Enter your Email Address to subscribe to our newsletters
Thiruvanathapuram, 1 ഡിസംബര് (H.S.)
രാഹുല് മാങ്കൂട്ടത്തിലിനെ വിമര്ശിച്ചതിന്റെ പേരില് നടക്കുന്ന സൈബര് ആക്രമണം ഭയന്ന് നിലപാടില് മാറ്റം വരുത്തില്ലെന്നും രാജ്മോഹന് ഉണ്ണിത്താന് എം.പി. തന്നെപ്പോലുള്ളവരെ പാര്ലമെന്റ് അംഗങ്ങളാക്കിയ സാധാരണ പ്രവര്ത്തകര്ക്ക് ലഭിക്കുന്ന അവസരമാണ് പഞ്ചായത്ത് തെരഞ്ഞെടുപ്പുകള്. അവരുടെ കഞ്ഞിയില് മണ്ണുവാരിയിടാന് ഒരു നേതാവും തയാറാകാന് പാടില്ലെന്നും അദ്ദേഹം പറഞ്ഞു.
കോണ്ഗ്രസ് പാര്ട്ടിക്ക് ഒരു നിലപാടും മൂല്യാധിഷ്ഠിത രാഷ്ട്രീയവും വേണം. അതില് നിന്ന് വ്യതിചലിക്കാന് പാടില്ലെന്നും എംപി പ്രതികരിച്ചു. തദ്ദേശ സ്വയംഭരണ തെരഞ്ഞെടുപ്പിന് ശേഷം താന് മാധ്യമങ്ങളെ കാണുമെന്നും അദ്ദേഹം വ്യക്തമാക്കി. പറയാനുള്ളത് രാഹുല് മാങ്കൂട്ടത്തില് എന്ന വ്യക്തിക്ക് വേണ്ടി ഇന്ത്യന് നാഷണല് കോണ്ഗ്രസ് എന്ന പാര്ട്ടിയുടെ പ്രതിച്ഛായ കളങ്കപ്പെടുത്തി കൊണ്ടിരിക്കുകയാണെന്ന് കഴിഞ്ഞ ദിവസം രാജ്മോഹന് ഉണ്ണിത്താന് പറഞ്ഞിരുന്നു. ഒരു വ്യക്തിക്ക് വേണ്ടി പ്രസ്ഥാനത്തെ ബലി കഴിക്കണോ എന്നുള്ളത് ആലോചിക്കേണ്ട വിഷയമാണ്. ഇത് പാര്ട്ടിയുടെ സാധ്യതകള്ക്ക് മങ്ങലേല്പ്പിച്ചു. നിലവില് പൊതുസമൂഹത്തില് പാര്ട്ടിക്ക് ഒരു നിലയും വിലയും ഉണ്ട്. ഇത് നഷ്ടപ്പെടുന്ന നിലയിലേക്കാണ് കാര്യങ്ങള് പോകുന്നതെന്നും രാജ് മോഹന് ഉണ്ണിത്താന് പറഞ്ഞു.
കോണ്ഗ്രസില് വ്യക്തിത്വമുളളവരെ സൈബര് ആക്രമണത്തിലൂടെ കീഴ്പ്പെടുത്തി വായടപ്പിക്കാനാണ് ശ്രമമെങ്കില് കൂടുതല് കാര്യങ്ങള് ഞാന് പറയും. എനിക്കെതിരെ സൈബര് ആക്രമണം തുടര്ന്നാല് പത്രസമ്മേളനം നടത്തി പറഞ്ഞിരിക്കും. എന്നെക്കൊണ്ട് പറയിപ്പിക്കരുത്. അനാവശ്യമായി പ്രകോപിപ്പിക്കരുത്. ഒരുപാട് കേസുകളുണ്ട്. ആ കേസുകളെക്കുറിച്ച് എല്ലാമറിയാവുന്ന ആളാണ് ഞാന്. സൈബര് ആക്രമണം തുടര്ന്നാല് വാര്ത്താസമ്മേളനം നടത്തി ഞാന് എല്ലാം പറയും': രാജ്മോഹന് ഉണ്ണിത്താന് പറഞ്ഞു.
എനിക്കെതിരെ സൈബര് ആക്രമണം നടത്തുന്നത് മാര്ക്സിസ്റ്റുകാര് അല്ല. ബി.ജെ.പിക്കാരുമല്ല. ഇത്രയും പാരമ്പര്യമുള്ള കോണ്ഗ്രസ് പാര്ട്ടിയിലെ ചിലരാണ്. സോളാര് കേസ് വന്നപ്പോള് രാജ്മോഹന് ഉണ്ണിത്താനെ ഉണ്ടായിരുന്നുള്ളൂ കോണ്ഗ്രസിന്റെ മുഖം രക്ഷിക്കാന്. പല കാര്യങ്ങളും പറയേണ്ടി വരും. ഇപ്പോള് പാര്ട്ടിയുടെ പാരമ്പര്യത്തിനും പൈതൃകത്തിനും എതിരായാണ് സംഭവിക്കുന്നത്. രാഹുല് മാങ്കൂട്ടത്തിലിനെ വെള്ളപൂശി കൊണ്ട് വീക്ഷണം പത്രത്തില് വന്ന എഡിറ്റോറിയല് ജനം പരമപുച്ഛത്തോടെ തള്ളും'- രാജ് മോഹന് ഉണ്ണിത്താന് പറഞ്ഞു.
---------------
Hindusthan Samachar / Sreejith S
