Bengaluru , 19 ഡിസംബര്‍ (H.S.)

ന്യൂഡൽഹി: കർണാടക മുഖ്യമന്ത്രി സ്ഥാനത്തെച്ചൊല്ലിയുള്ള തർക്കങ്ങൾക്കിടെ, താനും ഉപമുഖ്യമന്ത്രി ഡി.കെ. ശിവകുമാറും തമ്മിൽ രണ്ടര വർഷത്തെ അധികാര പങ്കിടൽ കരാർ ഉണ്ടെന്ന വാർത്തകൾ മുഖ്യമന്ത്രി സിദ്ധരാമയ്യ വെള്ളിയാഴ്ച തള്ളി. താൻ തന്നെ സംസ്ഥാനത്തെ നയിക്കുന്നത് തുടരുമെന്ന് അദ്ദേഹം ഉറപ്പിച്ചു പറഞ്ഞു. ബെളഗാവിയിൽ നടന്ന കർണാടക നിയമസഭാ സമ്മേളനത്തിന്റെ അവസാന ദിവസം, ഇത്തരമൊരു ക്രമീകരണം ഒരിക്കലും തീരുമാനിച്ചിട്ടില്ലെന്നും പാർട്ടി ഹൈക്കമാൻഡ് ഇക്കാര്യത്തിൽ മറ്റൊരു തീരുമാനമെടുക്കുന്നത് വരെ താൻ കർണാടക മുഖ്യമന്ത്രിയായി സേവനമനുഷ്ഠിക്കുമെന്നും സിദ്ധരാമയ്യ പ്രതിപക്ഷ നേതാക്കളോട് പറഞ്ഞു.

ആദ്യം ജനങ്ങൾ നമ്മെ അനുഗ്രഹിക്കണം. പിന്നീട് നിയമസഭാ കക്ഷി യോഗത്തിൽ എംഎൽഎമാർ നേതാവിനെ തിരഞ്ഞെടുക്കുന്നു, അതിനുശേഷം ഹൈക്കമാൻഡ് തീരുമാനിക്കുന്നു. അത്രമാത്രമേ ഞാൻ പറഞ്ഞിട്ടുള്ളൂ. ഇപ്പോഴും ഞാൻ തന്നെയാണ് മുഖ്യമന്ത്രി, ഹൈക്കമാൻഡ് മറ്റൊരു തീരുമാനമെടുക്കുന്നത് വരെ ഞാൻ മുഖ്യമന്ത്രിയായി തുടരും, അദ്ദേഹം പറഞ്ഞു.

രണ്ടര വർഷത്തെ കരാറിനെക്കുറിച്ചുള്ള കർണാടക നിയമസഭാ പ്രതിപക്ഷ നേതാവ് ആർ. അശോകിന്റെ ചോദ്യത്തിന് മറുപടിയായി, രണ്ടര വർഷത്തെക്കുറിച്ച് ഞാൻ ഒന്നും പറഞ്ഞിട്ടില്ല. രണ്ടര വർഷമെന്ന അത്തരമൊരു കരാറുമില്ല, എന്ന് സിദ്ധരാമയ്യ വ്യക്തമാക്കി.

കർണാടകയിലെ നേതൃത്വ തർക്കം

കഴിഞ്ഞ കുറച്ചു മാസങ്ങളായി കർണാടക കോൺഗ്രസിൽ സിദ്ധരാമയ്യയും ശിവകുമാറും തമ്മിൽ അധികാരത്തിനായി വടംവലി നടക്കുകയാണ്. സർക്കാർ പകുതി കാലാവധി പൂർത്തിയാക്കിയതോടെ നേതൃമാറ്റം ആവശ്യപ്പെട്ട് നിരവധി കോൺഗ്രസ് എംഎൽഎമാർ ഡൽഹിയിലെത്തിയിരുന്നു. എന്നാൽ, വിഷയം ഇരുവരും തമ്മിൽ ചർച്ച ചെയ്ത് പരിഹരിക്കാനാണ് കോൺഗ്രസ് നേതൃത്വം ആവശ്യപ്പെട്ടത്.

ഈ തർക്കം പരിഹരിക്കാനായി സിദ്ധരാമയ്യയും ശിവകുമാറും രണ്ട് തവണ പ്രഭാതഭക്ഷണത്തിനായി കൂടിക്കാഴ്ച നടത്തിയിരുന്നു. പാർട്ടി ഹൈക്കമാൻഡ് എടുക്കുന്ന തീരുമാനം തങ്ങൾ അംഗീകരിക്കുമെന്ന് ഇരുനേതാക്കളും പറഞ്ഞു. പാർട്ടിയിലെ ഐക്യം പ്രകടിപ്പിക്കുന്നതിനായി ഇരുവരും സംയുക്ത വാർത്താ സമ്മേളനവും നടത്തിയിരുന്നു.

അധികാര തർക്കത്തിൽ ബിജെപിയുടെ പ്രതികരണം

നേതൃത്വ തർക്കത്തിൽ പ്രതികരിച്ച ബിജെപി, ഇരുനേതാക്കളും തമ്മിലുള്ള പോരാട്ടത്തിൽ സംസ്ഥാനത്തിന്റെ താൽപ്പര്യങ്ങൾ അവഗണിക്കപ്പെടുകയാണെന്നും അതിനാൽ നിയമസഭയിൽ തങ്ങൾ അവിശ്വാസ പ്രമേയം കൊണ്ടുവരുമെന്നും നേരത്തെ പറഞ്ഞിരുന്നു.

മുഖ്യമന്ത്രിയും ഉപമുഖ്യമന്ത്രിയും വലിയ ഈഗോയിലാണ്. ഒരിഞ്ച് പോലും വിട്ടുകൊടുക്കാൻ ഇരുവരും തയ്യാറല്ല. അതിനാൽ മറ്റൊരു ബദലിനെക്കുറിച്ച് ചിന്തിക്കാൻ ഹൈക്കമാൻഡ് നിർബന്ധിതരായിരിക്കുകയാണ്. ഈ സാഹചര്യത്തിൽ സംസ്ഥാനത്ത് ഒരു 'ഡാർക്ക് ഹോഴ്സ്' (പ്രതീക്ഷിക്കാത്ത മറ്റൊരാൾ) ഉയർന്നുവന്നേക്കാം, ബിജെപി നേതാവും മുൻ കർണാടക മുഖ്യമന്ത്രിയുമായ ബസവരാജ് ബൊമ്മൈ പറഞ്ഞു.

---------------

Hindusthan Samachar / Roshith K