Kolkata, 20 ഡിസംബര്‍ (H.S.)

കൊൽക്കത്ത (പശ്ചിമ ബംഗാൾ): പശ്ചിമ ബംഗാളിനെ 'ജംഗിൾ രാജിൽ' (കാട്ടുഭരണം) നിന്ന് മോചിപ്പിക്കണമെന്ന് പ്രധാനമന്ത്രി നരേന്ദ്ര മോദി ശനിയാഴ്ച പറഞ്ഞു. മോശം കാലാവസ്ഥയെത്തുടർന്ന് ഹെലികോപ്റ്റർ ഇറക്കാൻ കഴിയാത്തതിനാൽ കൊൽക്കത്ത വിമാനത്താവളത്തിലേക്ക് മടങ്ങേണ്ടി വന്ന പ്രധാനമന്ത്രി, വീഡിയോ കോൺഫറൻസിംഗിലൂടെയാണ് റാണാഘട്ടിലെ താഹെർപൂർ നേതാജി പാർക്കിൽ നടന്ന പൊതുസമ്മേളനത്തെ അഭിസംബോധന ചെയ്തത്.

ബീഹാറുമായി താരതമ്യം ചെയ്തുകൊണ്ട് പ്രധാനമന്ത്രി പറഞ്ഞു: ഇന്ന് രാജ്യം അതിവേഗ വികസനമാണ് ആഗ്രഹിക്കുന്നത്. വികസനത്തിനായി ബീഹാർ വീണ്ടും എൻഡിഎ സർക്കാരിന് വൻ ജനവിധി നൽകി. ബംഗാളിലെ ബിജെപിയുടെ വിജയത്തിന് ബീഹാർ വഴിയൊരുക്കിയിരിക്കുകയാണ്. 'ജംഗിൾ രാജ്' ഭരണത്തെ ബീഹാർ ഒറ്റക്കെട്ടായി തള്ളിക്കളഞ്ഞു. 20 വർഷത്തിന് ശേഷവും അവർ ബിജെപി-എൻഡിഎ സഖ്യത്തിന് മുൻപത്തേക്കാൾ കൂടുതൽ സീറ്റുകൾ നൽകി. ഇനി നമുക്ക് പശ്ചിമ ബംഗാളിലെ 'ജംഗിൾ രാജ്' അവസാനിപ്പിക്കണം.

അദ്ദേഹം കൂട്ടിച്ചേർത്തു: തൃണമൂൽ കോൺഗ്രസ് ബിജെപിയെ എതിർക്കാൻ ആഗ്രഹിക്കുന്നു. അവർ നമ്മളെ ശക്തമായും ആവർത്തിച്ചും എതിർത്തോട്ടെ. എന്നാൽ പശ്ചിമ ബംഗാളിന്റെ വികസനം എന്തിനാണ് തടസ്സപ്പെടുത്തുന്നതെന്ന് എനിക്ക് മനസ്സിലാകുന്നില്ല. നിങ്ങൾക്ക് മോദിയെ എതിർക്കാം, പക്ഷേ ബംഗാളിലെ ജനങ്ങളെ ദുഃഖിപ്പിക്കരുത്. അവരുടെ അവകാശങ്ങൾ നിഷേധിക്കരുത്. അവരുടെ സ്വപ്നങ്ങൾ തകർക്കുന്ന പാപം ചെയ്യരുത്. ബിജെപിക്ക് ഒരു അവസരം നൽകണമെന്ന് ഞാൻ പശ്ചിമ ബംഗാളിലെ ജനങ്ങളോട് വിനീതമായി അഭ്യർത്ഥിക്കുന്നു.

ഭരണമാറ്റത്തിനായി ആഹ്വാനം ചെയ്ത പ്രധാനമന്ത്രി, സംസ്ഥാനത്ത് ഒരു ഡബിൾ എൻജിൻ സർക്കാർ വേണമെന്ന ബിജെപിയുടെ ആവശ്യം ആവർത്തിച്ചു. ബംഗാളിന്റെ നഷ്ടപ്പെട്ട പ്രതാപം വീണ്ടെടുക്കാൻ കഴിയുന്ന ഒരു ബിജെപി ഡബിൾ എൻജിൻ സർക്കാർ ബംഗാളിൽ വരണമെന്ന് ഞങ്ങൾ ആഗ്രഹിക്കുന്നു. ഇന്നും പശ്ചിമ ബംഗാളിലെ കോടിക്കണക്കിന് രൂപയുടെ വികസന പദ്ധതികൾ മുടങ്ങിക്കിടക്കുകയാണ്, അദ്ദേഹം പറഞ്ഞു.

