Thiruvalla , 16 ജനുവരി (H.S.)

തിരുവല്ല: മൂന്നാമത്തെ ബലാത്സംഗക്കേസിൽ പ്രതിയായ രാഹുൽ മാങ്കൂട്ടത്തിൽ എം.എൽ.എയുടെ ജാമ്യഹർജിയിൽ കോടതിയിൽ വാദം പൂർത്തിയായി. വാദത്തിനിടെ പ്രോസിക്യൂഷൻ അതീവ നിർണ്ണായകമായ ഒരു നീക്കം നടത്തി. അതിജീവിതയുടെ മൊഴിയെടുത്ത വീഡിയോ ദൃശ്യങ്ങൾ സി.ഡി രൂപത്തിലാക്കി പ്രോസിക്യൂഷൻ കോടതിയിൽ ഹാജരാക്കി. കേസിലെ ഗൗരവസ്വഭാവം പരിഗണിച്ച് തിരുവല്ല ഫസ്റ്റ് ക്ലാസ് മജിസ്‌ട്രേറ്റ് കോടതി അടച്ചിട്ട മുറിയിലാണ് വാദം കേട്ടത്.

രഹസ്യമൊഴി ഓൺലൈനായി രേഖപ്പെടുത്താൻ അപേക്ഷ നിലവിൽ വിദേശത്തുള്ള അതിജീവിത, തന്റെ രഹസ്യമൊഴി ഓൺലൈൻ ആയി രേഖപ്പെടുത്താൻ അനുവദിക്കണമെന്ന് ആവശ്യപ്പെട്ട് തിരുവല്ല മജിസ്‌ട്രേറ്റ് കോടതിയിൽ അപേക്ഷ നൽകിയിട്ടുണ്ട്. യാത്രാ തടസ്സങ്ങൾ ഉള്ളതിനാലാണ് ഇത്തരമൊരു അപേക്ഷ നൽകിയത്. മൊഴി രേഖപ്പെടുത്താനുള്ള നടപടികൾ പുരോഗമിക്കുകയാണെന്ന് പ്രോസിക്യൂഷൻ കോടതിയെ അറിയിച്ചു.

കോടതിയിലെ വാദപ്രതിവാദങ്ങൾ രാഹുലിന് ജാമ്യം നൽകുന്നതിനെ പ്രോസിക്യൂഷൻ ശക്തമായി എതിർത്തു. പ്രതി ഇതിനു മുൻപും സമാനമായ കുറ്റകൃത്യങ്ങളിൽ ഏർപ്പെട്ടിട്ടുണ്ടെന്നും ഇയാൾക്കെതിരെ നിരന്തരമായ പരാതികൾ ഉയരുന്നുണ്ടെന്നും പ്രോസിക്യൂഷൻ വാദിച്ചു. പുറത്തിറങ്ങിയാൽ സാക്ഷികളെ സ്വാധീനിക്കാനും അന്വേഷണം അട്ടിമറിക്കാനും സാധ്യതയുണ്ടെന്നും സർക്കാർ അഭിഭാഷകൻ കോടതിയെ ബോധിപ്പിച്ചു.

എന്നാൽ, ആരോപണങ്ങൾ അടിസ്ഥാനരഹിതമാണെന്നാണ് പ്രതിഭാഗത്തിന്റെ വാദം. രാഹുലും പരാതിക്കാരിയും തമ്മിലുള്ള ബന്ധം പൂർണ്ണമായും പരസ്പര സമ്മതത്തോടെയുള്ളതായിരുന്നുവെന്ന് പ്രതിഭാഗം അഭിഭാഷകർ വാദിച്ചു. ഇതിനെ സാധൂകരിക്കുന്നതിനായി ഇരുവരും തമ്മിൽ കൈമാറിയ ചാറ്റ് വിവരങ്ങളും സന്ദേശങ്ങളും കോടതിയിൽ സമർപ്പിച്ചു. രാഹുൽ ഉത്തരവാദിത്തപ്പെട്ട ഒരു ജനപ്രതിനിധിയാണെന്നും ജാമ്യം ലഭിച്ചാൽ നാടുവിടാൻ സാധ്യതയില്ലെന്നും പ്രതിഭാഗം വ്യക്തമാക്കി.

വിധി നാളെ ഇരുഭാഗത്തിന്റെയും വിശദമായ വാദങ്ങൾ കേട്ട കോടതി ജാമ്യാപേക്ഷ വിധി പറയാനായി മാറ്റിവെച്ചു. നാളെ കോടതി ജാമ്യഹർജിയിൽ വിധി പ്രസ്താവിക്കും. പ്രോസിക്യൂഷൻ ഹാജരാക്കിയ വീഡിയോ തെളിവുകളും ചാറ്റുകളും കോടതി വിശദമായി പരിശോധിക്കും. പത്തനംതിട്ട രാഷ്ട്രീയത്തിൽ വലിയ ചർച്ചയായി മാറിയിരിക്കുന്ന ഈ കേസിൽ മജിസ്‌ട്രേറ്റ് കോടതിയുടെ തീരുമാനം രാഹുൽ മാങ്കൂട്ടത്തിലിനും കോൺഗ്രസ് നേതൃത്വത്തിനും ഒരുപോലെ നിർണ്ണായകമാണ്. ഇതിനിടെ,

കേസിൽ പരാതിക്കാരിയെ സൈബർ ഇടങ്ങളിൽ അധിക്ഷേപിച്ച മഹിളാ കോൺഗ്രസ് നേതാവ് രഞ്ജിത പുളിക്കൻ അറസ്റ്റിലായതും സംഭവത്തിന്റെ തീവ്രത വർദ്ധിപ്പിക്കുന്നു.

സൈബർ പൊലീസ് കോട്ടയത്തെത്തിയാണ് രഞ്ജിതയെ അറസ്റ്റ് ചെയ്തത്. കോട്ടയത്തെ ഒരു ബന്ധുവീട്ടിലായിരുന്നു ഇവർ. ജാമ്യമില്ലാവകുപ്പ് ചുമത്തി രണ്ട് കേസുകളാണ് സൈബർ പൊലീസ് രഞ്ജിതയ്ക്കെതിരെ രജിസ്റ്റർ ചെയ്തിരുന്നത്. രാഹുല്‍ മാങ്കൂട്ടത്തിലിന് എതിരായി ആദ്യ കേസ് വന്നപ്പോൾ തന്നെ രഞ്ജിത രാഹുലിനെ അനുകൂലിച്ചും പരാതിക്കാരിയെ അധിക്ഷേപിച്ചും രംഗത്തെത്തിയിരുന്നു.

അന്ന് തിരുവനന്തപുരം സൈബർ പൊലീസ് ഇവർക്കെതിരെ കേസ് എടുക്കുകയും ചെയ്തിട്ടുണ്ട്. ആ കേസില്‍ ഉപാധികളോടെ കോടതി രഞ്ജിതയ്ക്ക് ജാമ്യം നല്‍കി. എന്നാല്‍ രാഹുലിനെതിരെ മൂന്നാമാതും പരാതി വന്നപ്പോഴും രഞ്ജിത സൈബർ അധിക്ഷേപം നടത്തി. പിന്നാലെയാണ് അറസ്റ്റ്.

---------------

Hindusthan Samachar / Roshith K