Enter your Email Address to subscribe to our newsletters
Thiruvananthapuram, 6 നവംബര്‍ (H.S.)
കുട്ടികളുടെ ശരിയായ മാനസിക വളർച്ചയില്‍ ആരോഗ്യപരമായ കുടുംബബന്ധങ്ങള്‍ക്കുള്ള പ്രാധാന്യം മാതാപിതാക്കള്‍ ഉള്‍ക്കൊള്ളണമെന്ന് വനിതാ കമ്മീഷൻ അധ്യക്ഷ പി സതീദേവി പറഞ്ഞു.
സത്യൻ സ്മാരക ഹാളില്‍ നടന്ന കമ്മീഷൻ സിറ്റിങ്ങിന് ശേഷം സംസാരിക്കുകയായിരുന്നു അധ്യക്ഷ. ലഭിക്കുന്ന പരാതികളില്‍ കൂടുതലും ഗാർഹിക വിഷയങ്ങളുമായി ബന്ധപ്പെട്ടതാണ്. ഇത്തരം വിഷയങ്ങളില്‍ ഏറ്റവും കൂടുതല്‍ വിഷമിക്കുന്നത് കുട്ടികളാണ് എന്നത് എല്ലാവരും മനസിലാക്കണം. കൗമാരക്കാരായ കുട്ടികളില്‍ ആരോഗ്യപരമായ ബന്ധങ്ങളെക്കുറിച്ച്‌ ബോധവത്കരണം നടത്തുന്നതിന് കലാലയജ്യോതി എന്ന പേരില്‍ ക്യാമ്ബയില്‍ സംഘടിപ്പിക്കും.
തൊഴിലിടങ്ങളില്‍ പോഷ് ആക്‌ട് പ്രകാരമുള്ള ആഭ്യന്തരകമ്മിറ്റികള്‍ രൂപീകരിക്കാത്ത സ്ഥാപങ്ങള്‍ക്കെതിരെ കർശന നടപടി സ്വീകരിക്കുമെന്നും അധ്യക്ഷ പറഞ്ഞു. ഇത് സംബന്ധിച്ച പരിശോധനകള്‍ എല്ലാ ജില്ലകളിലും നടത്തും. പഴയകാലത്തെ വട്ടിപലിശയുടെ രീതിയിലുള്ള പുതിയ ഡിജിറ്റല്‍ വായ്പാ സംവിധാനങ്ങള്‍ സൃഷ്ടിക്കുന്ന പ്രശ്നങ്ങള്‍ വലുതാണ്. നിരവധി സ്ത്രീകളാണ് ഇത്തരം ചതിക്കുഴികളില്‍ വീഴുന്നത്. ഇതുമായി ബന്ധപ്പെട്ട് ഒട്ടേറെ പരാതികള്‍ ലഭിക്കുന്നതായും അധ്യക്ഷ പി സതീദേവി പറഞ്ഞു.
കഴിഞ്ഞ രണ്ട് ദിവസങ്ങളിലായി നടന്ന കമ്മീഷൻ സിറ്റിങ്ങില്‍ ആകെ 330 പരാതികള്‍ പരിഗണിച്ചു. ഇതില്‍ 64 എണ്ണം പരിഹരിച്ചു.17 എണ്ണത്തില്‍ റിപ്പോർട്ട് തേടി. 5 പരാതികള്‍ കൗണ്‍സിലിങിന് വിട്ടു. ശേഷിച്ചവ അടുത്ത അദാലത്തില്‍ പരിഗണിക്കും.സിറ്റിങ്ങില്‍ കമ്മീഷൻ അംഗങ്ങളായ അഡ്വ. ഇന്ദിര രവീന്ദ്രൻ , അഡ്വ. എലിസബെത്ത് മാമ്മൻ മത്തായി , വി ആർ മഹിളാമണി , അഡ്വ. പി കുഞ്ഞായിഷ , ഡയറക്ടർ ഷാജി സുഗുണൻ, സി ഐ ജോസ് കുര്യൻ സബ് ഇൻസ്പക്ടർ മഞ്ചു എസ്, കൗണ്‍സിലർമാരായ അഡ്വ. എസ് സിന്ധു , അഡ്വ. അശ്വതി തുടങ്ങിയവർ പങ്കെടുത്തു.
---------------
Hindusthan Samachar / CHANDHU CHANDRASEKHAR
