Enter your Email Address to subscribe to our newsletters
Kochi, 15 ഡിസംബര് (H.S.)
രാഹുല് മാങ്കൂട്ടത്തില് എംഎല്എയ്ക്കെതിരായ ആദ്യ ബലാത്സംഗക്കേസില് അറസ്റ്റ് വിലക്ക് നീട്ടി. വ്യാഴാഴ്ച വരെയാണ് വിലക്ക് നീട്ടിയത്. കേസില് മുന്കൂര് ജാമ്യം തേടിയുള്ള രാഹുലിന്റെ ഹര്ജി അന്നു പരിഗണിക്കാനും ജസ്റ്റിസ് കെ.ബാബുവിന്റെ ബെഞ്ച് തീരുമാനിച്ചു. നേരത്തെ മറ്റൊരു ബലാത്സംഗ കേസില് രാഹുല് മാങ്കൂട്ടത്തിലിന് മുന്കൂര് ജാമ്യം അനുവദിച്ച തിരുവനന്തപുരം സെഷന്സ് കോടതി വിധിക്കെതിരായ സര്ക്കാരിന്റെ അപ്പീല് പരിഗണിക്കുന്നത് മറ്റൊരു ബെഞ്ച് മാറ്റിവച്ചിരുന്നു. ക്രിസ്മസ് അവധിക്കു ശേഷമായിരിക്കും ഈ കേസ് വീണ്ടും പരിഗണിക്കുക.
ബലാല്സംഗം ചെയ്യുകയും നിര്ബന്ധിച്ചു ഗര്ഭഛിദ്രം നടത്തുകയും ചെയ്തു എന്നാണ് കേസ്. ഹര്ജിയില് വിശദമായി വാദം കേള്ക്കണമെന്ന് വ്യക്തമാക്കിക്കൊണ്ടാണ് കഴിഞ്ഞ ദിവസം കോടതി രാഹുലിന്റെ അറസ്റ്റ് താല്ക്കാലികമായി വിലക്കിയത്. തുടര്ന്ന് ഇന്ന് കേസ് പരിഗണിച്ചപ്പോള് കേസ് വ്യാഴാഴ്ച വാദത്തിനെടുക്കാമെന്ന് തീരുമാനിക്കുകയായിരുന്നു. പരസ്പര സമ്മതത്തോടെയുള്ള ബന്ധമായിരുന്നെന്നും ബന്ധത്തില് വിള്ളലുണ്ടായപ്പോള് യുവതി പരാതി നല്കിയതാണ് എന്നുമാണ് രാഹുലിന്റെ വാദം. ആരോപണം ബലാല്സംഗ കുറ്റത്തിന്റെ നിര്വചനത്തില് വരുന്നതല്ല. ഗര്ഭഛിദ്രം നടത്തിയെന്ന ആരോപണം തെറ്റിദ്ധരിപ്പിക്കാനാണ്. ഇക്കാര്യത്തില് തന്റെ പക്കല് മതിയായ തെളിവുകളുണ്ട്. കസ്റ്റഡിയില് ചോദ്യം ചെയ്യേണ്ട ആവശ്യമില്ല. അന്വേഷണവുമായി സഹകരിക്കാന് തയാറാണ് എന്നുമാണ് ഹര്ജിയില് പറയുന്നത്.
അന്വേഷണ ഉദ്യോഗസ്ഥന്റെ മുന്നില് ഹാജരാകാന് അവസരം നല്കിയാല് കുറ്റകൃത്യത്തിന്റെ സാഹചര്യങ്ങള് വിശദീകരിക്കാന് തയാറാണെന്നും രാഹുല് ഹര്ജിയില് പറഞ്ഞിരുന്നു. തിരുവനന്തപുരം സെഷന്സ് കോടതി ജാമ്യാപേക്ഷ തള്ളിയതിനെ തുടര്ന്നാണ് ഹൈക്കോടതിയെ സമീപിച്ചത്.
---------------
Hindusthan Samachar / Sreejith S
