Kerala, 4 ഡിസംബര്‍ (H.S.)

ന്യൂഡൽഹി: മുൻ മിസോറാം ഗവർണറും മുതിർന്ന അഭിഭാഷകനുമായ സ്വരാജ് കൗശൽ 73-ാമത്തെ വയസ്സിൽ വ്യാഴാഴ്ച അന്തരിച്ചു. ബിജെപി നേതാവ് അന്തരിച്ച സുഷമാ സ്വരാജിന്റെ ഭർത്താവായ കൗശൽ ന്യൂഡൽഹി എംപിയായ ബാംസുരി സ്വരാജിന്റെ പിതാവാണ്.

മുൻ മിസോറാം ഗവർണറും മുതിർന്ന അഭിഭാഷകനുമായ സ്വരാജ് കൗശലിന്റെ ആകസ്മിക വിയോഗം ദുഃഖത്തോടെ അറിയിക്കുന്നു, ഡൽഹി ബിജെപി പ്രസ്താവനയിൽ പറഞ്ഞു. പാർട്ടി നേതാക്കൾ പറയുന്നതനുസരിച്ച്, വ്യാഴാഴ്ച ഉച്ചയ്ക്ക് നെഞ്ചുവേദന അനുഭവപ്പെട്ടതിനെ തുടർന്ന് ഉടൻ തന്നെ കൗശലിനെ എയിംസ് ആശുപത്രിയിൽ എത്തിച്ചെങ്കിലും ഡോക്ടർമാർ മരണം സ്ഥിരീകരിക്കുകയായിരുന്നു. ലോധി റോഡ് ശ്മശാനത്തിലായിരിക്കും സംസ്കാര ചടങ്ങുകൾ നടക്കുകയെന്ന് കുടുംബം അറിയിച്ചു.

ബാംസുരി സ്വരാജിന്റെ വൈകാരിക കുറിപ്പ്

അഗാധമായ വൈകാരിക കുറിപ്പിൽ, ബാംസുരി സ്വരാജ് തന്റെ ജീവിതത്തെ രൂപപ്പെടുത്തിയ പിതാവിന്റെ വാത്സല്യത്തെയും അച്ചടക്കത്തെയും മൂല്യങ്ങളെയും ഓർമ്മിച്ചു. അവർ 'എക്സി'ൽ ഇങ്ങനെ കുറിച്ചു: അങ്ങയുടെ വേർപാട് ഹൃദയത്തിൽ ഏറ്റവും വലിയ വേദനയായി ഇറങ്ങി വന്നിരിക്കുന്നു. എങ്കിലും, അങ്ങ് ഇപ്പോൾ അമ്മയോടൊപ്പം സർവ്വശക്തന്റെ സന്നിധിയിൽ നിത്യശാന്തിയിൽ ഒരുമിച്ചിരിക്കുന്നു എന്ന വിശ്വാസം മനസ്സ് മുറുകെ പിടിക്കുന്നു. അങ്ങയുടെ മകളായിരിക്കുക എന്നത് എന്റെ ജീവിതത്തിലെ ഏറ്റവും വലിയ അഭിമാനമാണ്. അങ്ങയുടെ പൈതൃകവും മൂല്യങ്ങളും അനുഗ്രഹങ്ങളും എന്റെ ഭാവി യാത്രകൾക്ക് അടിസ്ഥാനമായിരിക്കും.

നേതാക്കൾ അനുസ്മരിച്ചു

ഡൽഹി മുഖ്യമന്ത്രി രേഖ ഗുപ്ത സ്വരാജ് കൗശലിന്റെ നിര്യാണത്തിൽ അനുശോചനം രേഖപ്പെടുത്തുകയും ഈ വാർത്ത ഹൃദയഭേദകമാണെന്ന് വിശേഷിപ്പിക്കുകയും ചെയ്തു. പൊതുജീവിതത്തിലും നിയമരംഗത്തും അദ്ദേഹം നൽകിയ അമൂല്യ സംഭാവനകളെ അവർ അനുസ്മരിച്ചു. രാജ്യത്തിനും സമൂഹത്തിനും അദ്ദേഹം നൽകിയ സേവനം എന്നും ഓർമ്മിക്കപ്പെടുമെന്നും അവർ പറഞ്ഞു.

---------------

Hindusthan Samachar / Roshith K