Kerala, 22 ഡിസംബര്‍ (H.S.)

ആലപ്പുഴ: മാവേലിക്കര വിഎസ്‌എം ആശുപത്രിയിൽ ശസ്ത്രക്രിയയ്‌ക്കിടെ യുവതി മരിച്ചു. തൃക്കുന്നപ്പുഴ സ്വദേശി ധന്യ (39) ആണ് മരിച്ചത്. വൃക്കയിലെ കല്ല് മാറ്റുന്നതിനായുള്ള ശസ്ത്രക്രിയയ്ക്കിടെയാണ് മരണം. പിന്നാലെ ചികിത്സാപ്പിഴവ് ആരോപിച്ച് യുവതിയുടെ ബന്ധുക്കൾ ആശുപത്രിയിൽ പ്രതിഷേധിച്ചു. കുടുംബം പൊലീസിൽ പരാതിയും നൽകി. പോസ്റ്റുമോർട്ടത്തിനുശേഷം തുടർനടപടികൾ സ്വീകരിക്കുമെന്നാണ് പൊലീസ് അറിയിച്ചത്. അതേസമയം,​ ചികിത്സാപ്പിഴവ് ഉണ്ടായിട്ടില്ലെന്നാണ് ആശുപത്രി അധികൃതർ പറയുന്നത്. കീഹോൾ ശസ്ത്രക്രിയയ്ക്കാണ് ബന്ധുക്കൾ ഒപ്പിട്ട് നൽകിയത്. ശസ്ത്രക്രിയ തുടങ്ങിയതിന് പിന്നാലെ രക്തക്കുഴലിൽ രക്തസ്രാവമുണ്ടായി. തുട‌ർന്ന് ഓപ്പൺ സർജറിക്ക് വിധേയയാക്കി. ഈ ശസ്ത്രക്രിയ പൂർത്തിയാക്കിയതിനുശേഷമാണ് മരണം സംഭവിച്ചത്. ഹൃദയാഘാതമാണ് മരണകാരണമെന്നും ഡോക്‌ടർമാർ അറിയിച്ചു.

കഴിഞ്ഞ ഏതാനും മാസങ്ങളായി നിരവധി നിരവധി മെഡിക്കൽ നെഗ്‌ളിജൻസ് കേസുകളാണ് കേരളത്തിൽ റിപ്പോർട്ട് ചെയ്തിട്ടുള്ളത്.

സമീപകാലത്തെ പ്രധാന കേസുകൾ (2025)

പാലക്കാട് ഒമ്പതുവയസ്സുകാരിയുടെ കൈ മുറിച്ചുമാറ്റിയ സംഭവം (ഒക്ടോബർ 2025): ഒടിവിനെത്തുടർന്ന് പാലക്കാട് ജില്ലാ ആശുപത്രിയിൽ ചികിത്സ തേടിയ പെൺകുട്ടിയുടെ വലതുകൈ കോഴിക്കോട് മെഡിക്കൽ കോളേജിൽ വെച്ച് മുറിച്ചുമാറ്റേണ്ടി വന്നു. മുറിവിൽ കെട്ടിയ പാൻഡേജ് അമിതമായി മുറുകിയതിനെ തുടർന്ന് രക്തയോട്ടം നിലച്ചതാണ് (Compartment Syndrome) ഇതിന് കാരണമായതെന്ന് പ്രാഥമിക അന്വേഷണത്തിൽ കണ്ടെത്തി. സംഭവത്തിൽ രണ്ട് ഡോക്ടർമാരെ സസ്പെൻഡ് ചെയ്തു.

തിരുവനന്തപുരം മെഡിക്കൽ കോളേജിലെ ഹൃദ്രോഗിയുടെ മരണം (നവംബർ 2025): ചികിത്സ കിട്ടാതെ അഞ്ച് ദിവസം തറയിൽ കിടക്കേണ്ടി വന്നുവെന്ന് ആരോപിച്ച് വേണു എന്ന രോഗി മരണത്തിന് മുൻപ് അയച്ച ശബ്ദസന്ദേശം വലിയ വിവാദമായി. ആൻജിയോഗ്രാം വൈകിയതാണ് മരണകാരണമെന്ന് ബന്ധുക്കൾ ആരോപിക്കുമ്പോൾ, ഡോക്ടർമാർക്ക് ക്ലീൻ ചിറ്റ് നൽകിയ മെഡിക്കൽ വിദ്യാഭ്യാസ വകുപ്പിന്റെ റിപ്പോർട്ട് കുടുംബം തള്ളി.

ശരീരത്തിൽ ഗൈഡ് വയർ മറന്നുവെച്ച സംഭവം (സെപ്റ്റംബർ 2025): തിരുവനന്തപുരം ജനറൽ ആശുപത്രിയിൽ രണ്ട് വർഷം മുമ്പ് തൈറോയ്ഡ് ശസ്ത്രക്രിയ നടത്തിയ സ്ത്രീയുടെ ശരീരത്തിൽ ഗൈഡ് വയർ മറന്നുവെച്ചതായി കണ്ടെത്തി. ശ്വാസതടസ്സത്തെത്തുടർന്ന് നടത്തിയ പരിശോധനയിലാണ് ഇത് ശ്രദ്ധയിൽപ്പെട്ടത്. സംഭവത്തിൽ സർജനെതിരെ കേസെടുത്തു.

മാറി കുത്തിവെപ്പ് എടുത്ത സംഭവം (നവംബർ 2025): തിരുവനന്തപുരം മെഡിക്കൽ കോളേജിൽ ചികിത്സയിലിരുന്ന രോഗിയുടെ കണ്ണിന് മാറി കുത്തിവെപ്പ് നൽകിയതായി അന്വേഷണത്തിൽ സ്ഥിരീകരിച്ചു. ഇത് മറച്ചുവെക്കാൻ മെഡിക്കൽ രേഖകളിൽ തിരുത്തൽ വരുത്തിയതായും ആരോപണമുണ്ട്.

ഗർഭപാത്രം നീക്കം ചെയ്യുന്നതിനിടെ മരണം (മാർച്ച് 2025): കോഴിക്കോട് മെഡിക്കൽ കോളേജിൽ ഗർഭപാത്രം നീക്കം ചെയ്യാനുള്ള ശസ്ത്രക്രിയയ്ക്കിടെ കുടലിലുണ്ടായ സുഷിരം കാരണം അണുബാധയേറ്റ് (Sepsis) 57-കാരി മരിച്ചു. ചികിത്സാ പിഴവാണെന്ന് കാട്ടി കുടുംബം പരാതി നൽകി.

---------------

Hindusthan Samachar / Roshith K