Enter your Email Address to subscribe to our newsletters
Shabarimala, 17 ഫെബ്രുവരി (H.S.)
സന്നിധാനം: ശബരിമലയിൽ ഏറെ പ്രാധാന്യമുള്ള പടിപൂജ കഴിഞ്ഞ ദിവസങ്ങളിൽ മുടങ്ങി. അടുത്ത 15 വർഷത്തേക്ക് പടിപൂജയ്ക്കായി ബുക്കിംഗ് സ്ലോട്ടുകൾ ലഭ്യമല്ലാത്ത സാഹചര്യം നിലനിൽക്കെയാണ് സന്നിധാനത്ത് ഇത്തരമൊരു സംഭവം ഉണ്ടായിരിക്കുന്നത്. കുംഭമാസ പൂജകൾക്കായി നട തുറന്നതിന് ശേഷം ഇക്കഴിഞ്ഞ ശനിയാഴ്ചയും ഇന്നലെയുമാണ് പൂജ നടക്കാതിരുന്നത്.
ബുക്കിംഗ് സ്ലോട്ടുകൾ മറിച്ചുവിൽക്കുന്നു?
പടിപൂജയ്ക്കായി മുൻകൂട്ടി ബുക്ക് ചെയ്തവർ എത്താത്തതിനെ തുടർന്നാണ് പൂജ മുടങ്ങിയതെന്നാണ് ഔദ്യോഗിക വിശദീകരണം. എന്നാൽ, ഇതിന് പിന്നിൽ ഗൗരവകരമായ മറ്റ് ചില കാരണങ്ങൾ ഉണ്ടെന്നാണ് വിജിലൻസ് സംശയിക്കുന്നത്. പടിപൂജയ്ക്കുള്ള സ്ലോട്ടുകൾ വൻ തുകയ്ക്ക് മറിച്ചുവിൽക്കുന്നുണ്ടോ എന്ന കാര്യത്തിൽ വിജിലൻസ് അന്വേഷണം ഊർജ്ജിതമാക്കിയിരിക്കുകയാണ്. ബുക്ക് ചെയ്ത ആളോ അല്ലെങ്കിൽ അവരുമായി അടുത്ത ബന്ധമുള്ളവരോ തന്നെ പൂജയ്ക്ക് എത്തണമെന്നാണ് നിലവിലെ ചട്ടം. അല്ലാത്ത പക്ഷം പൂജയ്ക്ക് അനുമതി നൽകില്ലെന്ന് വിജിലൻസ് കർശന നിലപാടെടുത്തിട്ടുണ്ട്.
ബുക്ക് ചെയ്ത സ്ലോട്ടുകൾ മൂന്നും നാലും ഇരട്ടി തുകയ്ക്ക് മറ്റുള്ളവർക്ക് കൈമാറുന്നതായി വിജിലൻസിന് രഹസ്യ വിവരം ലഭിച്ചിരുന്നു. ഇത്തരത്തിൽ സ്ലോട്ട് വാങ്ങിയെത്തിയവർ വിജിലൻസ് പരിശോധന ഭയന്ന് മാറി നിന്നതാകാം പൂജ മുടങ്ങാൻ കാരണമെന്നാണ് പ്രാഥമിക നിഗമനം.
2040 വരെ ബുക്കിംഗ് പൂർത്തിയായി
ശബരിമലയിൽ ഏറ്റവും കൂടുതൽ ഭക്തർ വഴിപാടായി നടത്തുന്ന ഒന്നാണ് പടിപൂജ. ഏകദേശം 1,40,000 രൂപയോളം ചെലവ് വരുന്ന ഈ പൂജയ്ക്ക് 2040 വരെ സ്ലോട്ടുകൾ ഇല്ലെന്ന് ദേവസ്വം ബോർഡ് നേരത്തെ അറിയിച്ചിരുന്നു. സാധാരണയായി ആറ് മാസം മുൻപെങ്കിലും ഇതിനായി സ്ലോട്ട് ബുക്ക് ചെയ്യേണ്ടതുണ്ട്. ഇത്രയും വലിയ ഡിമാൻഡുള്ള ഒരു വഴിപാട് മുടങ്ങിയത് ഭക്തർക്കിടയിലും വലിയ ചർച്ചയായിട്ടുണ്ട്.
നിത്യനിദാനങ്ങളെ ബാധിക്കില്ലെന്ന് തന്ത്രി
ബുക്ക് ചെയ്തവർ വരാതിരുന്നാൽ പൂജ മുടങ്ങുന്നത് മുൻപും സംഭവിച്ചിട്ടുണ്ടെന്ന് ശബരിമല തന്ത്രി കണ്ഠരര് രാജീവരര് വിശദീകരിച്ചു. വഴിപാട് പൂജകൾ മുടങ്ങിയാലും ക്ഷേത്രത്തിലെ നിത്യനിദാന പൂജകൾക്കും ചടങ്ങുകൾക്കും ഇത് തടസ്സമാകില്ല. വഴിപാട് നടത്താൻ എത്തുന്നവർ കൃത്യമായ രേഖകൾ ഹാജരാക്കണമെന്നും നിയമവിരുദ്ധമായ സ്ലോട്ട് കൈമാറ്റങ്ങൾ അനുവദിക്കില്ലെന്നും അധികൃതർ ആവർത്തിച്ചു.
ശബരിമലയിലെ മറ്റ് വിവാദങ്ങൾക്കിടയിൽ പടിപൂജയുമായി ബന്ധപ്പെട്ട ഈ പുതിയ ക്രമക്കേട് ആരോപണം ദേവസ്വം ബോർഡിന് കൂടുതൽ തലവേദന സൃഷ്ടിച്ചിരിക്കുകയാണ്. സ്ലോട്ട് ബുക്കിംഗ് സംവിധാനം കൂടുതൽ സുതാര്യമാക്കാൻ ബോർഡ് പുതിയ നടപടികൾ ആലോചിക്കുന്നുണ്ട്.
---------------
Hindusthan Samachar / Roshith K
