Kerala, 16 ഫെബ്രുവരി (H.S.)

തിരുവനന്തപുരം: മലയാള മിനിസ്ക്രീൻ പ്രേക്ഷകരുടെ പ്രിയതാരം രേഖ രതീഷ് സോഷ്യൽ മീഡിയയിലൂടെ പങ്കുവെച്ച ഹൃദയഭേദകമായ വീഡിയോ ഇപ്പോൾ വലിയ ചർച്ചയായിരിക്കുകയാണ്. യൂട്യൂബർമാരുടെ നിരന്തരമായ സൈബർ ആക്രമണവും വ്യക്തിഹത്യയും മൂലം താൻ കടുത്ത മാനസിക സമ്മർദ്ദത്തിലാണെന്നും, തനിക്കെന്തെങ്കിലും സംഭവിച്ചാൽ അതിന്റെ പൂർണ്ണ ഉത്തരവാദിത്തം ഇത്തരം വീഡിയോകൾ നിർമ്മിക്കുന്നവർക്കാണെന്നും താരം പറഞ്ഞു. മുഖ്യമന്ത്രി പിണറായി വിജയനെ മെൻഷൻ ചെയ്തുകൊണ്ടാണ് ഇൻസ്റ്റാഗ്രാമിലൂടെ രേഖ ഈ വൈകാരിക പ്രതികരണം നടത്തിയത്.

ജീവിക്കാൻ അനുവദിക്കാത്ത സൈബർ ആക്രമണം

കഴിഞ്ഞ ഒൻപത് മാസമായി തനിക്ക് ജോലിയില്ലെന്നും ഒൻപതാം ക്ലാസ്സിൽ പഠിക്കുന്ന മകന്റെ കാര്യങ്ങൾ നോക്കാൻ കഷ്ടപ്പെടുകയാണെന്നും രേഖ വീഡിയോയിൽ പറയുന്നു. ഇതിനിടയിലാണ് മൂന്ന് മാസത്തോളമായി ഒരു കൂട്ടം യൂട്യൂബർമാർ മോശമായ ക്യാപ്ഷനുകൾ നൽകി തന്നെക്കുറിച്ച് വ്യാജ വീഡിയോകൾ പ്രചരിപ്പിക്കുന്നത്. ഇവർ എന്നെ ജീവിക്കാൻ അനുവദിക്കുന്നില്ല. മകന് വേണ്ടി കഷ്ടപ്പെട്ട് ജീവിക്കാൻ ശ്രമിക്കുന്ന ഒരു സ്ത്രീയാണ് ഞാൻ. എന്നാൽ ഈ ആക്രമണങ്ങൾ കാരണം മുന്നോട്ട് പോകാനുള്ള ശേഷി എനിക്ക് നഷ്ടപ്പെടുകയാണ്, എന്ന് കരഞ്ഞുകൊണ്ട് രേഖ പറയുന്നു.

വിവാദത്തിന് കാരണമായ വീഡിയോ

കഴിഞ്ഞ ദിവസം രേഖ ഇൻസ്റ്റാഗ്രാമിൽ പങ്കുവെച്ച ഒരു വീഡിയോയാണ് പുതിയ വിവാദങ്ങൾക്ക് തുടക്കമിട്ടത്. എന്റെ ജീവിതത്തിൽ ഇന്ന് ഞാൻ ഏറ്റവും വലിയൊരു തീരുമാനമെടുക്കുകയാണ്. എന്റെ ജീവിതത്തിലൂടെ കടന്നുപോയ കാര്യങ്ങൾ എല്ലാവർക്കും അറിയാം. ഇനി വരുന്നത് ഏറ്റവും മനോഹരമായ തീരുമാനമാണ്, എന്നായിരുന്നു വീഡിയോയിലെ ഉള്ളടക്കം. 'എ ന്യൂ ചാപ്റ്റർ' (A New Chapter) എന്ന തലക്കെട്ടോടെ നൽകിയ ഈ വീഡിയോയിൽ നടൻ ഈശ്വറുമായി താരം സംസാരിക്കുന്നതും കാണാമായിരുന്നു.

ഇതിന് പിന്നാലെ രേഖ അഞ്ചാം വിവാഹത്തിന് തയ്യാറെടുക്കുന്നു എന്ന തരത്തിൽ നിരവധി യൂട്യൂബ് ചാനലുകൾ വാർത്തകൾ പടച്ചുവിട്ടു. യാതൊരു അടിസ്ഥാനവുമില്ലാത്ത ഇത്തരം വാർത്തകൾ തന്റെ സ്വകാര്യ ജീവിതത്തെയും മാനസികാവസ്ഥയെയും തകർക്കുന്നു എന്നാണ് താരം ആരോപിക്കുന്നത്.

മുഖ്യമന്ത്രിയോടുള്ള അപേക്ഷ

കേരളത്തിൽ സൈബർ ആക്രമണങ്ങൾ കാരണം നിരവധി ജീവനുകൾ ഇതിനോടകം പൊലിഞ്ഞുപോയിട്ടുണ്ടെന്ന് രേഖ ഓർമ്മിപ്പിച്ചു. തന്നെ മാത്രമല്ല, ഈ മേഖലയിലുള്ള നിരവധി പേരെ ഇത്തരം യൂട്യൂബർമാർ അപമാനിക്കുന്നുണ്ട്. ദയവ് ചെയ്ത് മുഖ്യമന്ത്രി ഇതിൽ ഇടപെടണം. ഞങ്ങളെ സംരക്ഷിക്കണം. ശക്തമായ നടപടി ഇത്തരം ചാനലുകൾക്കെതിരെ സ്വീകരിക്കണം, എന്ന് താരം ആവശ്യപ്പെട്ടു.

താൻ അനുഭവിക്കുന്ന മാനസിക വിഷമം താങ്ങാവുന്നതിനും അപ്പുറമാണെന്നും നീതി ലഭിച്ചില്ലെങ്കിൽ തനിക്ക് എന്ത് സംഭവിക്കുമെന്ന ഭയമുണ്ടെന്നും രേഖ കൂട്ടിച്ചേർത്തു. സോഷ്യൽ മീഡിയയിൽ വൈറലായ ഈ വീഡിയോയ്ക്ക് താഴെ താരത്തിന് പിന്തുണയുമായി നിരവധി ആരാധകരും സഹപ്രവർത്തകരും രംഗത്തെത്തിയിട്ടുണ്ട്. വ്യക്തിസ്വാതന്ത്ര്യത്തെയും സ്വകാര്യതയെയും മാനിക്കാത്ത യൂട്യൂബ് സംസ്കാരത്തിനെതിരെ കർശന നിയമങ്ങൾ വേണമെന്ന ആവശ്യവും ഉയരുന്നുണ്ട്.

---------------

Hindusthan Samachar / Roshith K