Kottayam, 19 ജനുവരി (H.S.)

കോട്ടയം: വരാനിരിക്കുന്ന നിയമസഭാ തിരഞ്ഞെടുപ്പിൽ കേരളം ഉറ്റുനോക്കുന്ന അപ്രതീക്ഷിത നീക്കവുമായി യുഡിഎഫ്. സിപിഐയുടെ ഉറച്ച കോട്ടയായ വൈക്കം മണ്ഡലം തിരിച്ചുപിടിക്കാൻ പ്രമുഖ ദളിത് ചിന്തകനും സാമൂഹ്യ വിമർശകനുമായ സണ്ണി എം കപിക്കാടിനെ രംഗത്തിറക്കാൻ കോൺഗ്രസ് നേതൃത്വം ഗൗരവകരമായ ആലോചനകൾ നടത്തുന്നു. ദളിത്-ആദിവാസി ഏകോപനത്തിലൂടെ മണ്ഡലത്തിൽ അട്ടിമറി വിജയം നേടാനാണ് യുഡിഎഫ് ലക്ഷ്യമിടുന്നത്.

തന്ത്രങ്ങൾ മെനഞ്ഞ് വി.ഡി സതീശനും സുനിൽ കനഗോലുവും യുഡിഎഫിന് വിജയസാധ്യത കുറഞ്ഞ മണ്ഡലങ്ങളുടെ പട്ടികയിലാണ് വൈക്കം നിലവിലുള്ളതെന്ന് സുനിൽ കനഗോലുവിന്റെ നേതൃത്വത്തിൽ നടത്തിയ സർവേകൾ സൂചിപ്പിച്ചിരുന്നു. ഈ സാഹചര്യത്തിൽ, രാഷ്ട്രീയ പാരമ്പര്യമുള്ള സ്ഥിരം മുഖങ്ങൾക്ക് പകരം പൊതുസമൂഹത്തിൽ വലിയ സ്വീകാര്യതയുള്ള വ്യക്തിയെ സ്ഥാനാർഥിയാക്കണമെന്ന് പ്രതിപക്ഷ നേതാവ് വി.ഡി സതീശൻ നിലപാടെടുത്തു. എഐസിസി ജനറൽ സെക്രട്ടറി കെ.സി. വേണുഗോപാലിന്റെ പ്രത്യേക നിർദ്ദേശപ്രകാരമാണ് സണ്ണി എം കപിക്കാടിന്റെ പേര് ചർച്ചകളിലേക്ക് വന്നത്. മണ്ഡലത്തിലെ വോട്ട് വിഹിതം വർദ്ധിപ്പിക്കുന്നതിലുപരി, കേരളത്തിലെ ദളിത് വോട്ടുകൾ ഒപ്പം നിർത്താൻ ഈ സ്ഥാനാർഥിത്വം സഹായിക്കുമെന്ന് ഹൈക്കമാൻഡ് വിലയിരുത്തുന്നു.

ദളിത് രാഷ്ട്രീയത്തിലെ കരുത്തനായ സാന്നിധ്യം കേരളത്തിലെ ആദിവാസി-ദളിത് സമരചരിത്രങ്ങളിൽ നിർണ്ണായക പങ്കുവഹിച്ച വ്യക്തിയാണ് സണ്ണി എം കപിക്കാട്. സി.കെ ജാനുവിനും എം ഗീതാനന്ദനുമൊപ്പം ആദിവാസി ഗോത്ര മഹാസഭയുടെ ആദ്യകാല പോരാട്ടങ്ങളിൽ അദ്ദേഹം മുന്നിലുണ്ടായിരുന്നു. ചാനൽ ചർച്ചകളിലെ യുക്തിഭദ്രമായ നിലപാടുകളും സാമൂഹ്യ വിഷയങ്ങളിലെ ഇടപെടലുകളും അദ്ദേഹത്തിന് വലിയൊരു ജനകീയ അടിത്തറ നൽകിയിട്ടുണ്ട്. സണ്ണിയുടെ സ്ഥാനാർഥിത്വത്തെ അനുകൂലിച്ച് ദളിത് ചിന്തകൻ കെ.കെ ബാബുരാജ് ഉൾപ്പെടെയുള്ളവർ രംഗത്തെത്തിയത് ഈ നീക്കത്തിന് കൂടുതൽ രാഷ്ട്രീയ പ്രാധാന്യം നൽകുന്നു.

