Begusaray , 27 ഡിസംബര്‍ (H.S.)

ബെഗുസാരായ് (ബീഹാർ): പശ്ചിമ ബംഗാൾ മുഖ്യമന്ത്രി മമത ബാനർജി രാജ്യത്തെ ബംഗ്ലാദേശി നുഴഞ്ഞുകയറ്റക്കാരെ പിന്തുണയ്ക്കുകയാണെന്ന് കേന്ദ്രമന്ത്രി ഗിരിരാജ് സിംഗ് ശനിയാഴ്ച കുറ്റപ്പെടുത്തി. ബംഗ്ലാദേശിൽ രണ്ട് ഹിന്ദു പുരുഷന്മാർ അടുത്തിടെ കൊല്ലപ്പെട്ടതിന്റെ പശ്ചാത്തലത്തിൽ, ന്യൂനപക്ഷങ്ങൾക്കെതിരായ അതിക്രമങ്ങളിൽ ആശങ്ക പ്രകടിപ്പിക്കവെയാണ് ഗിരിരാജ് സിംഗിന്റെ വിമർശനം.

മമത ബാനർജി രാഷ്ട്രീയ ലാഭത്തിനായി ബംഗാളിനെ ബംഗ്ലാദേശാക്കി മാറ്റാൻ ആഗ്രഹിക്കുന്നു. ഒരു വശത്ത് ബംഗ്ലാദേശിൽ ഹിന്ദുക്കൾ പീഡിപ്പിക്കപ്പെടുന്നു; മറുവശത്ത് മമത ബാനർജി ബംഗ്ലാദേശി നുഴഞ്ഞുകയറ്റക്കാർക്ക് തൊഴിൽ നൽകുന്നു. ഇതിനെക്കുറിച്ച് അന്വേഷണം നടത്തണം... അവർക്ക് ബംഗ്ലാദേശികളുടെ മുഖ്യമന്ത്രിയാകാനാണ് താല്പര്യം, അദ്ദേഹം പറഞ്ഞു.

ബംഗ്ലാദേശിലെ ന്യൂനപക്ഷങ്ങൾക്കെതിരായ ആക്രമണങ്ങളുടെ പശ്ചാത്തലത്തിൽ, പശ്ചിമ ബംഗാളിലെ അനധികൃത കുടിയേറ്റക്കാർക്കെതിരെ തൃണമൂൽ കോൺഗ്രസ് (ടിഎംസി) എന്ത് നടപടിയാണ് സ്വീകരിക്കുന്നതെന്ന് ബിജെപി വക്താവ് നളിൻ കോഹ്‌ലിയും ചോദിച്ചു. ബംഗ്ലാദേശികളെയും രോഹിങ്ക്യകളെയും പുറത്താക്കാൻ തങ്ങൾ എന്ത് ചെയ്യുന്നുവെന്ന് ടിഎംസി രാജ്യത്തെ അറിയിക്കണമെന്ന് അദ്ദേഹം ആവശ്യപ്പെട്ടു.

ബംഗ്ലാദേശിൽ രണ്ട് ഹിന്ദുക്കൾ കൊല്ലപ്പെട്ടതിനെത്തുടർന്ന് ഇന്ത്യയിൽ വലിയ രാഷ്ട്രീയ പ്രതിഷേധങ്ങൾ പൊട്ടിപ്പുറപ്പെട്ടിരുന്നു. കൊൽക്കത്തയിലും അസമിലും അയൽരാജ്യത്തെ സർക്കാരിന്റെ ഉത്തരവാദിത്തം ആവശ്യപ്പെട്ട് പ്രതിഷേധങ്ങൾ നടന്നു. ന്യൂനപക്ഷങ്ങൾക്കെതിരായ, പ്രത്യേകിച്ച് ഹിന്ദുക്കൾക്കെതിരായ അതിക്രമങ്ങൾ അവസാനിപ്പിക്കണമെന്ന് ആവശ്യപ്പെട്ട് വെള്ളിയാഴ്ച കൊൽക്കത്തയിൽ വൻ പ്രതിഷേധ പ്രകടനങ്ങൾ നടന്നിരുന്നു.

ബംഗ്ലാദേശിലെ ഹിന്ദുക്കൾ, ക്രിസ്ത്യാനികൾ, ബുദ്ധമതക്കാർ എന്നിവരുൾപ്പെടെയുള്ള മതന്യൂനപക്ഷങ്ങൾക്കെതിരായ ആവർത്തിച്ചുള്ള അക്രമ സംഭവങ്ങളിൽ ഇന്ത്യ ഗൗരവമായ ആശങ്ക അറിയിച്ചിട്ടുണ്ട്. അയൽരാജ്യത്തെ സാഹചര്യം സൂക്ഷ്മമായി നിരീക്ഷിച്ചുവരികയാണെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ ന്യൂഡൽഹിയിൽ പറഞ്ഞു. ബംഗ്ലാദേശിലെ ഇടക്കാല സർക്കാരിന്റെ കാലയളവിൽ ന്യൂനപക്ഷങ്ങൾക്കെതിരെ 2,900-ലധികം അക്രമ സംഭവങ്ങൾ രേഖപ്പെടുത്തിയിട്ടുണ്ടെന്ന് വിദേശകാര്യ മന്ത്രാലയം ചൂണ്ടിക്കാട്ടി. കൊലപാതകം, തീവെപ്പ്, ഭൂമി കൈയേറ്റം എന്നിവ ഇതിൽ ഉൾപ്പെടുന്നു. ഇവയെ വെറും മാധ്യമ പെരുപ്പിച്ചു കാട്ടലായോ രാഷ്ട്രീയ അക്രമങ്ങളായോ തള്ളിക്കളയാനാവില്ലെന്ന് വക്താവ് വ്യക്തമാക്കി.

ബംഗ്ലാദേശിലെ ഹിന്ദു, ക്രിസ്ത്യൻ, ബുദ്ധ മതവിഭാഗങ്ങളുടെ സുരക്ഷ ഉറപ്പാക്കണമെന്ന് ഇന്ത്യ ആഗോള വേദികളിൽ ആവശ്യപ്പെട്ടിട്ടുണ്ട്. അക്രമ സംഭവങ്ങളെ വെറും മാധ്യമ അതിശയോക്തി എന്ന് പറഞ്ഞ് തള്ളിക്കളയാൻ സാധിക്കില്ലെന്നും കൃത്യമായ തെളിവുകൾ ഉണ്ടെന്നും ഇന്ത്യ വ്യക്തമാക്കി.

നിലവിൽ അതിർത്തി പ്രദേശങ്ങളിൽ സുരക്ഷ വർധിപ്പിച്ചിട്ടുണ്ട്. ബംഗ്ലാദേശിലെ സ്ഥിതിഗതികൾ ഇന്ത്യ അതീവ ജാഗ്രതയോടെയാണ് നിരീക്ഷിക്കുന്നത്.

---------------

Hindusthan Samachar / Roshith K