Enter your Email Address to subscribe to our newsletters
KOCHI, 20 ഡിസംബര് (H.S.)
അന്തരിച്ച നടന് ശ്രീനിവാസന്റെ സംസ്കാരം ഞായറാഴ്ച രാവിലെ പത്തുമണിക്ക് കണ്ടനാട്ടെ വസതിയില്. ഔദ്യോഗിക ബഹുമതികളോടെയാവും സംസ്കാരച്ചടങ്ങുകള്. ശനിയാഴ്ച ഉച്ചയ്ക്ക് ഒന്നുമുതല് മൂന്നുവരെ മൃതദേഹം എറണാകുളം ടൗണ്ഹാളില് പൊതുദര്ശനത്തിന് വെക്കും.
മലയാളത്തിന്റെ പ്രിയ്യപ്പെട്ട നടനും സംവിധായകനും തിരക്കഥാകൃത്തുമായ ബഹുമുഖ പ്രതിഭയ്ക്ക് അന്ത്യാഞ്ജലി അര്പ്പിക്കാന് സിനിമാ- സാംസ്കാരിക- രാഷ്ട്രീയ രംഗത്തെ പ്രമുഖര് ടൗണ്ഹാളിലേക്ക്എത്തുകയാണ്. ശനിയാഴ്ച കൊച്ചിയിലുള്ള മുഖ്യമന്ത്രി പിണറായി വിജയന് ഉച്ചയ്ക്ക് മുമ്പായി ശ്രീനിവാസന് അന്തിമോപചാരം അര്പ്പിക്കും. നടന് മമ്മൂട്ടി ശ്രീനിവാസനെ അവസാനമായി കാണാനെത്തി. ഭാര്യ സുല്ഫത്തിനൊപ്പമാണ് മമ്മൂട്ടിയെത്തിയത്.
സ്ഥലത്തില്ലാതിരുന്ന മകന് ധ്യാന് ശ്രീനിവാസന് കണ്ടനാട്ടെ വസതിയിലേക്കെത്തി. മൃതദേഹത്തിനരികിലെത്തിയ ധ്യാന് പൊട്ടിക്കരഞ്ഞു. മരണവിവരമറിഞ്ഞ മൂത്തമകന് വിനീത് ശ്രീനിവാസന് പത്തുമണിയോടെ തൃപ്പൂണിത്തുറ ജനറല് ആശുപത്രിയില് എത്തിയിരുന്നു. തുടര്ന്നാണ് മൃതദേഹം വീട്ടിലേക്ക് കൊണ്ടുവന്നത്.
ശനിയാഴ്ച രാവിലെ 8.30-ഓടെയായിരുന്നു ശ്രീനിവാസന്റെ അന്ത്യം. ഡയാലിസിസിനായി സ്വകാര്യ ആശുപത്രിയിലേക്ക് പോകും വഴി ശ്വാസംമുട്ടലുണ്ടായി. തുടര്ന്ന് തൃപ്പൂണിത്തുറ താലൂക്ക് ആശുപത്രിയില് പ്രവേശിപ്പിച്ചു. ഇവിടെവെച്ച് മരണം സ്ഥിരീകരിച്ചു. ഭാര്യ വിമല ഉള്പ്പെടെ മരണസമയത്ത് ഒപ്പമുണ്ടായിരുന്നു.
---------------
Hindusthan Samachar / Sreejith S
