Alapuzha , 22 ഫെബ്രുവരി (H.S.)

ആലപ്പുഴ: വണ്ടാനം മെഡിക്കൽ കോളേജിൽ ശസ്ത്രക്രിയയ്ക്കിടെ വീട്ടമ്മയുടെ വയറ്റിൽ ശസ്ത്രക്രിയ ഉപകരണം കുടുങ്ങിയ സംഭവത്തിൽ അന്വേഷണ റിപ്പോർട്ട് ഇന്ന് ആരോഗ്യ വകുപ്പ് മന്ത്രിക്ക് കൈമാറും. ചികിത്സാ പിഴവിൽ ഡോക്ടർക്ക് വീഴ്ച സംഭവിച്ചിട്ടില്ലെന്നാണ് അന്വേഷണ സംഘത്തിന്റെ പ്രാഥമിക വിലയിരുത്തൽ. ആശുപത്രിയിലെ ജീവനക്കാരുടെ കുറവും പ്രോട്ടോക്കോൾ പാലിക്കുന്നതിലുണ്ടായ പ്രായോഗിക തടസ്സങ്ങളുമാണ് സംഭവത്തിലേക്ക് നയിച്ചതെന്നാണ് റിപ്പോർട്ടിൽ ചൂണ്ടിക്കാട്ടുന്നത്.

റിപ്പോർട്ടിലെ പ്രധാന കണ്ടെത്തലുകൾ

ശസ്ത്രക്രിയ സമയത്തെ സർജൻസ് നോട്ട് കൃത്യമാണെന്ന് അന്വേഷണ റിപ്പോർട്ട് വ്യക്തമാക്കുന്നു. ശസ്ത്രക്രിയ നടക്കുന്ന സമയത്ത് ഓപ്പറേഷൻ തിയേറ്ററിൽ ഉണ്ടായിരുന്നത് ഒരു സ്ക്രബ് നഴ്സ് മാത്രമായിരുന്നു. ശസ്ത്രക്രിയയ്ക്ക് ഉപയോഗിച്ച ഉപകരണങ്ങളെല്ലാം കൃത്യമാണോ എന്ന് ഡോക്ടർ നഴ്സിനോട് ചോദിച്ചിരുന്നു. ഉപകരണങ്ങൾ എല്ലാം ഉണ്ടെന്ന് നഴ്സ് ഉറപ്പ് നൽകിയതിന് ശേഷമാണ് തുന്നൽ ഇട്ടതെന്നാണ് റിപ്പോർട്ടിലെ കണ്ടെത്തൽ. അതേസമയം, പരാതിക്കാരിയായ ഉഷയുടെ ശസ്ത്രക്രിയ നടക്കുമ്പോൾ തന്നെ മറ്റൊരു അടിയന്തര ശസ്ത്രക്രിയയ്ക്കും കൂടി തനിക്ക് ജോലി ചെയ്യേണ്ടി വന്നുവെന്ന് നഴ്സ് അന്വേഷണ സംഘത്തിന് മൊഴി നൽകിയിട്ടുണ്ട്. അമിതമായ ജോലിഭാരവും മതിയായ ജീവനക്കാരുടെ അഭാവവും ഈ പിഴവിന് കാരണമായതായി റിപ്പോർട്ട് സൂചിപ്പിക്കുന്നു.

വിട്ടൊഴിയാത്ത ദുരൂഹത

അന്വേഷണ റിപ്പോർട്ട് ഡോക്ടർക്ക് ക്ലീൻ ചിറ്റ് നൽകുന്നുണ്ടെങ്കിലും, ഉഷയുടെ വയറ്റിൽ നിന്ന് പുറത്തെടുത്ത ആർട്ടറി ഫോർസെപ്സ് (ശസ്ത്രക്രിയ ഉപകരണം) എവിടെ നിന്നാണ് വന്നതെന്ന കാര്യത്തിൽ റിപ്പോർട്ടിൽ ഇപ്പോഴും വ്യക്തതയില്ല. വയറ്റിൽ ശസ്ത്രക്രിയ ഉപകരണം കുടുങ്ങിയ സംഭവത്തിൽ ഗൈനക്കോളജി വിഭാഗം മുൻ മേധാവി ഡോ. ലളിതാംബിക കരുണാകരനെ പ്രതിചേർത്ത് പോലീസ് നേരത്തെ കേസെടുത്തിരുന്നു. 2021-ൽ ശസ്ത്രക്രിയ നടന്ന സമയത്ത് വകുപ്പ് മേധാവി എന്ന നിലയിലാണ് ഇവരെ പ്രതിചേർത്തത്.

കൂടുതൽ പേർ പ്രതിപ്പട്ടികയിലേക്ക്

സംഭവത്തിൽ കൂടുതൽ പേരെ പ്രതി ചേർക്കാനുള്ള നീക്കത്തിലാണ് പോലീസ്. ശസ്ത്രക്രിയ നടത്തിയ ഡോ. ജെ. ഷാഹിദ, നഴ്സിംഗ് ഓഫീസർ പി.എസ്. ധന്യ എന്നിവർ ഉടൻ പ്രതിപ്പട്ടികയിൽ ഉൾപ്പെട്ടേക്കും. പുറത്തെടുത്ത ഉപകരണം ഫോറൻസിക് പരിശോധനയ്ക്കായി അയക്കാനും തീരുമാനമായിട്ടുണ്ട്. ഇതിന്റെ ഫലം വരുന്നതോടെ കൂടുതൽ വിവരങ്ങൾ പുറത്തുവരുമെന്നാണ് പ്രതീക്ഷിക്കുന്നത്.

നിലവിൽ കൊച്ചി അമൃത ആശുപത്രിയിൽ ചികിത്സയിൽ കഴിയുന്ന ഉഷ ജോസഫിന്റെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. അതേസമയം, മെഡിക്കൽ കോളേജ് അധികൃതരുടെ ഭാഗത്തുനിന്നുണ്ടായ ഈ വലിയ വീഴ്ചയിൽ കുറ്റക്കാർക്കെതിരെ കർശന നടപടി വേണമെന്ന ആവശ്യത്തിൽ ഉറച്ചുനിൽക്കുകയാണ് കുടുംബം. ആരോഗ്യവകുപ്പ് സ്വീകരിക്കുന്ന തുടർന്നുള്ള നടപടികൾ ഉറ്റുനോക്കുകയാണ് കേരളീയ സമൂഹം.

---------------

Hindusthan Samachar / Roshith K