Enter your Email Address to subscribe to our newsletters
New delhi, 16 ഫെബ്രുവരി (H.S.)
പ്രധാനമന്ത്രി നരേന്ദ്ര മോദിയുടെ നയതന്ത്ര ഇടപെടലുകള്ക്ക് പ്രശംസയുമായി ഇന്ത്യന് ഗ്രാന്ഡ് മുഫ്തി കാന്തപുരം എ.പി. അബൂബക്കര് മുസല്യാര്. പ്രധാനമന്ത്രിയുമായി നടത്തിയ കൂടിക്കാഴ്ചയിലാണ് കാന്തപുരം ഇക്കാര്യം വ്യക്തമാക്കിയത്. ഡല്ഹിയില് നടന്ന കൂടിക്കാഴ്ചയില് വിവിധ സാമൂഹിക-മാനുഷിക-വിദ്യാഭ്യാസ-വികസന വിഷയങ്ങളും ന്യൂനപക്ഷ ക്ഷേമ കാര്യങ്ങളും രാജ്യാന്തര സംഭവങ്ങളും ചര്ച്ചയായി.
കേരളയാത്രക്കിടെ സമൂഹത്തിലെ വിവിധ കോണുകളില് നിന്നും ഉയര്ന്നുവന്ന വിഷയങ്ങള് അബൂബക്കര് മുസല്യാര് പ്രധാനമന്ത്രിയുടെ ശ്രദ്ധയില്പ്പെടുത്തി. ന്യാനപക്ഷങ്ങളുടെ ആശങ്കകളും കൂടിക്കാഴ്ചയില് ചര്ച്ചയായി. റംസാന് സന്ദേശവും കൈമാറിയ ശേഷമാണു കൂടിക്കാഴ്ച അവസാനിച്ചത്.
എല്ലാ ജനവിഭാഗങ്ങളെയും ഉള്ക്കൊണ്ടുള്ള വികസനം, സാമ്പത്തിക മുന്നേറ്റത്തിനൊപ്പം സന്തോഷ സൂചികയ്ക്കും മാനവ വികസനത്തിനും നല്കേണ്ട പരിഗണന, ജനസംഖ്യാനുപാതികവും പ്രാദേശിക സന്തുലിതവുമായി വിഭവങ്ങള് ലഭ്യമാക്കേണ്ടതിന്റെ പ്രാധാന്യം, വഖ്ഫ്-എസ്ഐആര് ആശങ്കകള്, പുരാതന മസ്ജിദുകളും ഇസ്ലാമിക പൈതൃക സ്മാരകങ്ങളും സംരക്ഷിക്കല്, മൗലാനാ ആസാദ് നാഷനല് ഫെല്ലോഷിപ്പ് ഉള്പ്പെടയുള്ള ന്യൂനപക്ഷ വിദ്യാഭ്യാസ ക്ഷേമ പദ്ധതികളുടെ പുനഃസ്ഥാപനം, അലിഗഡ് സര്വകലാശാല മലപ്പുറം സെന്റര് വികസനം, രാജ്യത്തെ ന്യൂനപക്ഷ ജനവിഭാഗവുമായി കേന്ദ്രസര്ക്കാര് അടുത്തിടപെടേണ്ടതിന്റെ ആവശ്യകത തുടങ്ങിയ വിഷയങ്ങള് കൂടിക്കാഴ്ചയില് സംസാരവിഷയമായി. രാജ്യാന്തര തലത്തില് സമാധാനം ഉറപ്പുവരുത്തുന്നതില് പ്രധാനമന്ത്രിയുടെ നേതൃത്വത്തില് നടത്തുന്ന നയതന്ത്ര ഇടപെടലുകളെ കാന്തപുരം എ.പി. അബൂബക്കര് മുസല്യാര് അഭിനന്ദിച്ചു.
---------------
Hindusthan Samachar / Sreejith S
