Newdelhi , 20 ഡിസംബര്‍ (H.S.)

ന്യൂഡൽഹി: കോൺഗ്രസ് നേതാവും ലോക്‌സഭയിലെ പ്രതിപക്ഷ നേതാവുമായ രാഹുൽ ഗാന്ധി തന്റെ വിദേശ സന്ദർശന വേളയിൽ ഇന്ത്യയെ അപകീർത്തിപ്പെടുത്തുകയാണെന്നും ഭാരത വിരുദ്ധ ശക്തികളുമായി ചേർന്ന് ദേശീയ താൽപ്പര്യങ്ങൾക്ക് വിരുദ്ധമായ പ്രവർത്തനങ്ങളിൽ ഏർപ്പെടുകയാണെന്നും ബിജെപി നേതാവ് ഗൗരവ് ഭാട്ടിയ ശനിയാഴ്ച ആരോപിച്ചു.

ഡൽഹിയിൽ വാർത്താ സമ്മേളനത്തെ അഭിസംബോധന ചെയ്ത് സംസാരിക്കവേ ഭാട്ടിയ പറഞ്ഞു: വിദേശ മണ്ണിൽ പോയി ഇന്ത്യയെ അപകീർത്തിപ്പെടുത്തുക, ഭാരത വിരുദ്ധ ശക്തികളുമായി കൂടിക്കാഴ്ച നടത്തുക - ഇതൊക്കെ ചെയ്യുന്നത് മറ്റാരുമല്ല, ഇന്ത്യയുടെ ലോക്‌സഭയിലെ പ്രതിപക്ഷ നേതാവായ രാഹുൽ ഗാന്ധിയാണ്. ഇത് അങ്ങേയറ്റം ആശങ്കാജനകമാണ്, ഇന്ത്യൻ പൗരന്മാർ ഇതിൽ പ്രകോപിതരുമാണ്.

പാർലമെന്റ് സമ്മേളനങ്ങൾ നടക്കുമ്പോൾ രാഹുൽ ഗാന്ധി പലപ്പോഴും വിദേശയാത്ര നടത്താറുണ്ടെന്നും അദ്ദേഹത്തിന്റെ നിലവിലെ ജർമ്മനി സന്ദർശനം ഇതിന് ഉദാഹരണമാണെന്നും ബിജെപി നേതാവ് കൂട്ടിച്ചേർത്തു. സമ്മേളനം നടക്കുമ്പോൾ പാർലമെന്റിൽ ഉണ്ടാകേണ്ട പ്രാഥമിക ഉത്തരവാദിത്തമുള്ള പ്രതിപക്ഷ നേതാവ് വിദേശ മണ്ണിലേക്ക് പോയി. അവിടെ അദ്ദേഹം ഹെർട്ടി സ്കൂളിൽ (Hertie School) പോവുകയും പ്രൊഫ. ഡോ. കൊർണേലിയ വോളിനെ (Prof. Dr. Cornelia Woll) കാണുകയും ചെയ്തു. ഇത് അദ്ദേഹത്തിന്റെ അജണ്ടയെക്കുറിച്ചും ഉദ്ദേശ്യങ്ങളെക്കുറിച്ചും ചോദ്യങ്ങൾ ഉയർത്തുന്നു, ഭാട്ടിയ പറഞ്ഞു.

ഭാരത വിരുദ്ധ പ്രവർത്തനങ്ങളുമായി ബന്ധമുണ്ടെന്ന് ആരോപിക്കപ്പെടുന്ന ഓപ്പൺ സൊസൈറ്റി ഫൗണ്ടേഷൻ, സെൻട്രൽ യൂറോപ്യൻ യൂണിവേഴ്സിറ്റി എന്നിവയെ പരാമർശിച്ച് രാഹുൽ ഗാന്ധിയും ജോർജ്ജ് സോറോസും തമ്മിൽ ബന്ധമുണ്ടെന്നും അദ്ദേഹം ആരോപിച്ചു.

രാഹുൽ ഗാന്ധിയും ജോർജ്ജ് സോറോസും രണ്ട് ശരീരവും ഒരു ആത്മാവും (ദോ ജിസ്മ്, ഏക് ജാൻ) പോലെയാണ്. ഇപ്പോൾ അതിന് മറ്റൊരു തെളിവ് കൂടി പുറത്തുവന്നിരിക്കുന്നു. രാഹുൽ ഗാന്ധി ഇത്തരത്തിലുള്ള ഭാരത വിരുദ്ധ പ്രവർത്തനങ്ങളിൽ ഏർപ്പെടുന്നത് ഇത് ആദ്യമായല്ല, ഭാട്ടിയ കൂട്ടിച്ചേർത്തു.

അദ്ദേഹം വിദേശ മണ്ണിൽ പോയി ഇന്ത്യയുടെ ശത്രുക്കളുമായും, ഇന്ത്യയോട് അസൂയയുള്ളവരുമായും, നമ്മുടെ അഖണ്ഡതയെ ആക്രമിക്കുന്നവരുമായും കൂടിക്കാഴ്ച നടത്തുകയും സംവദിക്കുകയും ചെയ്യുന്നു. പ്രതിപക്ഷ നേതാവ് ഇത്തരം ശക്തികളുമായി ചേർന്ന് ഇന്ത്യക്കെതിരെ ഗൂഢാലോചന നടത്തുന്നത് എന്ത് തരം ഭാരത വിരുദ്ധ അജണ്ടയാണ്? ഭാട്ടിയ ചോദിച്ചു.

രാഹുൽ ഗാന്ധിയുടെ ജർമ്മനി സന്ദർശനത്തിന്റെ പശ്ചാത്തലത്തിലാണ് അദ്ദേഹത്തിന്റെ ഈ പരാമർശങ്ങൾ. പാർലമെന്റിന്റെ ശീതകാല സമ്മേളനത്തിനിടെ പ്രഖ്യാപിച്ച രാഹുലിന്റെ അഞ്ച് ദിവസത്തെ സന്ദർശനത്തെ ബിജെപി നേതാക്കൾ വ്യാപകമായി വിമർശിച്ചിരുന്നു. രാഹുൽ ഗാന്ധിയുടെ ഇടയ്ക്കിടെയുള്ള യാത്രകൾ രാജ്യത്തോടുള്ള അദ്ദേഹത്തിന്റെ അർപ്പണബോധത്തെ ചോദ്യം ചെയ്യുന്നുവെന്നും അവർ ആരോപിക്കുന്നു. രാഹുലിന്റെ ജർമ്മനി സന്ദർശനം ഇന്ന് അവസാനിക്കും.

---------------

Hindusthan Samachar / Roshith K