Enter your Email Address to subscribe to our newsletters
Kochi, 29 ഡിസംബര് (H.S.)
കേന്ദ്ര ധനകാര്യ മന്ത്രാലയത്തിന് കീഴിലുള്ള ഫിനാന്ഷ്യല് സര്വീസസ് ഡിപ്പാര്ട്ട്മെന്റും (DFS) റിസര്വ് ബാങ്ക് ഓഫ് ഇന്ത്യയും (RBI) സംയുക്തമായി നടപ്പിലാക്കുന്ന 'ആപ്കി പുഞ്ചി ആപ്ക അധികാര് / നിങ്ങളുടെ പണം നിങ്ങളുടെ അവകാശം' എന്ന ദേശീയ പ്രചാരണ പരിപാടിയുടെ ഭാഗമായി എറണാകുളത്ത് അവകാശികളില്ലാത്ത സാമ്പത്തിക ആസ്തികള് (Unclaimed Financial Assets) വീണ്ടെടുക്കുന്നതിനായുള്ള ക്യാമ്പ് സംഘടിപ്പിച്ചു. എറണാകുളം ഹൈക്കോടതിക്ക് സമീപമുള്ള ഇന്ഫന്റ് ജീസസ് പാരിഷ് ഹാളിലായിരുന്നു ക്യാമ്പ് നടന്നത്.
എസ്.എല്.ബി.സി (SLBC) നല്കിയ കണക്കുകള് പ്രകാരം, കേരളത്തില് അവകാശികളില്ലാത്ത ഏറ്റവും കൂടുതല് ബാങ്ക് അക്കൗണ്ടുകള് ഉള്ളത് എറണാകുളം ജില്ലയിലാണ്. ഏകദേശം 11.93 ലക്ഷം അക്കൗണ്ടുകളിലായി 307 കോടിയോളം രൂപയാണ് റിസര്വ് ബാങ്കില് ഇത്തരത്തില് അവകാശികളില്ലാതെ കിടക്കുന്നത്. ബാങ്ക് നിക്ഷേപങ്ങള്, ഇന്ഷുറന്സ്, മ്യൂച്വല് ഫണ്ടുകള്, പെന്ഷന് ഫണ്ടുകള് എന്നിവയുള്പ്പെടെയുള്ള സാമ്പത്തിക ആസ്തികള് അവയുടെ യഥാര്ത്ഥ ഉടമകളിലേക്കോ നിയമപരമായ അനന്തരാവകാശികളിലേക്കോ എത്തിക്കുക എന്ന ലക്ഷ്യത്തോടെയാണ് ഈ ക്യാമ്പ് സംഘടിപ്പിച്ചത്.
എറണാകുളം എം.എല്.എ ശ്രീ. ടി. ജെ. വിനോദ് ക്യാമ്പ് ഉദ്ഘാടനം ചെയ്തു. ആര്.ബി.ഐ ജനറല് മാനേജര് ശ്രീ. മുഹമ്മദ് സാജിദ് പി. കെ. അധ്യക്ഷത വഹിച്ചു. എറണാകുളം അഡീഷണല് ഡിസ്ട്രിക്ട് മജിസ്ട്രേറ്റ് ശ്രീ. വിനോദ് രാജ് മുഖ്യപ്രഭാഷണം നടത്തി. ചടങ്ങില് എസ്.ബി.ഐ ഡി.ജി.എം ശ്രീ. വിനയ് കുമാര്, യൂണിയന് ബാങ്ക് ഓഫ് ഇന്ത്യ ഡി.ജി.എം ശ്രീ. സതീഷ് കുമാര്, എല്.ഐ.സി പ്രതിനിധി ശ്രീമതി. ജ്യോതിലക്ഷ്മി, എറണാകുളം ലീഡ് ഡിസ്ട്രിക്ട് മാനേജര് ശ്രീ. അജിലേഷ് സി. എന്നിവര് സംസാരിച്ചു.
പൊതുജനങ്ങളെ സഹായിക്കുന്നതിനായി വിവിധ ബാങ്കുകളും എല്.ഐ.സിയും വേദിയില് പ്രത്യേക കൗണ്ടറുകള് സജ്ജീകരിച്ചിരുന്നു. നാനൂറോളം ആളുകള് ക്യാമ്പ് സന്ദര്ശിക്കുകയും സേവനങ്ങള് പ്രയോജനപ്പെടുത്തുകയും ചെയ്തു. സാമ്പത്തിക ആസ്തികള് ക്ലെയിം ചെയ്യുന്നതുമായി ബന്ധപ്പെട്ട സംശയങ്ങള് ദൂരീകരിക്കുന്നതിനായി പ്രത്യേക ചോദ്യോത്തര സെഷനും സംഘടിപ്പിച്ചു.
തങ്ങളുടെയോ മരണപ്പെട്ട ബന്ധുക്കളുടെയോ പേരില് ലഭിക്കാനുള്ള സാമ്പത്തിക ആസ്തികളെക്കുറിച്ച് അന്വേഷിക്കാനും അവ ക്ലെയിം ചെയ്യാനും ബാങ്കുകളെയോ മറ്റ് ധനകാര്യ സ്ഥാപനങ്ങളെയോ സമീപിക്കാന് ഉപഭോക്താക്കളെ പ്രോത്സാഹിപ്പിക്കുകയാണ് ഈ പ്രചാരണ പരിപാടിയുടെ ലക്ഷ്യം.
---------------
Hindusthan Samachar / Sreejith S
