Kerala, 17 ഫെബ്രുവരി (H.S.)

കൊച്ചി: ശബരിമല സ്വർണക്കൊള്ള കേസുമായി ബന്ധപ്പെട്ട് നടൻ ജയറാം എൻഫോഴ്‌സ്‌മെന്റ് ഡയറക്ടറേറ്റിന് (ഇ.ഡി) മുന്നിൽ ഹാജരായി. കൊച്ചിയിലെ ഇ.ഡി ഓഫീസിലെത്തിയ ജയറാം കേസുമായി ബന്ധപ്പെട്ട വിവരങ്ങൾ ഉദ്യോഗസ്ഥർക്ക് കൈമാറി. സാക്ഷി എന്ന നിലയിലാണ് താരത്തെ ചോദ്യം ചെയ്യുന്നത്.

സത്യം വെളിച്ചത്ത് വരണം: ജയറാം

ഇ.ഡി ഓഫീസിൽ എത്തിയ ശേഷം മാധ്യമങ്ങളോട് സംസാരിക്കവെ ജയറാം തന്റെ നിലപാട് വ്യക്തമാക്കി. കഴിഞ്ഞ 50 വർഷമായി ശബരിമലയിൽ മുടങ്ങാതെ പോകുന്നയാളാണ് ഞാൻ. ശബരിമല ഓരോ ഭാരതീയനെയും സംബന്ധിച്ച് പുണ്യസ്ഥലമാണ്. മലയാളികൾക്ക് അതൊരു വികാരമാണ്. ഈ സംഭവത്തിന് പിന്നിൽ എന്തെങ്കിലും കള്ളത്തരം നടന്നിട്ടുണ്ടെങ്കിൽ അത് 100 ശതമാനം വെളിച്ചത്ത് വരണം. അതിൽ ഉൾപ്പെട്ടവർ ശിക്ഷിക്കപ്പെടണം, ജയറാം പറഞ്ഞു.

തന്നെ ഇ.ഡി വിളിപ്പിച്ചത് കേസുമായി ബന്ധപ്പെട്ട് ഉപകാരപ്രദമായ എന്തെങ്കിലും വിവരങ്ങൾ ലഭിക്കാനാണെന്നും, അന്വേഷണവുമായി പൂർണ്ണമായി സഹകരിക്കുമെന്നും അദ്ദേഹം കൂട്ടിച്ചേർത്തു. കഴിഞ്ഞ 38 വർഷമായി കേരളത്തിലെ ഒട്ടേറെ ക്ഷേത്രങ്ങളിൽ പല പരിപാടികളിലും താൻ പങ്കെടുക്കാറുണ്ടെന്നും അത്തരമൊരു സൗഹൃദത്തിന്റെ ഭാഗമായാണ് ഉണ്ണികൃഷ്ണൻ പോറ്റിയുമായി ബന്ധപ്പെട്ടതെന്നും ജയറാം വിശദീകരിച്ചു.

അന്വേഷണം സാമ്പത്തിക ഇടപാടുകളിൽ

കേസിലെ പ്രധാന പ്രതികളിൽ ഒരാളായ ഉണ്ണികൃഷ്ണൻ പോറ്റിയുമായി ജയറാമിന് സാമ്പത്തിക ഇടപാടുകൾ ഉണ്ടോ എന്നാണ് ഇ.ഡി പ്രധാനമായും അന്വേഷിക്കുന്നത്. നേരത്തെ പ്രത്യേക അന്വേഷണ സംഘം (SIT) ജയറാമിൽ നിന്ന് വിവരങ്ങൾ തേടിയിരുന്നു. പോറ്റിയുമായി ദീർഘകാലമായുള്ള സൗഹൃദം മാത്രമാണുള്ളതെന്നും ഒരു രൂപയുടെ പോലും സാമ്പത്തിക ഇടപാട് നടത്തിയിട്ടില്ലെന്നുമാണ് അന്ന് ജയറാം മൊഴി നൽകിയിരുന്നത്.

ഇടനിലക്കാരനും ഹാജരായി

ജയറാമിന് പുറമെ കേസിൽ ഇടനിലക്കാരനായി പ്രവർത്തിച്ചുവെന്ന് സംശയിക്കുന്ന കൽപ്പേഷും ഇന്ന് ഇ.ഡി ഓഫീസിൽ ഹാജരായിട്ടുണ്ട്. പ്രതികളുടെ സാമ്പത്തിക സ്രോതസ്സുകളെക്കുറിച്ചും സ്വർണ്ണക്കടത്തുമായി ബന്ധപ്പെട്ട പണമിടപാടുകളെക്കുറിച്ചും ഇ.ഡി കൂടുതൽ വ്യക്തത തേടുകയാണ്.

ശബരിമല സ്വർണ്ണക്കൊള്ള കേസിൽ ഇ.ഡി അന്വേഷണം ഊർജ്ജിതമാക്കുന്നത് ദേവസ്വം ബോർഡിനും സർക്കാരിനും വൻ പ്രതിസന്ധിയാണ് സൃഷ്ടിക്കുന്നത്. കേസിൽ കൂടുതൽ പ്രമുഖർക്ക് പങ്കുണ്ടോ എന്ന കാര്യത്തിൽ ഇതോടെ വരും ദിവസങ്ങളിൽ കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്. പവിത്രമായ ശബരിമലയുമായി ബന്ധപ്പെട്ട തട്ടിപ്പ് ആയതിനാൽ തന്നെ വളരെ ഗൗരവത്തോടെയാണ് ഇ.ഡി ഈ കേസിലെ ഓരോ മൊഴിയെയും പരിശോധിക്കുന്നത്.

---------------

Hindusthan Samachar / Roshith K