Enter your Email Address to subscribe to our newsletters
Thiruvanathapura, 19 ജനുവരി (H.S.)
കേരളത്തിലെ യുവതീയുവാക്കളുടെ തൊഴില് സ്വപ്നങ്ങള്ക്ക് കരുത്തുപകരാന് ലക്ഷ്യമിട്ടുള്ള സംസ്ഥാന സര്ക്കാരിന്റെ'മുഖ്യമന്ത്രിയുടെ കണക്ട് ടു വര്ക്ക്'പദ്ധതിയുടെ സംസ്ഥാനതല ഉദ്ഘാടനം ജനുവരി 21ന് നടക്കും. തിരുവനന്തപുരം നിശാഗന്ധി ഓഡിറ്റോറിയത്തില് വൈകുന്നേരം 4 മണിക്ക് നടക്കുന്ന ചടങ്ങില് മുഖ്യമന്ത്രി പിണറായി വിജയന് പദ്ധതിയുടെ ഉദ്ഘാടനം നിര്വ്വഹിക്കും. തൊഴിലും നൈപുണ്യവും വകുപ്പിന് കീഴിലുള്ള നാഷണല് എംപ്ലോയ്മെന്റ് സര്വീസ് വഴിയാണ് ഈ ബൃഹത്തായ പദ്ധതി നടപ്പിലാക്കുന്നത്.
തൊഴില് നൈപുണ്യ വികസനത്തിനായി പരിശീലനം നേടുന്നവര്ക്കും വിവിധ മത്സരപരീക്ഷകള്ക്കായി തയ്യാറെടുക്കുന്നവര്ക്കുമുള്ള സാമ്പത്തിക കൈത്താങ്ങാണിത്. പദ്ധതി പ്രകാരം തിരഞ്ഞെടുക്കപ്പെടുന്ന ഉദ്യോഗാര്ത്ഥികള്ക്ക് പ്രതിമാസം 1000 രൂപ വീതം ഒരു വര്ഷക്കാലം ധനസഹായമായി ലഭിക്കും. പ്ലസ് ടു/വി.എച്ച്.എസ്.ഇ/ഐ.ടി.ഐ/ഡിപ്ലോമ/ബിരുദം വിജയകരമായി പൂര്ത്തിയാക്കിയ ശേഷം നൈപുണ്യ പരിശീലനത്തില് ഏര്പ്പെട്ടിരിക്കുന്നവര്ക്കും മത്സരപരീക്ഷകള്ക്ക് തയ്യാറെടുക്കുന്നവര്ക്കുമാണ് ആനുകൂല്യത്തിന് അര്ഹത.
പതിനെട്ടിനും മുപ്പതിനും ഇടയില് പ്രായമുള്ളവരും വാര്ഷിക കുടുംബ വരുമാനം 5 ലക്ഷം രൂപയില് താഴെയുള്ളവരുമായ ഉദ്യോഗാര്ത്ഥികള്ക്ക് പദ്ധതിയിലേക്ക് അപേക്ഷിക്കാം. താല്പര്യമുള്ളവര്eemployment.kerala.gov.inഎന്ന ഔദ്യോഗിക പോര്ട്ടല് മുഖേന അപേക്ഷ സമര്പ്പിക്കണം. അപേക്ഷകര്ക്ക് സംശയനിവാരണത്തിനായി അടുത്തുള്ള എംപ്ലോയ്മെന്റ് എക്സ്ചേഞ്ചുകളുമായി ബന്ധപ്പെടാവുന്നതാണ്.
ഉദ്ഘാടന ചടങ്ങില് പൊതുവിദ്യാഭ്യാസ-തൊഴില് വകുപ്പ് മന്ത്രി വി. ശിവന്കുട്ടി അധ്യക്ഷത വഹിക്കും. മന്ത്രിമാരായ കെ. രാജന്,റോഷി അഗസ്റ്റിന്,കെ. കൃഷ്ണന്കുട്ടി,എ.കെ. ശശീന്ദ്രന്,രാമചന്ദ്രന് കടന്നപ്പള്ളി,കെ.ബി.ഗണേഷ് കുമാര്,കെ.എന്. ബാലഗോപാല്,ജി. ആര്. അനില്,ശശി തരൂര് എം.പി,രാജ്യസഭ അംഗം എ. എ. റഹീം,വി. കെ. പ്രശാന്ത് എം. എല്. എ,മേയര് വി. വി. രാജേഷ്,ജില്ലാ പഞ്ചായത്ത് പ്രസിഡന്റ് വി. പ്രിയദര്ശിനി,കൗണ്സിലര് കെ. ആര്. ക്ലീറ്റസ്,തൊഴില് -നൈപുണ്യ വകുപ്പ് സ്പെഷ്യല് സെക്രട്ടറി എസ്. ഷാനവാസ്,എംപ്ലോയ്മെന്റ് ഡയറക്ടര് സുഫിയാന് അഹമദ് തുടങ്ങിയവര് സംബന്ധിക്കും.
---------------
Hindusthan Samachar / Sreejith S
