Palakakd , 23 ഫെബ്രുവരി (H.S.)

പാലക്കാട്: പാലക്കാട് ജില്ലയിലെ സി.പി.എമ്മിൽ കാലങ്ങളായി പുകഞ്ഞുകൊണ്ടിരുന്ന വിഭാഗീയത പുതിയ തലത്തിലേക്ക്. ഔദ്യോഗിക നേതൃത്വത്തോട് കലഹിച്ച് പാർട്ടിക്ക് പുറത്തുപോയവരും നടപടി നേരിട്ടവരുമായ വിമതർ ഒത്തുചേർന്ന് പുതിയ രാഷ്ട്രീയ കൂട്ടായ്മയ്ക്ക് രൂപം നൽകുന്നു. കറിവേപ്പില പോലെ തങ്ങളെ പാർട്ടി വലിച്ചെറിഞ്ഞു എന്ന ആക്ഷേപവുമായാണ് വിമതർ രംഗത്തെത്തിയിരിക്കുന്നത്. വരുന്ന അഞ്ചാം തീയതി ജില്ലയിലെ അസംതൃപ്തരായ സി.പി.എം പ്രവർത്തകരുടെ വലിയൊരു കൺവെൻഷൻ വിളിച്ചുചേർക്കാൻ വിമത നീക്കത്തിന് നേതൃത്വം നൽകുന്നവർ തീരുമാനിച്ചു.

പി.കെ. ശശിയിൽ പ്രതീക്ഷ; ചർച്ചകൾ സജീവം

സി.പി.എം സംസ്ഥാന നേതൃത്വം അച്ചടക്ക നടപടി സ്വീകരിച്ച മുതിർന്ന നേതാവ് പി.കെ. ശശിയെ ഈ കൂട്ടായ്മയുടെ ഭാഗമാക്കാനാണ് വിമതരുടെ നീക്കം. നിലവിൽ പി.കെ. ശശി ഇതുവരെ മനസ്സ് തുറന്നിട്ടില്ലെങ്കിലും, അദ്ദേഹം തങ്ങളുമായി സഹകരിക്കുമെന്ന ഉറച്ച പ്രതീക്ഷയിലാണ് വിമത പക്ഷം. വടക്കഞ്ചേരിയിലെ സി.പി.എം മുൻ ഏരിയ സെക്രട്ടറി കെ. ബാലൻ, ഏരിയ കമ്മിറ്റി അംഗം പി. ഗംഗാധരൻ എന്നിവർ പരസ്യമായി തന്നെ തങ്ങൾ ഈ വിമത കൺവെൻഷനിൽ പങ്കെടുക്കുമെന്ന് വ്യക്തമാക്കിയിട്ടുണ്ട്. പി.കെ. ശശിയെ അനുകൂലിക്കുന്ന ഒരു വലിയ വിഭാഗം പ്രവർത്തകർ കൂടി ഈ കൂട്ടായ്മയിലേക്ക് എത്തുന്നതോടെ ജില്ലയിൽ സി.പി.എമ്മിന് വലിയ വെല്ലുവിളിയാകും ഇത് ഉയർത്തുക.

ലക്ഷ്യം 'ഡെമോക്രാറ്റിക് മാർക്സിസ്റ്റ് മുന്നണി'

വരുന്ന നിയമസഭാ തിരഞ്ഞെടുപ്പ് മുന്നിൽ കണ്ടുകൊണ്ടാണ് വിമതരുടെ നീക്കങ്ങൾ. 'ഡെമോക്രാറ്റിക് മാർക്സിസ്റ്റ് മുന്നണി' എന്ന പേരിൽ ഒരു പുതിയ പാർട്ടി രൂപീകരിക്കാനാണ് പ്രാഥമിക ചർച്ചകളിൽ തീരുമാനമായിരിക്കുന്നത്. കൊഴിഞ്ഞാമ്പാറ, ചിറ്റൂർ, ആലത്തൂർ മേഖലകളിൽ സി.പി.എം വോട്ടുകളിൽ വലിയ വിള്ളലുണ്ടാക്കാൻ ഈ കൂട്ടായ്മയ്ക്ക് സാധിക്കുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. പ്രത്യേകിച്ച് കൊഴിഞ്ഞാമ്പാറ പഞ്ചായത്തിൽ പാർട്ടി നേരിടുന്ന പ്രതിസന്ധി നിലവിൽ പരിഹരിക്കാനാകാത്ത വിധം രൂക്ഷമാണ്.

സി.പി.എം നേതൃത്വത്തിന്റെ നിലപാട്

അതേസമയം, വിമത നീക്കങ്ങളെ തള്ളിക്കളയുന്ന സമീപനമാണ് സി.പി.എം ജില്ലാ നേതൃത്വം സ്വീകരിക്കുന്നത്. വലിയ നേതാക്കൾ പാർട്ടി വിട്ടുപോയാലും സി.പി.എമ്മിന് ഒന്നും സംഭവിക്കില്ലെന്ന് ജില്ലാ സെക്രട്ടറി ഇ.എൻ. സുരേഷ് ബാബു പ്രതികരിച്ചു. എന്നാൽ അടിയൊഴുക്കുകൾ തടയാൻ താഴേത്തട്ടിൽ പാർട്ടി പ്രതിരോധം തുടങ്ങിക്കഴിഞ്ഞു. ഒറ്റപ്പാലം, മണ്ണാർക്കാട്, നെന്മാറ, തരൂർ എന്നീ മണ്ഡലങ്ങളിൽ വിമത നീക്കം പാർട്ടിയുടെ വിജയസാധ്യതകളെ ബാധിക്കുമെന്ന ആശങ്കയും ഒരു വിഭാഗം നേതാക്കൾക്കുണ്ട്.

ജില്ലയിലെ വിവിധ ഏരിയകളിൽ നിന്ന് പാർട്ടി നടപടി നേരിട്ടവരും, അവഗണിക്കപ്പെട്ടവരുമായ നൂറുകണക്കിന് പ്രവർത്തകർ അഞ്ചാം തീയതിയിലെ യോഗത്തിൽ പങ്കെടുക്കുമെന്നാണ് വിവരം. ഇതോടെ പാലക്കാട്ടെ ഇടതുകോട്ടകളിൽ വിള്ളൽ വീഴ്ത്താൻ ഈ പുതിയ 'വിമത കൂട്ടായ്മ'യ്ക്ക് കഴിയുമോ എന്നാണ് രാഷ്ട്രീയ കേരളം ഉറ്റുനോക്കുന്നത്.

---------------

Hindusthan Samachar / Roshith K