Geneva , 23 ഡിസംബര്‍ (H.S.)

ജനീവ: ബംഗ്ലാദേശിൽ ഹിന്ദു യുവാവ് ആൾക്കൂട്ട കൊലപാതകത്തിന് ഇരയായ സംഭവത്തിൽ ഐക്യരാഷ്ട്രസഭ (UN) കടുത്ത ആശങ്ക രേഖപ്പെടുത്തി. അയൽരാജ്യത്ത് തുടരുന്ന അക്രമ സംഭവങ്ങൾ അവസാനിപ്പിക്കണമെന്നും ന്യൂനപക്ഷങ്ങളുടെ സുരക്ഷ ഉറപ്പാക്കണമെന്നും യുഎൻ മനുഷ്യാവകാശ മേധാവി വോൾക്കർ ടർക്ക് ആവശ്യപ്പെട്ടു.

മൈമെൻസിംഗ് (Mymensingh) നഗരത്തിൽ കഴിഞ്ഞ വ്യാഴാഴ്ചയാണ് ദീപു ചന്ദ്ര ദാസ് എന്ന 25-കാരൻ ക്രൂരമായി കൊല്ലപ്പെട്ടത്. മതനിന്ദ ആരോപിച്ചാണ് ഒരു സംഘം ആളുകൾ യുവാവിനെ മർദ്ദിച്ചുകൊന്നത്. തുടർന്ന് മൃതദേഹം മരത്തിൽ കെട്ടിത്തൂക്കി കത്തിച്ചതായും റിപ്പോർട്ടുകളുണ്ട്. ഈ സംഭവത്തിൽ ഇതിനോടകം 12 പേരെ ബംഗ്ലാദേശ് പോലീസ് അറസ്റ്റ് ചെയ്തിട്ടുണ്ട്.

ഈ ക്രൂരമായ കൊലപാതകത്തെ 'ഭയാനകമായ പ്രവൃത്തി' എന്ന് വിശേഷിപ്പിച്ച ഇന്ത്യൻ വിദേശകാര്യ മന്ത്രാലയം, ബംഗ്ലാദേശിലെ ന്യൂനപക്ഷങ്ങളുടെ സുരക്ഷയിൽ ശക്തമായ ഉൽക്കണ്ഠ അറിയിച്ചു. സംഭവത്തിൽ നിഷ്പക്ഷവും സുതാര്യവുമായ അന്വേഷണം വേണമെന്ന് ഐക്യരാഷ്ട്രസഭയും ആവശ്യപ്പെട്ടിട്ടുണ്ട്. പ്രതികാര നടപടികൾ വിഭജനം വർദ്ധിപ്പിക്കുകയേ ഉള്ളൂവെന്നും നിയമവാഴ്ച ഉറപ്പാക്കണമെന്നും വോൾക്കർ ടർക്ക് പ്രസ്താവനയിൽ പറഞ്ഞു.

അതേസമയം, ബംഗ്ലാദേശിൽ ഹിന്ദുക്കൾക്ക് നേരെ നടക്കുന്ന അതിക്രമങ്ങളിൽ പ്രതിഷേധിച്ച് കൊൽക്കത്തയിൽ വൻ പ്രതിഷേധ പ്രകടനങ്ങൾ നടന്നു. പശ്ചിമ ബംഗാൾ പ്രതിപക്ഷ നേതാവ് സുവേന്ദു അധികാരിയുടെ നേതൃത്വത്തിൽ കൊൽക്കത്തയിലെ ബംഗ്ലാദേശ് ഡെപ്യൂട്ടി ഹൈക്കമ്മീഷന് മുന്നിൽ പ്രതിഷേധം സംഘടിപ്പിച്ചു. ബംഗ്ലാദേശിലെ ഹിന്ദുക്കളുടെ ജീവനും സ്വത്തിനും സംരക്ഷണം നൽകണമെന്നും അക്രമികളെ മാതൃകാപരമായി ശിക്ഷിക്കണമെന്നും പ്രതിഷേധക്കാർ ആവശ്യപ്പെട്ടു.

നിലവിലെ സംഘർഷാവസ്ഥ പരിഗണിച്ച് ധാക്കയിലെയും ചിറ്റഗോംഗിലെയും ഇന്ത്യൻ വിസ ആപ്ലിക്കേഷൻ സെന്ററുകളുടെ പ്രവർത്തനം താൽക്കാലികമായി നിർത്തിവെച്ചിരിക്കുകയാണ്. സുരക്ഷാ കാരണങ്ങളാലാണ് ഈ തീരുമാനമെന്ന് അധികൃതർ വ്യക്തമാക്കി.

---------------

Hindusthan Samachar / Roshith K