Thiruvananthapuram, 11 ജനുവരി (H.S.)

താൻ ഒരു സംഘിയാണെന്ന് അഭിമാനത്തോടെ പറയുമെന്ന് മുൻ ബിഗ് ബോസ് താരം റോബിൻ രാധാകൃഷ്ണൻ. അധികം താമസിക്കാതെ കേരളത്തില്‍ ബിജെപി അധികാരത്തില്‍ വരുമെന്നും റോബിൻ പറയുന്നു.

സമൂഹ മാധ്യമത്തില്‍ പങ്കുവെച്ച വീഡിയോയിലൂടെയാണ് താരം ഇക്കാര്യം പറഞ്ഞത്. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറുമായുള്ള ചിത്രം സോഷ്യല്‍ മീഡിയയില്‍ പങ്കുവച്ചതിന് പിന്നാലെയുണ്ടായ സൈബർ ആക്രമണത്തോട് പ്രതികരിക്കുകയായിരുന്നു റോബിൻ.

തനിക്ക് ബിജെപിയെ ഇഷ്ടമാണെന്ന് റോബിൻ വ്യക്തമാക്കി. തന്റെ ഇഷ്ടങ്ങളെ ചോദ്യം ചെയ്യാൻ ആർക്കും അവകാശമില്ലെന്നും റോബിൻ രാധാകൃഷ്ണൻ വീഡിയോയില്‍ പറയുന്നു. ബിജെപിയെ എന്തിനാണ് പുച്ഛിക്കുന്നതെന്നും കേരളം ബിജെപി ഭരിക്കുന്ന ഒരു ദിവസം വരുമെന്നും റോബിൻ വീഡിയോയില്‍ പറയുന്നു.

റോബിന്റെ വാക്കുകള്‍ ഇങ്ങനെ:

'ബിജെപിയുടെ സംസ്ഥാന പ്രസിഡന്റായിട്ടുള്ള രാജീവ് ചന്ദ്രശേഖർ സാറുമായുള്ള ഒരു ഫോട്ടോ എന്റെ ഇൻസ്റ്റഗ്രാം ഓഫീഷ്യല്‍ അക്കൗണ്ടില്‍ ഞാൻ പോസ്റ്റ് ചെയ്തു. ചിത്രത്തിന്റെ അടിക്കുറിപ്പായി സാരിന്റെ പേരും ഒരു ഹാർട്ട് ഇമോജിയും മാത്രമാണിട്ടത്. പോസ്റ്റ് ചെയ്തതിന് ശേഷം, എന്റെ കമന്റ് സെക്ഷനും എന്റെ ഡയറക്‌ട് മെസേജും തെറിവിളിയാണ്. ഒരുപാട് പേർ ഭീഷണിപ്പെടുത്തുന്നു. ഞാൻ കൊച്ചു കുട്ടിയാണല്ലോ പേടിക്കാൻ.

ശരിക്കും എന്താണ് നിങ്ങളുടെയൊക്കെ പ്രശ്നം. നമുക്ക് എല്ലാവർക്കും വ്യക്തിപരമായി ഓരോ ഇഷ്ടങ്ങളുണ്ടാകും. ഞാൻ ഒരിക്കലും നിങ്ങളുടെ ഇഷ്ടങ്ങളെ ചോദ്യം ചെയ്യാനോ, എന്റെ ഇഷ്ടങ്ങളെ നിങ്ങളെ അടിച്ചേല്‍പ്പിക്കാനോ വരുന്നില്ല. എന്റെ ഇഷ്ടങ്ങള്‍ എന്റെ വ്യക്തിപരമാണ്. എന്റെ നിലപാടും എന്റെ കാഴ്ചപ്പാടും വ്യക്തിപരമാണ്.

ഒരുപാട് പേർ പറയുന്നു, ഞാൻ സംഘിയാണ്. ചാണകത്തില്‍ ചവിട്ടി. ഇതിന്റെയൊക്കെ ആവശ്യമുണ്ടായിരുന്നോ? അത് എന്റെ വ്യക്തിപരമായിട്ടുള്ള ഇഷ്ടമല്ലേ? ഇപ്പോള്‍ ഞാൻ പറയുന്നു, എനിക്ക് ബിജെപി എന്ന പാർട്ടിയില്‍ അംഗത്വം പോലുമില്ല. എന്നാല്‍ ഇപ്പോള്‍ ഞാൻ പറയുന്നു എനിക്ക് ബിജെപി എന്ന പാർട്ടിയെ എനിക്ക് ഇഷ്ടമാണ്. എനിക്ക് നരേന്ദ്ര മോദി സാറിനെ ഇഷ്ടമാണ്. കാരണം പുള്ളിക്കാരൻ ലോകത്ത് ഏറ്റവും ശക്തനായ മനുഷ്യരില്‍ ഒരാളാണ്. എനിക്ക് അദ്ദേഹം ഇൻസ്പിരേഷനാണ്. അത് കാരണം എനിക്ക് ബിജെപി പാർട്ടിയെയും ഇഷട്മാണ്. എന്തെങ്കിലും പ്രശ്നമുണ്ടോ?

അതുകൊണ്ട് ഞാൻ അഭിമാനത്തോടെ പറയും ഞാൻ ഒരു സംഘിയാണ്. ഇടതുപക്ഷമാണെങ്കിലും വലതുപക്ഷമാണെങ്കിലും നിങ്ങള്‍ ചെയ്യുന്ന എല്ലാ കാര്യവും ശരിയാണോ? നിങ്ങള്‍ അഴിമതിയും കാര്യങ്ങളും ഒന്നും ചെയ്യുന്നില്ലേ? നിങ്ങളുടെ പ്രവർത്തകരും നേതാക്കളും ചെയ്യുന്ന എല്ലാ കാര്യവും ശരിയാണോ? ആരും പെർഫെക്‌ട് അല്ല.

ബിജെപി പറയുമ്ബോള്‍ എല്ലാവർക്കും പുച്ഛമാണ്. പുച്ഛിക്കാൻ എന്താണ് ഇരിക്കുന്നത്. ഒരിക്കലും പുച്ഛിക്കേണ്ട കാര്യമില്ല. ബിജെപി കേരളം ഭരിക്കുമോ എന്ന പേടിയാണ്. അങ്ങനെ ഒരു ദിവസം വരും. അധികം താമസിക്കാതെ വരും. അതിനുള്ള എല്ലാകാര്യവും നിങ്ങള്‍ ചെയ്തുവയ്ക്കുന്നുണ്ട്. എനിക്ക് ബിജെപിയെ ഇഷ്ടമാണ്. എന്തെങ്കിലും പ്രശ്നമുണ്ടോ? അഭിമാനത്തോടെ ഞാൻ പറയുന്നു, ഞാൻ സംഘിയാണ്. എന്തെങ്കിലും പ്രശ്നമുണ്ടോ? പ്രശ്നമുണ്ടാകാൻ പാടില്ല.

---------------

Hindusthan Samachar / CHANDHU CHANDRASEKHAR