Trivandrum , 25 ഫെബ്രുവരി (H.S.)

നിയമസഭാ തിരഞ്ഞെടുപ്പ് ആവേശത്തിലേക്ക് കേരളം കടക്കുമ്പോൾ, സ്ഥാനാർഥി നിർണയ ചർച്ചകൾ വേഗത്തിലാക്കി യുഡിഎഫ്. കോൺഗ്രസിന്റെ ആദ്യഘട്ട സ്ഥാനാർഥിപ്പട്ടിക സംബന്ധിച്ച നിർണായക വിവരങ്ങൾ പുറത്തുവന്നു. മാർച്ച് ആദ്യവാരത്തോടെ സ്ഥാനാർഥി പ്രഖ്യാപനം പൂർത്തിയാക്കാനാണ് മുന്നണി ലക്ഷ്യമിടുന്നത്.

ആദ്യ പട്ടികയിൽ 40 പേർ; 20 സിറ്റിങ് എംഎൽഎമാർക്ക് സീറ്റ്

നിയമസഭാ തിരഞ്ഞെടുപ്പിനുള്ള കോൺഗ്രസിന്റെ ആദ്യ പട്ടികയിൽ 40 സ്ഥാനാർഥികളുണ്ടാകുമെന്നാണ് സൂചന. ഇതിൽ നിലവിലെ 20 സിറ്റിങ് എംഎൽഎമാരുടെ പേരുകൾ ഉൾപ്പെട്ടിട്ടുണ്ട്. വിജയസാധ്യതയും പ്രവർത്തനമികവും മുൻനിർത്തിയാണ് സിറ്റിങ് എംഎൽഎമാരെ നിലനിർത്താൻ ഹൈക്കമാൻഡും കെപിസിസിയും തീരുമാനിച്ചിരിക്കുന്നത്. കോഴിക്കോട് ജില്ലയിലെ കൊയിലാണ്ടി മണ്ഡലത്തിൽ പ്രവീൺ കുമാർ മത്സരിക്കുമെന്ന കാര്യത്തിൽ ഏകദേശ ധാരണയായിട്ടുണ്ട്.

പോഷക സംഘടനകളിൽ നിന്നുള്ള പ്രാതിനിധ്യത്തിന്റെ കാര്യത്തിൽ യൂത്ത് കോൺഗ്രസ് സംസ്ഥാന അധ്യക്ഷൻ ഒ.ജെ. ജനീഷിന്റെ പേര് മാത്രമാണ് നിലവിൽ അന്തിമമായിട്ടുള്ളത്. മറ്റ് യുവ നേതാക്കളുടെ കാര്യത്തിൽ ചർച്ചകൾ പുരോഗമിക്കുകയാണ്. പുതുമുഖങ്ങൾക്കും യുവാക്കൾക്കും കൂടുതൽ പ്രാധാന്യം നൽകിക്കൊണ്ടുള്ള പട്ടികയാകും കോൺഗ്രസ് പുറത്തിറക്കുക.

തിരഞ്ഞെടുപ്പ് പ്രഖ്യാപനം കാത്ത് മുന്നണികൾ

മാർച്ച് രണ്ടാം വാരത്തോടെ തിരഞ്ഞെടുപ്പ് വിജ്ഞാപനം ഉണ്ടാകുമെന്നാണ് രാഷ്ട്രീയ പാർട്ടികൾ പ്രതീക്ഷിക്കുന്നത്. വിജ്ഞാപനം വരുന്നത് വൈകിയാൽ പ്രചാരണ ചെലവ് കുതിച്ചുയരുമെന്ന ആശങ്ക കോൺഗ്രസ് നേതൃത്വത്തിനുണ്ട്. അതിനാൽ തന്നെ വിജ്ഞാപനത്തിന് മുൻപ് തന്നെ സ്ഥാനാർഥികളെ നിശ്ചയിച്ച് പ്രചാരണ രംഗത്ത് സജീവമാകാനാണ് യുഡിഎഫ് തീരുമാനം.

മുഖ്യമന്ത്രി പദത്തെച്ചൊല്ലി തർക്കമില്ല: പി.കെ. കുഞ്ഞാലിക്കുട്ടി

തിരഞ്ഞെടുപ്പിന് മുൻപ് മുഖ്യമന്ത്രി സ്ഥാനാർഥിയെ ചൊല്ലി യുഡിഎഫിലും കോൺഗ്രസിനുള്ളിലും തർക്കങ്ങളുണ്ടാകുമെന്ന പ്രചാരണങ്ങളെ മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി തള്ളി. മലപ്പുറത്ത് 'പോർ മുഖാമുഖം' പരിപാടിയിൽ സംസാരിക്കുകയായിരുന്നു അദ്ദേഹം. മുഖ്യമന്ത്രി പദവിയെ ചൊല്ലി കോൺഗ്രസിൽ നിലവിൽ യാതൊരു തർക്കവുമില്ല. തിരഞ്ഞെടുപ്പിന് ശേഷം ഹൈക്കമാൻഡ് ആണ് മുഖ്യമന്ത്രിയെ തീരുമാനിക്കുക എന്ന ധാരണയിൽ എല്ലാ പ്രമുഖ നേതാക്കളും ഒപ്പുവെച്ചിട്ടുണ്ടെന്നും അദ്ദേഹം വ്യക്തമാക്കി.

മുന്നണിക്കുള്ളിൽ ഐക്യത്തോടെ മുന്നോട്ട് പോകാനാണ് തീരുമാനം. ഭരണം തിരിച്ചുപിടിക്കുക എന്ന ലക്ഷ്യത്തോടെയാകും യുഡിഎഫ് വോട്ടർമാരെ സമീപിക്കുക. സ്ഥാനാർഥി നിർണയത്തിൽ ഘടകകക്ഷികളുമായി കൃത്യമായ ആശയവിനിമയം നടത്തുന്നുണ്ടെന്നും കുഞ്ഞാലിക്കുട്ടി കൂട്ടിച്ചേർത്തു.

പ്രചാരണ ചൂടിലേക്ക് കേരളം

സ്ഥാനാർഥി പട്ടിക ഏകദേശ ധാരണയായതോടെ മണ്ഡലങ്ങളിൽ അനൗദ്യോഗിക പ്രചാരണങ്ങൾ കോൺഗ്രസ് ആരംഭിച്ചു കഴിഞ്ഞു. വരും ദിവസങ്ങളിൽ സ്ക്രീനിംഗ് കമ്മിറ്റി കൂടി ചേർന്ന് പട്ടികയ്ക്ക് അന്തിമ രൂപം നൽകും. ഭരണവിരുദ്ധ വികാരവും വികസന മുരടിപ്പും പ്രധാന ആയുധമാക്കി എൽഡിഎഫിനെ നേരിടാനാണ് യുഡിഎഫിന്റെ നീക്കം. മാർച്ച് ആദ്യവാരം സ്ഥാനാർഥികളെ പ്രഖ്യാപിക്കുന്നതോടെ കേരളം പൂർണ്ണമായും തിരഞ്ഞെടുപ്പ് ചൂടിലേക്ക് മാറും.

---------------

Hindusthan Samachar / Roshith K