Enter your Email Address to subscribe to our newsletters
Kerala, 23 ഡിസംബര് (H.S.)
കൊച്ചി: അഞ്ച് വര്ഷക്കാലം നഗരസഭയിലെ പ്രതിപക്ഷ പ്രതിഷേധങ്ങളെ ഏകോപിപ്പിക്കുകയും മുന്നിരയില് നില്ക്കുകയും ചെയ്ത കെപിസിസി ജനറല് സെക്രട്ടറി ദീപ്തി മേരി വര്ഗീസ് കൊച്ചിയുടെ മേയറായില്ല. ടേം വ്യവസ്ഥയില് നറുക്ക് വീണത് അഡ്വക്കേറ്റ് വി.കെ മിനിമോള്ക്കും ഷൈനി മാത്യുവിനുമാണ്. കൊച്ചിയില് അധികാരത്തിലേക്ക് മടങ്ങിയെത്താനായതിന് പിന്നില് ലത്തീന് സഭയുടെ വലിയ പിന്തുണയുണ്ടായിരുന്നു. അതുകൊണ്ട് തന്നെ നിയമസഭാ തിരഞ്ഞെടുപ്പിന് മാസങ്ങള് മാത്രം ബാക്കി നില്ക്കെ സഭയെ പിണക്കുന്നത് ബുദ്ധിയല്ലെന്ന തീരുമാനമാണ് ദീപ്തിക്ക് തിരിച്ചടിയായത്.
മേയര് സ്ഥാനത്തേക്ക് പരിഗണിക്കാത്തതില് ദീപ്തിക്ക് കടുത്ത അതൃപ്തിയുണ്ട്. എന്നാല് അടുത്ത വര്ഷം നടക്കുന്ന നിയമസഭാ തിരഞ്ഞെടുപ്പില് ദീപ്തിക്ക് ജയസാദ്ധ്യതയുള്ള ഒരു സീറ്റ് നല്കാമെന്ന ഉറപ്പാണ് ഇപ്പോള് പാര്ട്ടി നല്കിയിരിക്കുന്നത്. അതുപോലെ തന്നെ സംഘടനാ രംഗത്തും കൂടുതല് ഉയര്ന്ന പദവിയും നിലവില് കെപിസിസി ജനറല് സെക്രട്ടറിയായ ദീപ്തിക്ക് പാര്ട്ടി നല്കിയേക്കും.
---------------
Hindusthan Samachar / Roshith K
