Enter your Email Address to subscribe to our newsletters
Thiruvanathapuram, 06 ജനുവരി (H.S.)
കേരളത്തില് നിന്നുളള ആരോഗ്യ പ്രവര്ത്തകരെ ഡെന്മാര്ക്കിലേക്ക് റിക്രൂട്ട് ചെയ്യുന്നതിനായി നോര്ക്ക റൂട്സും ഡെന്മാര്ക്ക് മിനിസ്ട്രി ഓഫ് സീനിയര് സിറ്റിസണ്സും തമ്മിലുളള കരാര് ജനുവരി 8ന് കൈമാറും. മുഖ്യമന്ത്രി പിണറായി വിജയന്, ഡെന്മാര്ക്ക് മിനിസ്റ്റര് ഓഫ് സീനിയര് സിറ്റിസണ്സ് മെറ്റെ കിയര്ക്ക്ഗാര്ഡ്, ഇന്ത്യയിലെ ഡെന്മാര്ക്ക് അംബാസിഡര് റാസ്മസ് അബില്ഡ്ഗാര്ഡ് ക്രിസ്റ്റന്സന്, നോര്ക്ക റൂട്ട്സ് റസിഡന്റ് വൈസ് ചെയര്മാന് പി. ശ്രീരാമകൃഷ്ണന്, നോര്ക്ക വകുപ്പ് സെക്രട്ടറി ടി.വി അനുപമ എന്നിവരുടെ സാന്നിധ്യത്തിലാണ് ചടങ്ങ്. രാവിലെ 11.15 ന് മുഖ്യമന്ത്രിയുടെ ഓഫീസ് ചേംബറില് നടക്കുന്ന ചടങ്ങില് ഡെന്മാര്ക്കിലെ മിനിസ്ട്രി ഓഫ് സീനിയര് സിറ്റിസന്സ് ഡെപ്യൂട്ടി പെര്മനന്റ് സെക്രട്ടറി കിര്സ്റ്റന് ഹാന്സനും നോര്ക്ക റൂട്ട്സ് ചീഫ് എക്സിക്യൂട്ടീവ് ഓഫീസര് അജിത് കോളശ്ശേരിയും തമ്മിലാണ് കരാര് കൈമാറുക. ഡെന്മാര്ക്കിലെ പൊതു ആരോഗ്യ മേഖലയിലേക്ക് ബി എസ് സി നഴ്സ്, സോഷ്യല് ആന്ഡ് ഹെല്ത്ത് കെയര് അസിസ്റ്റന്റ്സ്, സോഷ്യല് ആന്ഡ് ഹെല്ത്ത് കെയര് ഹെല്പ്പേഴ്സ് എന്നീ പ്രൊഫെഷനുകളിലേയ്ക്കാണ് റിക്രൂട്മെന്റ്. തിരഞ്ഞെടുക്കപ്പെടുന്ന എല്ലാ ഉദ്യോഗാര്ത്ഥികള്ക്കും ബി 2 ലെവല് വരെയുളള ഡാനിഷ് ഭാഷാ പരിശീലനവും ലഭ്യമാക്കും. റിക്രൂട്ട്മെന്റ് നടപടികള് പൂര്ണ്ണമായും സൗജന്യമായിരിക്കുമെന്ന് പി. ശ്രീരാമകൃഷ്ണന് അറിയിച്ചു. ആദ്യഘട്ടത്തില് 100 പേരെയാണ് റിക്രൂട്ട് ചെയ്യുക. അഞ്ചു വര്ഷത്തേയ്ക്കാണ് കരാര്.
നാളെ (ജനുവരി 7 ന്) തിരുവനന്തപുരത്തെത്തുന്ന എട്ടംഗ ഡെന്മാര്ക്ക് മന്ത്രിതല പ്രതിനിധി സംഘം ഉന്നത വിദ്യാഭ്യാസ സാമൂഹ്യനീതി വകുപ്പ് മന്ത്രി ആര്.ബിന്ദു, ആരോഗ്യ വനിതാ ശിശു വികസന വകുപ്പ് മന്ത്രി വീണാ ജോര്ജ്ജ് എന്നിവരുമായും കൂടിക്കാഴ്ച നടത്തും. തിരുവനന്തപുരം മെഡിക്കല് കോളേജും നഴ്സിംഗ് കോളേജും സന്ദര്ശിക്കുന്ന ഡെന്മാര്ക്ക് സംഘം നഴ്സിംങ് വിദ്യാര്ത്ഥികളുമായും സംവദിക്കും. മിനിസ്റ്റീരിയല് സെക്രട്ടറി ഫീ ലിഡാല് ജോഹാന്സന്, സീനിയര് അഡൈ്വസര് എസ്പന് ക്രോഗ്, എംബസിയില് നിന്നും ഹെഡ് ഓഫ് സെക്ടര് പോളിസി എമില് സ്റ്റോവ്രിംഗ് ലോറിറ്റ്സന്, ഹെല്ത്ത് കൗണ്സിലര് ലൂയിസ് സെവല് ലുണ്ട്സ്ട്രോം, പ്രോഗ്രാം ഓഫീസര് നികേത് ഗെഹ്ലാവത്, നോര്ക്ക റൂട്ട്സ് റിക്രൂട്ട്മെന്റ് മാനേജര് പ്രകാശ് പി ജോസഫ് എന്നിവരും ചടങ്ങില് സംബന്ധിക്കും. കരാര് കൈമാറ്റ നടപടികള്ക്കു ശേഷം ജനുവരി 8 ന് ഉച്ചകഴിഞ്ഞ് തൈക്കാട് ലെമണ് ട്രീ ഹോട്ടലില് (ടാന്ജറിന് 3 ആര് ഫ്ലോര്) കേരള-ഡെന്മാര്ക്ക് ഹെല്ത്ത്കെയര് റിക്രൂട്ട്മെന്റ് പാര്ട്ണര്ഷിപ്പ് മീറ്റും ചേരും.
---------------
Hindusthan Samachar / Sreejith S
