Kerala, 19 ജനുവരി (H.S.)

മലപ്പുറം: തദ്ദേശ തിരഞ്ഞെടുപ്പിലെ ഫലം വർഗ്ഗീയ ധ്രുവീകരണത്തിന്റെ തെളിവാണെന്ന മന്ത്രി സജി ചെറിയാന്റെ പ്രസ്താവനയ്ക്കെതിരെ രൂക്ഷമായ പ്രതികരണവുമായി മുസ്ലിം ലീഗ് നേതൃത്വം. നാല് വോട്ടുകൾക്ക് വേണ്ടി വർഗ്ഗീയ ധ്രുവീകരണമുണ്ടാക്കുക എന്നത് മുസ്ലിം ലീഗിന്റെ ലക്ഷ്യമല്ലെന്ന് പാണക്കാട് സാദിഖലി ശിഹാബ് തങ്ങൾ വ്യക്തമാക്കി. മലപ്പുറത്തെയും കാസർകോട്ടെയും വിജയങ്ങളെ വർഗ്ഗീയതയുമായി ബന്ധിപ്പിച്ച മന്ത്രിയുടെ പ്രസ്താവന കേരളത്തിലെ മതസൗഹാർദ്ദത്തിന് വിരുദ്ധമാണെന്നും അദ്ദേഹം പറഞ്ഞു.

മതസൗഹാർദ്ദത്തിന്റെയും മതേതരത്വത്തിന്റെയും പാഠമാണ് ലീഗ് എപ്പോഴും ഉയർത്തിപ്പിടിച്ചിട്ടുള്ളത്. ജനങ്ങളെ ഭിന്നിപ്പിക്കാതെ തന്നെ വോട്ട് ചോദിക്കാനുള്ള ആർജ്ജവം ലീഗിനുണ്ട്. അത്തരം ധൈര്യമില്ലാത്തവരാണ് ഇപ്പോൾ വർഗ്ഗീയ പരാമർശങ്ങളുമായി രംഗത്തെത്തുന്നത്. അന്തരീക്ഷം വഷളാക്കി രാഷ്ട്രീയ നേട്ടമുണ്ടാക്കാനാണ് മന്ത്രി ശ്രമിക്കുന്നതെന്നും സാദിഖലി തങ്ങൾ കൂട്ടിച്ചേർത്തു.

ഭരണപക്ഷത്തിന് ആത്മവിശ്വാസമില്ല: പി.കെ. കുഞ്ഞാലിക്കുട്ടി

വരാനിരിക്കുന്ന തിരഞ്ഞെടുപ്പുകളെ നേരിടാനുള്ള ആത്മവിശ്വാസം സർക്കാരിനും ഇടതുമുന്നണിക്കും നഷ്ടപ്പെട്ടതായാണ് സജി ചെറിയാന്റെ വാക്കുകൾ സൂചിപ്പിക്കുന്നതെന്ന് ലീഗ് നേതാവ് പി.കെ. കുഞ്ഞാലിക്കുട്ടി പറഞ്ഞു. മലപ്പുറം ജില്ലയെയും ഒരു പ്രത്യേക ജനവിഭാഗത്തെയും നിരന്തരമായി ടാർഗറ്റ് ചെയ്യുന്നത് രാഷ്ട്രീയ പാപ്പരത്തമാണ്. ഇതിന് മുമ്പ് ഒരിക്കലും ഇല്ലാത്ത വിധം ഇത്ര വലിയ വർഗ്ഗീയതയാണ് ഇപ്പോൾ ഇവർ പറഞ്ഞു നടക്കുന്നത്. ആത്മവിശ്വാസം പൂർണ്ണമായും തകർന്ന ഒരു ഘട്ടത്തിലാണ് ഇത്തരം പ്രസ്താവനകൾ ഉണ്ടാകുന്നതെന്നും അദ്ദേഹം പരിഹസിച്ചു.

പ്രതിപക്ഷ പ്രതിഷേധം ശക്തമാകുന്നു

സജി ചെറിയാന്റെ പ്രസ്താവന ആപത്കരമാണെന്നും ഇത് മുഖ്യമന്ത്രി പിണറായി വിജയന്റെ അറിവോടെയാണെന്നും പ്രതിപക്ഷ നേതാവ് വി.ഡി. സതീശൻ ആരോപിച്ചു. കേരള ചരിത്രത്തിൽ ഒരു മന്ത്രിയും നടത്താത്ത അങ്ങേയറ്റം വിദ്വേഷപരമായ പരാമർശമാണിത്. ആളുകളെ ഭിന്നിപ്പിച്ച് രാഷ്ട്രീയ ലാഭമുണ്ടാക്കുക എന്ന സംഘപരിവാർ രീതിയാണ് സിപിഐഎം ഇപ്പോൾ പയറ്റുന്നത്. ഭരണഘടനാ പദവിയിലിരിക്കുന്ന ഒരാൾ ഇത്തരത്തിൽ വർഗ്ഗീയ വിഷം ചീറ്റുന്നത് അങ്ങേയറ്റം അപകടകരമാണെന്നും സതീശൻ വ്യക്തമാക്കി.

അതേസമയം, സജി ചെറിയാന്റെ പരാമർശത്തിൽ സിപിഐഎം നേതൃത്വത്തിനുള്ളിലും അതൃപ്തി പുകയുന്നതായാണ് സൂചന. പാർട്ടി സംസ്ഥാന സെക്രട്ടറി എം.വി. ഗോവിന്ദൻ ഈ വിഷയത്തിലുള്ള ചോദ്യങ്ങളിൽ നിന്ന് ഒഴിഞ്ഞുമാറിയത് ഇത് വ്യക്തമാക്കുന്നു. വിവാദം കൊഴുത്തതോടെ തന്റെ പ്രസ്താവന വളച്ചൊടിച്ചതാണെന്നും ഒരു പ്രത്യേക മതവിഭാഗത്തിന് എതിരെയല്ല താൻ സംസാരിച്ചതെന്നും വിശദീകരിച്ച് മന്ത്രി സജി ചെറിയാൻ പിന്നീട് രംഗത്തെത്തി. എങ്കിലും തദ്ദേശ തിരഞ്ഞെടുപ്പിന് പിന്നാലെ കേരളത്തിൽ വീണ്ടും വർഗ്ഗീയ ധ്രുവീകരണ ചർച്ചകൾക്ക് ഈ പ്രസ്താവന തിരികൊളുത്തിയിരിക്കുകയാണ്.

---------------

Hindusthan Samachar / Roshith K