Enter your Email Address to subscribe to our newsletters
Kochi, 22 ഡിസംബര് (H.S.)
ലഹരി ഉപയോഗിച്ചതായി കണ്ടെത്താന് കഴിയാത്തതിനെ തുടര്ന്ന് നടന് ഷൈന് ടോം ചാക്കോയെ പ്രതിപ്പട്ടികയില് നിന്ന് ഒഴിവാക്കി കോടതിയില് റിപ്പോര്ട്ട് നല്കും. ഫോറന്സിക് റിപ്പോര്ട്ടിന്റെ അടിസ്ഥാനത്തില് കേസ് നിലനില്ക്കില്ലെന്നാണ് പൊലീസിന് ലഭിച്ച നിയമോപദേശം. കേസില് തെളിവുകള് കണ്ടെത്താന് കഴിയാത്തതിനാല് പൊലീസ് കോടതിയില് റിപ്പോര്ട്ട് സമര്പ്പിക്കും. പൊലീസിന് കനത്ത തിരിച്ചടിയാണ് ഉണ്ടായത്. ഹോട്ടലില് മുറിയെടുത്ത് ഷൈനും സുഹൃത്തും ലഹരി ഉപയോഗിച്ചുവെന്നാണ് കേസ്.
ഫോറന്സിക് റിപ്പോര്ട്ട് ഇന്നലെ പുറത്തുവന്നിരുന്നു. ഷൈന് ടോം ചാക്കോ ലഹരി ഉപയോഗിച്ചുവെന്ന് ഫോറന്സിക് പരിശോധനയില് തെളിയിക്കാനായില്ല. ഡാന്സാഫ് പരിശോധനയ്ക്കിടെ ഷൈന് ടോം ചാക്കോ ഹോട്ടല് മുറിയില് നിന്ന് ഇറങ്ങി ഓടിയത് വിവാദമായിരുന്നു. കേരളത്തില് ഏറെ കോളിളക്കം ഉണ്ടാക്കിയ കേസായിരുന്നു ഇത്. ഷൈന് ടോം ചാക്കോയെ മണിക്കൂറുകളോളം ചോദ്യം ചെയ്തിരുന്നു. കഴിഞ്ഞ ഏപ്രിലില് പൊലീസിന്റെ ലഹരി പരിശോധനയ്ക്കിടെ നടന് ഷൈന് ടോം ചാക്കോ എറണാകുളം നോര്ത്തിലെ ഹോട്ടല് മുറിയില് നിന്നും ഇറങ്ങി ഓടി രക്ഷപ്പെടുകയായിരുന്നു എന്നായിരുന്നു പൊലീസ് പറയുന്നത്. ഓപ്പറേഷന് ഡി ഹണ്ടിന്റെ ഭാഗമായിട്ടായിരുന്നു പരിശോധന. നടന് ഷൈന് ടോം ചാക്കോയുടെ മുറിയില് ലഹരി ഉപയോഗം നടക്കുന്നുവെന്ന രഹസ്യവിവരം ലഭിച്ചതിന്റെ അടിസ്ഥാനത്തിലാണ് ഡാന്സാഫ് സംഘം കൊച്ചിയിലെ സ്വകാര്യ ഹോട്ടലിലെത്തിയത്. പൊലീസ് സംഘം ഹോട്ടലിന്റെ താഴെ എത്തിയ വിവരം അറിഞ്ഞ ഷൈന് ടോം ചാക്കോ ഹോട്ടലിന്റെ മൂന്നാം നിലയിലെ മുറിയില് നിന്നും ജനല് വഴി ഇറങ്ങി ഓടി രക്ഷപ്പെട്ടുവെന്നായിരുന്നു.
---------------
Hindusthan Samachar / Sreejith S
