Mumbai , 11 ജനുവരി (H.S.)

നാഗ്‌പൂർ: രാഷ്ട്രീയ പാർട്ടികൾ മുസ്ലിം വോട്ടുകൾ സ്വന്തമാക്കാൻ ഭയത്തിന്റെ അന്തരീക്ഷം സൃഷ്ടിക്കുകയാണെന്ന് ഓൾ ഇന്ത്യ മജ്‌ലിസെ ഇത്തിഹാദുൽ മുസ്‌ലിമീൻ (AIMIM) അധ്യക്ഷൻ അസദുദ്ദീൻ ഒവൈസി. മഹാരാഷ്ട്രയിലെ നാഗ്‌പൂരിൽ സംഘടിപ്പിച്ച പൊതുസമ്മേളനത്തിൽ സംസാരിക്കുകയായിരുന്നു അദ്ദേഹം. വെറും 'വോട്ടർമാർ' മാത്രമായി തുടരാതെ, മുസ്ലിം വിഭാഗം സ്വന്തമായി ഒരു രാഷ്ട്രീയ ഏജൻസി (Political Agency) രൂപീകരിക്കണമെന്നും അദ്ദേഹം ആഹ്വാനം ചെയ്തു.

ഭയപ്പെടുത്തി വോട്ട് നേടാനുള്ള ശ്രമം

ബിജെപി, ഏക്നാഥ് ഷിൻഡെ വിഭാഗം, അജിത് പവാർ വിഭാഗം തുടങ്ങി എല്ലാ രാഷ്ട്രീയ പാർട്ടികളും മുസ്ലിംകളെ ഭയപ്പെടുത്തി വോട്ട് നേടാനാണ് ശ്രമിക്കുന്നതെന്ന് ഒവൈസി ആരോപിച്ചു. നിങ്ങൾ വെറും വോട്ടർമാരായി മാത്രം തുടർന്നാൽ നിങ്ങളുടെ വീടുകൾക്ക് മുകളിലൂടെ ബുൾഡോസറുകൾ കയറിയിറങ്ങും. ഭയപ്പെട്ടതുകൊണ്ട് കാര്യമില്ല, സ്വന്തമായി രാഷ്ട്രീയ ശക്തി ആർജ്ജിച്ചാൽ മാത്രമേ അവകാശങ്ങൾ സംരക്ഷിക്കപ്പെടുകയുള്ളൂ, അദ്ദേഹം പറഞ്ഞു. കോൺഗ്രസ് പാർട്ടിക്കെതിരെയും അദ്ദേഹം രൂക്ഷവിമർശനം ഉന്നയിച്ചു. മുസ്ലിംകൾ വെറും വോട്ടർമാരായി മാത്രം ഒതുങ്ങണമെന്നാണ് കോൺഗ്രസ് ആഗ്രഹിക്കുന്നതെന്നും എന്നാൽ അവർക്ക് വേണ്ടി കാര്യമായൊന്നും ചെയ്യാൻ കോൺഗ്രസ് തയ്യാറല്ലെന്നും അദ്ദേഹം കൂട്ടിച്ചേർത്തു.

നിയമങ്ങൾ ദുരുപയോഗം ചെയ്യുന്നു

യുഎപിഎ (UAPA) പോലുള്ള ഭീകരവിരുദ്ധ നിയമങ്ങൾ മുസ്ലിംകൾക്കും ദളിതർക്കും ആദിവാസികൾക്കും എതിരെ ദുരുപയോഗം ചെയ്യപ്പെടുകയാണെന്നും ഒവൈസി ആരോപിച്ചു. യുഎപിഎ നിയമത്തിലെ 15A വകുപ്പ് ഈ വിഭാഗങ്ങളെ ലക്ഷ്യം വെക്കാനാണ് ഉപയോഗിക്കുന്നത്. മൻമോഹൻ സിംഗ് സർക്കാരിന്റെ കാലത്ത് പി. ചിദംബരം കൊണ്ടുവന്ന ഭേദഗതികളാണ് ഇതിന് തുടക്കമിട്ടതെന്നും 2019-ൽ അമിത് ഷാ ഇത് കൂടുതൽ കർക്കശമാക്കിയെന്നും അദ്ദേഹം ഓർമ്മിപ്പിച്ചു. ഡൽഹിയിലിരിക്കുന്ന എൻഐഎ ഓഫീസർക്ക് നാഗ്‌പൂരിലുള്ള ഒരാളെ ഭീകരവാദിയായി പ്രഖ്യാപിക്കാൻ കഴിയുന്ന തരത്തിലുള്ള നിയമഭേദഗതിയെ കോൺഗ്രസ് പിന്തുണയ്ക്കുകയാണ് ചെയ്തതെന്നും ഒവൈസി കുറ്റപ്പെടുത്തി.

ഹിജാബ് ധരിച്ച പ്രധാനമന്ത്രി: ഒവൈസിയുടെ സ്വപ്നം

മഹാരാഷ്ട്രയിലെ സോളാപൂരിൽ നടന്ന മറ്റൊരു ചടങ്ങിൽ, ഭാവിയിൽ ഹിജാബ് ധരിച്ച ഒരു പെൺകുട്ടി ഇന്ത്യയുടെ പ്രധാനമന്ത്രിയാകുമെന്ന് താൻ സ്വപ്നം കാണുന്നതായി ഒവൈസി പറഞ്ഞിരുന്നു. പാകിസ്ഥാൻ ഭരണഘടനയിൽ ഇതര മതസ്ഥർക്ക് ഉന്നത പദവികൾ ലഭിക്കാൻ തടസ്സങ്ങളുണ്ടെങ്കിലും, ബാബാ സാഹിബ് അംബേദ്കർ നിർമ്മിച്ച ഇന്ത്യൻ ഭരണഘടനയിൽ ഏതൊരു പൗരനും പ്രധാനമന്ത്രിയോ മുഖ്യമന്ത്രിയോ ആകാൻ അവകാശമുണ്ടെന്ന് അദ്ദേഹം പറഞ്ഞു. ഇതിനെതിരെ ബിജെപി നേതാക്കളിൽ നിന്ന് വലിയ പ്രതിഷേധം ഉയർന്നിരുന്നു. ഹിജാബ് ധരിച്ച ഒരു വനിതയെ സ്വന്തം പാർട്ടിയുടെ അധ്യക്ഷയാക്കാൻ ഒവൈസി തയ്യാറുണ്ടോ എന്നായിരുന്നു ബിജെപിയുടെ മറുചോദ്യം.

മുംബൈ നഗരസഭാ തിരഞ്ഞെടുപ്പ് പടിവാതിൽക്കൽ എത്തിനിൽക്കെ ഒവൈസിയുടെ ഈ പ്രസ്താവനകൾ രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെച്ചിരിക്കുകയാണ്. ജനുവരി 15-നാണ് നഗരസഭാ തിരഞ്ഞെടുപ്പ് നടക്കുന്നത്.

---------------

Hindusthan Samachar / Roshith K