Trivandrum, 18 ജനുവരി (H.S.)

തിരുവനന്തപുരം: പ്രതിപക്ഷ നേതാവ് വി.ഡി. സതീശനെതിരെ എൻ.എസ്.എസും എസ്.എൻ.ഡി.പിയും ഉയർത്തിയ രൂക്ഷമായ വിമർശനങ്ങളെ നേരിട്ട് പ്രതിരോധിക്കാതെ കോൺഗ്രസ് നേതൃത്വം. സമുദായ സംഘടനകളുമായി തുറന്ന പോരിനില്ലെന്നും എല്ലാവരുമായും സൗഹൃദത്തിൽ പോകാനാണ് പാർട്ടി ആഗ്രഹിക്കുന്നതെന്നും കെ.പി.സി.സി അധ്യക്ഷൻ സണ്ണി ജോസഫ് വ്യക്തമാക്കി. സമുദായ നേതാക്കളുമായി നല്ല യോജിപ്പാണ് കോൺഗ്രസ് ലക്ഷ്യം വെക്കുന്നതെന്നും ആ ബന്ധം നിലനിർത്തി മുന്നോട്ട് പോകുമെന്നും അദ്ദേഹം പറഞ്ഞു.

വിവാദത്തിന് പിന്നിൽ സജി ചെറിയാൻ പ്രതിപക്ഷ നേതാവിന്റെ തിരുവനന്തപുരം പ്രസംഗം മുഖ്യമന്ത്രി പിണറായി വിജയന്റെ രാഷ്ട്രീയ പ്രസംഗത്തിനുള്ള മറുപടി മാത്രമായിരുന്നുവെന്ന് സണ്ണി ജോസഫ് വിശദീകരിച്ചു. സമുദായ സംഘടനകളെ അടച്ചാക്ഷേപിക്കാൻ സതീശൻ ശ്രമിച്ചിട്ടില്ല. എന്നാൽ മന്ത്രി സജി ചെറിയാനാണ് ഇതിനെ വളച്ചൊടിച്ച് വിവാദമാക്കിയത്. സജി ചെറിയാന്റെ വർഗീയ പ്രസ്താവനകളെയാണ് യഥാർത്ഥത്തിൽ എതിർക്കേണ്ടതെന്നും അദ്ദേഹം കൂട്ടിച്ചേർത്തു. സംഘടനകളുമായി എന്തെങ്കിലും പ്രയാസങ്ങളോ തെറ്റിദ്ധാരണകളോ ഉണ്ടെങ്കിൽ അത് ചർച്ചയിലൂടെ പരിഹരിക്കാൻ സാധിക്കുമെന്നും കോൺഗ്രസ് നേതൃത്വം വിശ്വസിക്കുന്നു.

കൊടിക്കുന്നിലിന്റെ മിന്നൽ സന്ദർശനം വിവാദങ്ങൾക്കിടെ പെരുന്നയിലെ എൻ.എസ്.എസ് ആസ്ഥാനത്ത് എത്തിയ കൊടിക്കുന്നിൽ സുരേഷ് എം.പി മാധ്യമപ്രവർത്തകരെ കണ്ടതോടെ മടങ്ങിയത് ശ്രദ്ധേയമായി. ചങ്ങനാശ്ശേരിയിൽ വരുമ്പോൾ പതിവായി എൻ.എസ്.എസ് ആസ്ഥാനത്ത് വരാറുണ്ടെന്നും ഇതിൽ പ്രത്യേക രാഷ്ട്രീയ ദൗത്യമൊന്നുമില്ലെന്നുമാണ് അദ്ദേഹം പ്രതികരിച്ചത്. എന്നാൽ സമുദായ സംഘടനകളുമായുള്ള അകൽച്ച പരിഹരിക്കാൻ കോൺഗ്രസ് നടത്തുന്ന നീക്കങ്ങളുടെ ഭാഗമാണ് ഈ സന്ദർശനമെന്ന് രാഷ്ട്രീയ നിരീക്ഷകർ കരുതുന്നു.

തിരഞ്ഞെടുപ്പ് ഭീതിയിൽ കോൺഗ്രസ് നിയമസഭാ തിരഞ്ഞെടുപ്പ് അടുത്തുവരുന്ന സാഹചര്യത്തിൽ സമുദായ സംഘടനകളെ പിണക്കുന്നത് തിരിച്ചടിയാകുമെന്ന് കോൺഗ്രസ് ഭയക്കുന്നുണ്ട്. വി.ഡി. സതീശൻ സ്വീകരിച്ച കർക്കശമായ നിലപാട് സമുദായ നേതാക്കളെ പ്രകോപിപ്പിച്ചത് പാർട്ടിക്കുള്ളിലും ചർച്ചയായിട്ടുണ്ട്. നേതാക്കൾ വ്യക്തിപരമായ നിലപാടുകൾ പറയുന്നതിനേക്കാൾ പാർട്ടിയുടെ പൊതുതാൽപര്യത്തിന് മുൻഗണന നൽകണമെന്ന അഭിപ്രായം ഒരു വിഭാഗം നേതാക്കൾക്കുണ്ട്.

സി.പി.ഐ.എം ഈ അവസരം മുതലെടുത്ത് സമുദായ സംഘടനകളെ തങ്ങളിലേക്ക് അടുപ്പിക്കാൻ ശ്രമിക്കുന്നത് കോൺഗ്രസിനെ ആശങ്കയിലാക്കുന്നു. അതുകൊണ്ടാണ് സതീശനെ പൂർണ്ണമായും തള്ളാതെ തന്നെ സമുദായ നേതാക്കളെ അനുനയിപ്പിക്കാനുള്ള മൃദുസമീപനം കെ.പി.സി.സി അധ്യക്ഷൻ സ്വീകരിച്ചിരിക്കുന്നത്. വരും ദിവസങ്ങളിൽ സമുദായ നേതാക്കളുമായി കോൺഗ്രസിന്റെ മുതിർന്ന നേതാക്കൾ ചർച്ചകൾ നടത്താൻ സാധ്യതയുണ്ട്. മതസാമുദായിക സൗഹൃദം നിലനിർത്തിക്കൊണ്ട് മാത്രമേ വരാനിരിക്കുന്ന തിരഞ്ഞെടുപ്പിനെ നേരിടാൻ സാധിക്കൂ എന്ന് കോൺഗ്രസ് നേതൃത്വം തിരിച്ചറിയുന്നു.

---------------

Hindusthan Samachar / Roshith K