിടെ, മുൻ മുഖ്യമന്ത്രി കർപ്പൂരി താക്കൂറിന് ഭാരത രത്‌ന നൽകി ബീഹാറിന്റെ പാരമ്പര്യത്തെ ആദരിക്കുകയും സംസ്ഥാനത്തിന്റെ പ്രതിച്ഛായ വർദ്ധിപ്പിക്കുകയും ചെയ്‌തതിന് പ്രധാനമന്ത്രി മോദിയെ ഷാ പ്രശംസിച്ചു. പഹൽഗാം ആക്രമണത്തിന് ശേഷമുള്ള 'ഓപ്പറേഷൻ സിന്ദൂർ', പിഎഫ്ഐയുടെ നിരോധനം തുടങ്ങിയ ശക്തമായ തീരുമാനങ്ങളും അദ്ദേഹം എടുത്തുപറഞ്ഞു.

വരാനിരിക്കുന്ന നിയമസഭാ തിരഞ്ഞെടുപ്പിൽ എൻഡിഎക്ക് നിർണ്ണായക വിജയം ഉറപ്പാക്കാൻ അദ്ദേഹം ബിഹാർ ജനങ്ങളോട് അഭ്യർത്ഥിച്ചു, പ്രത്യേകിച്ച് ദർഭംഗയിലെ സീറ്റുകളും സ്ഥാനാർത്ഥി മൈഥിലി താക്കൂറിനെയും പരാമർശിച്ചു. രാമക്ഷേത്ര നിർമ്മാണത്തെക്കുറിച്ചും, മിഥിലയിൽ സീതാദേവിക്കായി ഒരു ക്ഷേത്രം പണിയേണ്ടതിന്റെ ആവശ്യകതയെക്കുറിച്ചും, സീതാദേവി സന്ദർശിച്ച സ്ഥലങ്ങളെല്ലാം രാം സർക്യൂട്ട് വഴി ബന്ധിപ്പിക്കേണ്ടതിനെക്കുറിച്ചും അദ്ദേഹം സൂചിപ്പിച്ചു.

പിന്നീട് ശാന്തിപ്പൂരിലെ മറ്റൊരു റാലിയിൽ സംസാരിക്കവെ, നിതീഷ് കുമാറിന്റെയും ചിരാഗ് പാസ്വാന്റെയും നേതൃത്വവും പ്രധാനമന്ത്രി മോദിയുടെ അനുഗ്രഹവും ബിഹാറിന് ലഭിക്കുന്നതിനാൽ സംസ്ഥാനത്ത് എൻഡിഎയുടെ നില കൂടുതൽ ശക്തിപ്പെടുത്താൻ കഴിയുമെന്ന് ഷാ പറഞ്ഞു.

---------------

Hindusthan Samachar / Roshith K