Melbourne , 27 ഡിസംബര്‍ (H.S.)

മെൽബൺ: ബോക്സിംഗ് ഡേ ടെസ്റ്റിൽ ഓസ്‌ട്രേലിയയെ തകർത്ത് ഇംഗ്ലണ്ടിന് ചരിത്ര വിജയം. മെൽബൺ ക്രിക്കറ്റ് ഗ്രൗണ്ടിൽ നടന്ന ആഷസ് പരമ്പരയിലെ നാലാം ടെസ്റ്റിൽ വെറും രണ്ട് ദിവസത്തിനുള്ളിലാണ് ഇംഗ്ലണ്ട് വിജയം പിടിച്ചെടുത്തത്. ഓസ്‌ട്രേലിയൻ മണ്ണിൽ കഴിഞ്ഞ 15 വർഷത്തിനിടയിലെ ഇംഗ്ലണ്ടിന്റെ ആദ്യ ടെസ്റ്റ് വിജയമാണിത്. ഇതിനുമുമ്പ് 2011-ലാണ് ഇംഗ്ലണ്ട് ഓസ്‌ട്രേലിയയിൽ ഒരു ടെസ്റ്റ് വിജയിച്ചത്.

ഈ വിജയത്തോടെ ലോക ടെസ്റ്റ് ചാമ്പ്യൻഷിപ്പ് (WTC) ചരിത്രത്തിൽ ഏറ്റവും കൂടുതൽ വിജയങ്ങൾ നേടിയ ടീമുകളുടെ പട്ടികയിൽ ഇന്ത്യക്കൊപ്പം (35 വിജയങ്ങൾ) രണ്ടാം സ്ഥാനത്തെത്താനും ഇംഗ്ലണ്ടിന് സാധിച്ചു. 39 വിജയങ്ങളുമായി ഓസ്‌ട്രേലിയയാണ് പട്ടികയിൽ ഒന്നാമത്.

മത്സരത്തിന്റെ ചുരുക്കം: രണ്ടാം ഇന്നിംഗ്സിൽ ഓസ്‌ട്രേലിയ ഉയർത്തിയ 175 റൺസ് വിജയലക്ഷ്യം പിന്തുടർന്ന ഇംഗ്ലണ്ട് ആറ് വിക്കറ്റ് നഷ്ടത്തിൽ ലക്ഷ്യം കണ്ടു. ഓപ്പണർമാരായ ബെൻ ഡക്കറ്റും സാക്ക് ക്രോളിയും നൽകിയ മികച്ച തുടക്കം ഇംഗ്ലണ്ടിന് ആത്മവിശ്വാസം നൽകി. ഡക്കറ്റ് പുറത്തായെങ്കിലും ജേക്കബ് ബെഥേലിനെ കൂട്ടുപിടിച്ച് ക്രോളി ടീമിനെ വിജയത്തിലേക്ക് നയിച്ചു.

രണ്ടാം ഇന്നിംഗ്സിൽ ബാറ്റിംഗ് തകർച്ച നേരിട്ട ഓസ്‌ട്രേലിയ 132 റൺസിനാണ് പുറത്തായത്. ഒരു ഘട്ടത്തിൽ 61/2 എന്ന നിലയിലായിരുന്ന ആതിഥേയർക്ക് വെറും അരമണിക്കൂറിനുള്ളിൽ നാല് വിക്കറ്റുകൾ കൂടി നഷ്ടമായി. സ്റ്റീവ് സ്മിത്തും കാമറൂൺ ഗ്രീനും ചേർന്ന് നടത്തിയ പോരാട്ടം സ്കോർ 100 കടത്തിയെങ്കിലും വാലറ്റത്തെ വേഗത്തിൽ പുറത്താക്കി ഇംഗ്ലണ്ട് മത്സരത്തിൽ ആധിപത്യം ഉറപ്പിച്ചു.

മെൽബണിലെ പിച്ചിനെക്കുറിച്ച് വലിയ വിമർശനങ്ങൾ ഉയരുന്നുണ്ട്. ആറ് സെഷനുകളിലായി 34 വിക്കറ്റുകളാണ് മത്സരത്തിൽ വീണത്. പരമ്പരയിൽ ഇതിനകം ഓസ്‌ട്രേലിയ ആഷസ് നിലനിർത്തിയെങ്കിലും, ഈ വിജയം ഇംഗ്ലണ്ടിന് വലിയ ആശ്വാസമാണ് നൽകുന്നത്. സിഡ്‌നിയിൽ നടക്കുന്ന അടുത്ത മത്സരത്തിലും ഇതേ പ്രകടനം ആവർത്തിക്കാനാണ് ബെൻ സ്റ്റോക്സും സംഘവും ലക്ഷ്യമിടുന്നത്.

മികച്ച തുടക്കത്തിനു ശേഷം രണ്ടാം ഇന്നിംഗ്സിൽ ഓസ്ട്രേലിയ കീഴടങ്ങി

61/2. ആകെ 104 റൺസിന്റെ ലീഡ്. എംസിജിയിൽ രണ്ടാം ദിവസത്തെ ആദ്യ മണിക്കൂർ കളി കഴിഞ്ഞപ്പോൾ ഓസ്ട്രേലിയ മികച്ച നിലയിലായിരുന്നു. എന്നാൽ ശരിയായ സമയത്ത് ഇംഗ്ലണ്ട് ആഞ്ഞടിക്കുകയായിരുന്നു ., ഉച്ചഭക്ഷണത്തിന് മുമ്പുള്ള അവസാന അരമണിക്കൂറിൽ ആതിഥേയർ 88/6 എന്ന നിലയിലേക്ക് ചുരുങ്ങി.

കാമറൂൺ ഗ്രീനുമായി ചേർന്ന് സ്റ്റീവ് സ്മിത്ത് പൊരുതി ഏഴാം വിക്കറ്റിൽ 31 റൺസിന്റെ കൂട്ടുകെട്ട് പടുത്തുയർത്തി, സ്റ്റോക്‌സിന്റെ പന്തിൽ സ്റ്റീവ് സ്മിത്ത് ഒരു പന്ത് എഡ്ജ് ചെയ്തു പുറത്തായതിനെ തുടർന്ന് ആ പ്രതിരോധവും അവസാനിച്ചു.

എന്നിട്ടും, ഏറ്റവും കടുപ്പമേറിയ എംസിജി പ്രതലത്തിൽ 175 റൺസ് എന്ന ലക്ഷ്യം ഇംഗ്ലണ്ടിന് എളുപ്പമാകില്ല. ആദ്യ ഇന്നിംഗ്സിൽ 110 റൺസിന് ഓൾഔട്ടായ ഓസ്ട്രേലിയയുടെ ബൗളിംഗ് ആക്രമണം ശക്തമായിരുന്നു . പക്ഷേ, സന്ദര്‍ശകര്‍ അവസരം മുതലെടുത്ത് ബുദ്ധിപൂര്‍വ്വം ബാറ്റ് ചെയ്ത് ഓസീസിനെതിരെ വിജയം പിടിച്ചെടുത്തു.

സിഡ്‌നിയില്‍ സമാനമായ പ്രകടനം പുറത്തെടുത്ത് പരമ്പര മികച്ച രീതിയില്‍ അവസാനിപ്പിക്കാന്‍ അവര്‍ക്ക് കഴിയുമോ? ഓസ്‌ട്രേലിയ വീണ്ടും ഒരു എംസിജി പോലുള്ള പ്രതലം പുറത്തെടുക്കുമോ എന്നതാണ് ഏറ്റവും വലിയ ചോദ്യം.

---------------

Hindusthan Samachar / Roshith K