സി.കെ ജാനുവിനെ യുഡിഎഫ് അസോസിയേറ്റ് അംഗമാക്കാനുള്ള തീരുമാനത്തിന് പിന്നാലെ സണ്ണിയെ കൂടി മുന്നണിയുടെ ഭാഗമാക്കുന്നതിലൂടെ ദളിത്-ആദിവാസി വിഭാഗങ്ങളെ പൂർണ്ണമായും യുഡിഎഫിനോട് അടുപ്പിക്കാൻ സാധിക്കുമെന്നാണ് കെപിസിസിയുടെ കണക്കുകൂട്ടൽ. ജനുവരി 22-ന് നടക്കുന്ന അവസാനഘട്ട ചർച്ചകൾക്ക് ശേഷം യുഡിഎഫ് ഔദ്യോഗികമായി സ്ഥാനാർഥിയെ പ്രഖ്യാപിക്കുമെന്നാണ് കരുതുന്നത്.

ഇടതുകോട്ടയിൽ മാറ്റത്തിന്റെ കാറ്റടിക്കുമോ? നിലവിൽ സിപിഐ നേതാവ് സി.കെ ആശയാണ് വൈക്കത്തെ പ്രതിനിധീകരിക്കുന്നത്. ചരിത്രപരമായി ഇടതുപക്ഷത്തെ പിന്തുണയ്ക്കുന്ന വൈക്കത്ത് കോൺഗ്രസിന് മുൻപ് നേട്ടമുണ്ടാക്കാൻ സാധിച്ചത് കെ.ആർ നാരായണനെയും കെ.കെ ബാലകൃഷ്ണനെയും പോലുള്ള പ്രമുഖരിലൂടെയാണ്. ആ ചരിത്രം ആവർത്തിക്കാൻ സണ്ണി എം കപിക്കാടിന്റെ വരവ് സഹായിക്കുമെന്നാണ് യുഡിഎഫ് പ്രവർത്തകരുടെ പ്രതീക്ഷ. ഒരു ദളിത് ചിന്തകൻ നിയമസഭയിലേക്ക് എത്തുന്നത് കേരളത്തിന്റെ സാമൂഹികാന്തരീക്ഷത്തിൽ വലിയ മാറ്റങ്ങൾക്ക് വഴിയൊരുക്കുമെന്ന് ആക്ടിവിസ്റ്റുകളും നിരീക്ഷിക്കുന്നു.

ഈ വാർത്തയോട് സണ്ണി എം കപിക്കാടോ യുഡിഎഫ് നേതൃത്വമോ ഔദ്യോഗികമായി ഇതുവരെ പ്രതികരിച്ചിട്ടില്ലെങ്കിലും സോഷ്യൽ മീഡിയയിൽ ഉൾപ്പെടെ വലിയ ആവേശമാണ് സണ്ണിയുടെ സ്ഥാനാർഥിത്വ ചർച്ചകൾ ഉണ്ടാക്കിയിരിക്കുന്നത്. സണ്ണി എം കപിക്കാട് മത്സരരംഗത്തിറങ്ങിയാൽ വൈക്കം ഇത്തവണത്തെ തിരഞ്ഞെടുപ്പിലെ ഏറ്റവും വലിയ പോരാട്ടവേദിയായി മാറും എന്നതിൽ സംശയമില്ല.

---------------

Hindusthan Samachar / Roshith K