Pathanamthitta / 20 ജനുവരി (H.S.)

തിരുവനന്തപുരം/പത്തനംതിട്ട: ശബരിമല സന്നിധാനത്തെ സ്വർണ്ണപ്പാളികൾ മോഷ്ടിക്കപ്പെട്ട സംഭവത്തിൽ അന്വേഷണം വ്യാപിപ്പിച്ച് എൻഫോഴ്സ്മെന്റ് ഡയറക്ടറേറ്റ് (ഇ.ഡി). കേസിലെ പ്രധാന പ്രതികളുടെ വീടുകളിലും ദേവസ്വം ബോർഡ് ആസ്ഥാനത്തും ഉൾപ്പെടെ മൂന്ന് സംസ്ഥാനങ്ങളിലായി 21 കേന്ദ്രങ്ങളിൽ ചൊവ്വാഴ്ച രാവിലെ മുതൽ ഇ.ഡി സംഘം ഒരേസമയം പരിശോധന ആരംഭിച്ചു. കൊള്ളയുമായി ബന്ധപ്പെട്ട കള്ളപ്പണ ഇടപാടുകളും ബിനാമി സ്വത്തുക്കളും കണ്ടെത്തുകയാണ് പരിശോധനയുടെ പ്രധാന ലക്ഷ്യം.

പ്രതികളുടെ വീടുകളിൽ വ്യാപക പരിശോധന തിരുവനന്തപുരം കാരേറ്റിലുള്ള കേസിലെ ഒന്നാം പ്രതി ഉണ്ണികൃഷ്ണൻ പോറ്റിയുടെ വീട്ടിലാണ് പ്രധാനമായും പരിശോധന നടക്കുന്നത്. കൂടാതെ, ദേവസ്വം മുൻ പ്രസിഡന്റ് എ. പത്മകുമാറിന്റെ ആറന്മുളയിലെ വീട്ടിലും മുൻ പ്രസിഡന്റ് എൻ. വാസുവിന്റെ വീട്ടിലും ഇ.ഡി ഉദ്യോഗസ്ഥർ തെളിവെടുപ്പ് നടത്തുന്നുണ്ട്. സ്വർണ്ണക്കടത്തുമായി ബന്ധപ്പെട്ട് അറസ്റ്റിലായ ബെല്ലാരിയിലെ സ്വർണ്ണ വ്യാപാരി ഗോവർധന്റെ വസതിയിലും ബംഗളൂരുവിലെ സ്മാർട്ട് ക്രിയേഷൻസ് എന്ന സ്ഥാപനത്തിന്റെ ഓഫീസിലും പരിശോധന തുടരുകയാണ്.

അന്വേഷണം വിപുലമാക്കി ഇ.ഡി കേസിൽ ഇ.സി.ഐ.ആർ (ECIR) രജിസ്റ്റർ ചെയ്തതിന് പിന്നാലെയാണ് ഇ.ഡി നിർണ്ണായക നീക്കങ്ങളിലേക്ക് കടന്നത്. പ്രതികളുടെയും അവരുടെ അടുത്ത ബന്ധുക്കളുടെയും ബാങ്ക് അക്കൗണ്ട് വിവരങ്ങൾ, സാമ്പത്തിക ഇടപാടുകൾ എന്നിവയെക്കുറിച്ചുള്ള രേഖകൾ ഇ.ഡി ശേഖരിച്ചു കഴിഞ്ഞു. തിരുവനന്തപുരം ദേവസ്വം ബോർഡ് ആസ്ഥാനത്തെത്തി സ്വർണ്ണപ്പാളിയുമായി ബന്ധപ്പെട്ട രേഖകൾ പിടിച്ചെടുക്കാനും ഇ.ഡി ലക്ഷ്യമിടുന്നുണ്ട്. കേരളത്തിലെ കൊച്ചി, കോഴിക്കോട് യൂണിറ്റുകൾക്ക് പുറമെ ബംഗളൂരു, ചെന്നൈ എന്നിവിടങ്ങളിൽ നിന്നുള്ള ഉദ്യോഗസ്ഥരും റെയ്ഡിൽ പങ്കെടുക്കുന്നുണ്ട്.

അന്തർസംസ്ഥാന ബന്ധങ്ങൾ ശബരിമലയിലെ സ്വർണ്ണക്കൊള്ളയ്ക്ക് വലിയ രീതിയിലുള്ള അന്തർസംസ്ഥാന ബന്ധങ്ങളുണ്ടെന്നാണ് അന്വേഷണ ഏജൻസികൾ കരുതുന്നത്. കർണ്ണാടകയിലും തമിഴ്നാട്ടിലും പരിശോധന നടക്കുന്നത് ഈ സംശയത്തെ ബലപ്പെടുത്തുന്നു. സ്വർണ്ണപ്പാളികൾ ഉരുക്കി കടത്തിയതായും ഇതിലൂടെ ലഭിച്ച തുക ബിനാമി പേരുകളിൽ നിക്ഷേപിച്ചതായും ഇ.ഡി സംശയിക്കുന്നു. പ്രതികളുടെ സ്വത്തുക്കൾ കണ്ടുകെട്ടുന്നതിനുള്ള നടപടികളുടെ ഭാഗമാണ് ഈ പ്രാഥമിക പരിശോധനകൾ.

പോലീസും ഇ.ഡിയും ഒരേസമയം രംഗത്ത് സംസ്ഥാന പോലീസിന്റെ പ്രത്യേക അന്വേഷണ സംഘം (SIT) സന്നിധാനത്ത് വിശദമായ പരിശോധന നടത്താൻ ഇരിക്കെയാണ് അപ്രതീക്ഷിതമായി ഇ.ഡി രംഗത്തെത്തിയത്. സംസ്ഥാന സർക്കാരിന്റെ അന്വേഷണം കാര്യക്ഷമമല്ലെന്നും സിബിഐ അന്വേഷണം വേണമെന്നും തന്ത്രി സമാജം ഉൾപ്പെടെയുള്ള സംഘടനകൾ ആവശ്യപ്പെട്ടിരുന്നു. ഇതിനിടയിലാണ് കേന്ദ്ര ഏജൻസിയായ ഇ.ഡി സാമ്പത്തിക ക്രമക്കേടുകൾ അന്വേഷിക്കാൻ എത്തിയത്.

ദേവസ്വം ബോർഡിന്റെ ഉന്നത ഉദ്യോഗസ്ഥർ പലരും പരിശോധന സമയത്ത് ഓഫീസിൽ ഹാജരാകാത്തത് തുടക്കത്തിൽ ഉദ്യോഗസ്ഥരെ വലച്ചിരുന്നു. എന്നാൽ രേഖകൾ പരിശോധിക്കാതെ മടങ്ങില്ലെന്ന കർശന നിലപാടിലാണ് ഇ.ഡി സംഘം. ശബരിമല സ്വർണ്ണക്കൊള്ള കേസിൽ വരും ദിവസങ്ങളിൽ കൂടുതൽ പ്രമുഖർ ഇ.ഡി വലയിലാകുമെന്നാണ് സൂചന. ഭക്തലക്ഷങ്ങൾ പുണ്യമായി കരുതുന്ന ശബരിമലയിലെ സ്വർണ്ണ ശേഖരത്തിൽ നടന്ന ഈ തിരിമറി കേരളാ സമൂഹത്തെയും വിശ്വാസികളെയും ഒരുപോലെ ഞെട്ടിച്ചിരിക്കുകയാണ്.

---------------

Hindusthan Samachar / Roshith K