രാഷ്ട്രീയ എതിർപ്പുകളോട് ബിജെപിക്ക് വിയോജിപ്പില്ലെന്നും എന്നാൽ തൃണമൂൽ കോൺഗ്രസ് നയിക്കുന്ന സംസ്ഥാന സർക്കാർ വികസനത്തെ തടസ്സപ്പെടുത്തുകയാണെന്നും പ്രധാനമന്ത്രി കുറ്റപ്പെടുത്തി. മമത ബാനർജിക്ക് വേണമെങ്കിൽ മോദിയെ എതിർക്കാം, ബിജെപിയെ എതിർക്കാം, അതിൽ കുഴപ്പമില്ല. പക്ഷേ എന്തിനാണ് അവർ ബംഗാളിന്റെ വികസനത്തെ തടസ്സപ്പെടുത്തുന്നത്? അദ്ദേഹം ചോദിച്ചു.

പശ്ചിമ ബംഗാളിലെ നുഴഞ്ഞുകയറ്റക്കാരെ തൃണമൂൽ കോൺഗ്രസ് സംരക്ഷിക്കുകയാണെന്നും പ്രധാനമന്ത്രി ആരോപിച്ചു. നിയമവിരുദ്ധമായ നുഴഞ്ഞുകയറ്റത്തെ എതിർക്കുന്നതിന് പകരം തനിക്കെതിരെ മുദ്രാവാക്യം വിളിക്കുകയാണ് പാർട്ടി ചെയ്യുന്നതെന്ന് അദ്ദേഹം പറഞ്ഞു. സംസ്ഥാനത്തിന്റെ നിയന്ത്രണം ഏറ്റെടുക്കാൻ ലക്ഷ്യമിടുന്ന നുഴഞ്ഞുകയറ്റക്കാരെ സംരക്ഷിക്കാനാണ് സ്പെഷ്യൽ ഇൻ്റൻസീവ് റിവിഷൻ (SIR) നടപടികളെ ടിഎംസി എതിർക്കുന്നതെന്നും അദ്ദേഹം ആരോപിച്ചു.

ബംഗാളിൽ 'നുഴഞ്ഞുകയറ്റക്കാരെ പുറത്താക്കൂ' എന്ന് പറയുന്നതിന് പകരം 'മോദി മടങ്ങിപ്പോകൂ' എന്ന മുദ്രാവാക്യമാണ് തൃണമൂൽ കോൺഗ്രസ് ഉയർത്തുന്നത്. ബംഗാൾ കൈക്കലാക്കാൻ ലക്ഷ്യമിടുന്ന നുഴഞ്ഞുകയറ്റക്കാർ ടിഎംസിക്ക് പ്രിയപ്പെട്ടവരാണ്. അതുകൊണ്ടാണ് നുഴഞ്ഞുകയറ്റക്കാരെ സംരക്ഷിക്കാൻ തൃണമൂൽ കോൺഗ്രസ് എസ്‌ഐആർ-നെ (SIR) എതിർക്കുന്നത്, അദ്ദേഹം പറഞ്ഞു.

കേന്ദ്രസർക്കാരിന്റെ എല്ലാവരെയും ഉൾക്കൊള്ളുന്ന വികസനത്തെക്കുറിച്ച് സംസാരിക്കവേ മോദി പറഞ്ഞു: പശ്ചിമ ബംഗാളിലെ ദീർഘകാലമായി അവഗണിക്കപ്പെട്ട കോണുകൾ പോലും വികസിപ്പിക്കാനാണ് ഞങ്ങളുടെ സർക്കാർ ശ്രമിക്കുന്നത്. 3,200 കോടി രൂപയുടെ വിവിധ വികസന പദ്ധതികളുടെ ഉദ്ഘാടനവും പ്രധാനമന്ത്രി നിർവഹിച്ചു.

ദേശീയപാത 34-ലെ ബാരജഗുലി-കൃഷ്ണനഗർ വിഭാഗത്തിലെ 66.7 കിലോമീറ്റർ വരുന്ന നാലുവരിപ്പാതയുടെ ഉദ്ഘാടനവും കൊൽക്കത്തയെയും സിലിഗുരിയെയും ബന്ധിപ്പിക്കുന്ന എൻഎച്ച്-34-ന്റെ ബാരാസത്-ബാരജഗുലി ഭാഗം നാലുവരിയാക്കുന്നതിനുള്ള തറക്കല്ലിടലും ഇതിൽ ഉൾപ്പെടുന്നു.

---------------

Hindusthan Samachar / Roshith K