Enter your Email Address to subscribe to our newsletters
Kerala, 23 ഡിസംബര് (H.S.)
കൊച്ചി നഗരസഭയിലെ മേയര് സ്ഥാനാര്ത്ഥിയായി വി കെ മിനി മോളെ പ്രഖ്യാപിച്ച് കോണ്ഗ്രസ്. ഡിസംബര് 26ന് നടക്കുന്ന മേയര്, ഡെപ്യൂട്ടി മേയര് തെരഞ്ഞെടുപ്പില് ഇന്ത്യന് നാഷണല് കോണ്ഗ്രസിന്റെ പ്രതിനിധികളായി വി കെ മിനി മോളും ദീപക് ജോയിയും മത്സരിക്കുമെന്ന് ഡിസിസി പ്രസിഡന്റ് മുഹമ്മദ് ഷിയാസ് പ്രഖ്യാപിച്ചു. ആദ്യ രണ്ടര വര്ഷം വികെ മിനിമോളും ദീപക് ജോയിയും പിന്നീട് വരുന്ന രണ്ടര വര്ഷക്കാലം മേയറായി ഷൈനി മാത്യുവും ഡെപ്യൂട്ടി മേയറായി കെ വി പി കൃഷ്ണകുമാറിനെയും തീരുമാനിച്ചു.
മേയറാകും എന്ന് കരുതിയിരുന്ന ദീപ്തി മേരി വര്ഗീസിനെ കോണ്ഗ്രസ് തഴഞ്ഞു. എല്ലാത്തരം പരിഗണനകള്ക്കും ശേഷമാണ് മേയറെ തീരുമാനിച്ചതെന്നും ദീപ്തി മേരി വര്ഗീസിന്റെ പരാതിയെക്കുറിച്ച് അറിയില്ലെന്നും മുഹമ്മദ് ഷിയാസ് കൂട്ടിച്ചേര്ത്തു. ഒറ്റക്കെട്ടായി മുന്നോട്ടുപോകുമെന്ന് നിയുക്ത മേയര് മിനിമോളും പ്രതികരിച്ചു.
തീരുമാനത്തിനെതിരെ ദീപ്തി മേരി വര്ഗീസ് കെപിസിസി അധ്യക്ഷന് പരാതി നല്കി. കെപിസിസി സര്ക്കുലര് തെറ്റിച്ചാണ് മേയറെ തെരഞ്ഞെടുത്തതെന്നാണ് ദീപ്തിയുടെ ആരോപണം. കെപിസിസിയുടെ നിരീക്ഷകന് എത്തി കൗണ്സിലര്മാരെ കേള്ക്കണം എന്നാണ് സര്ക്കുലറില് ഉള്ളത്. അതില് കൂടുതല് പേര് അനുകൂലിക്കുന്ന ആളെ മേയര് ആക്കണം എന്നാണ് വ്യവസ്ഥ. ഗ്രൂപ്പ് നേതാക്കളായ ഡൊമിനിക് പ്രസന്റേഷനും എന് വേണുഗോപാലുമാണ് കൗണ്സിലര്മാരെ കേട്ടത്. അവര് പുറത്ത് പറഞ്ഞ കണക്ക് അവിശ്വസനീയമാണെന്നും ദീപ്തി മേരി വര്ഗീസ് പറയുന്നു.
---------------
Hindusthan Samachar / Sreejith S
