Chathisghad , 4 ഡിസംബര്‍ (H.S.)

ബിജാപൂർ: ഛത്തീസ്ഗഢിലെ ബിജാപൂർ ജില്ലയിൽ ബുധനാഴ്ച (2025 ഡിസംബർ 4) നടന്ന ഏറ്റുമുട്ടലിൽ ഒരു ഉന്നത മാവോയിസ്റ്റ് കമാൻഡർ ഉൾപ്പെടെ കുറഞ്ഞത് 18 നക്സലൈറ്റുകളെ സുരക്ഷാ സേന വധിച്ചതായി റിപ്പോർട്ട് . ബിജാപൂർ-ദന്തേവാഡ ജില്ലകളുടെ അതിർത്തി വനത്തിൽ സുരക്ഷാ സേന നക്സൽ വിരുദ്ധ ഓപ്പറേഷൻ ആരംഭിച്ചതിനെ തുടർന്നാണ് ഏറ്റുമുട്ടൽ നടന്നത്.

ആദ്യം 12 മാവോയിസ്റ്റുകളാണ് കൊല്ലപ്പെട്ടതെങ്കിലും, ദക്ഷിണ ബസ്തർ മേഖല ഡെപ്യൂട്ടി ഇൻസ്‌പെക്ടർ ജനറൽ ഓഫ് പോലീസ് (ഡിഐജി) കംലോചൻ കശ്യപ് വ്യാഴാഴ്ച കൂടുതൽ ആറ് മൃതദേഹങ്ങൾ കൂടി കണ്ടെത്തിയതായി സ്ഥിരീകരിച്ചു. കൊല്ലപ്പെട്ട നക്സലൈറ്റുകളിൽ നിന്ന് വൻതോതിൽ ആയുധങ്ങളും വെടിക്കോപ്പുകളും എകെ-47, ഐഎൻഎസ്എഎസ് (INSAS) റൈഫിളുകളും സുരക്ഷാ സേന പിടിച്ചെടുത്തു.

വധിക്കപ്പെട്ട 18 നക്സലൈറ്റുകളിൽ ഒരാളെ പീപ്പിൾസ് ലിബറേഷൻ ഗറില്ലാ ആർമി (PLGA) യുടെ രണ്ടാം നമ്പർ കമ്പനിയുടെ കമാൻഡറായ മോദിയം വെള്ളയായി തിരിച്ചറിഞ്ഞിട്ടുണ്ട്. ഇൻസ്പെക്ടർ ജനറൽ ഓഫ് പോലീസ് (ബസ്തർ റേഞ്ച്) സുന്ദർരാജ് പട്ടിലിംഗം പറയുന്നതനുസരിച്ച്, 17 സുരക്ഷാ ഉദ്യോഗസ്ഥരുടെ ജീവൻ അപഹരിച്ച 2020-ലെ സുക്മയിലെ മിൻപ ആക്രമണം ഉൾപ്പെടെ നിരവധി ആക്രമണങ്ങളിൽ വെള്ളക്ക് പങ്കുണ്ടായിരുന്നു. വെള്ളയുടെ തലയ്ക്ക് 8 ലക്ഷം രൂപ പാരിതോഷികം പ്രഖ്യാപിച്ചിരുന്നു.

ദുഃഖകരമെന്നു പറയട്ടെ, ഏറ്റുമുട്ടലിൽ സുരക്ഷാ സേനയ്ക്ക് മൂന്ന് ഡിസ്ട്രിക്റ്റ് റിസർവ് ഗാർഡ് (ഡിആർജി) ഉദ്യോഗസ്ഥരെയും നഷ്ടപ്പെട്ടു. ഡിആർജി ബിജാപൂരിൽ നിന്നുള്ള ഹെഡ് കോൺസ്റ്റബിൾ മോനു വഡാഡി, കോൺസ്റ്റബിൾ ദുക്കാരു ഗോണ്ടെ, ജവാൻ രമേഷ് സോധി എന്നിവർ ഏറ്റുമുട്ടലിൽ വീരമൃത്യു വരിച്ചു. മറ്റ് രണ്ട് ഡിആർജി ഉദ്യോഗസ്ഥരായ അസിസ്റ്റന്റ് സബ് ഇൻസ്പെക്ടർ ജനാർദൻ കോറാം, കോൺസ്റ്റബിൾ സോംദേവ് യാദവ് എന്നിവർക്ക് പരിക്കേറ്റു, പട്ടിലിംഗം പിടിഐ വാർത്താ ഏജൻസിയോട് പറഞ്ഞു.

ഇതോടെ ഈ വർഷം ഛത്തീസ്ഗഢിൽ സുരക്ഷാ സേന വധിച്ച നക്സലൈറ്റുകളുടെ എണ്ണം 275 ആയി. ഇതിൽ 246 പേരെ ബസ്തർ മേഖലയിൽ മാത്രം വധിച്ചു, 27 പേരെ ഗരിയാബന്ദ് ജില്ലയിലും രണ്ടുപേരെ മോഹ്ല-മാൻപൂർ-അംബാഗഢ് ചൗക്കി ജില്ലയിലും വധിച്ചു. മറുവശത്ത്, ഈ വർഷം സംസ്ഥാനത്ത് നക്സൽ വിരുദ്ധ ഓപ്പറേഷനുകളിൽ 23 സുരക്ഷാ ഉദ്യോഗസ്ഥർക്ക് ജീവൻ നഷ്ടപ്പെട്ടു.

---------------

Hindusthan Samachar / Roshith K