Trivandrum , 27 ഫെബ്രുവരി (H.S.)

തിരുവനന്തപുരം: മന്ത്രി വീണ ജോർജിനെതിരെയുണ്ടായ ആക്രമണത്തിന്റെ ദൃശ്യങ്ങൾ ഹാജരാക്കുന്നവർക്ക് പ്രതിഫലം പ്രഖ്യാപിച്ച യുഡിഎഫ് നടപടിക്കെതിരെ കടുത്ത ഭാഷയിൽ പ്രതികരിച്ച് ഡിവൈഎഫ്ഐ സംസ്ഥാന സെക്രട്ടറി വി. വസീഫ്. പ്രതിപക്ഷ നേതാവിന്റെ മുട്ടുകാല് തല്ലിയൊടിക്കുന്നവർക്ക് ഡിവൈഎഫ്ഐ ഇനാം പ്രഖ്യാപിച്ചാൽ കേരള പൊതുസമൂഹം അത് അംഗീകരിക്കുമോ എന്ന് വസീഫ് ചോദിച്ചു. ട്വന്റിഫോർ ന്യൂസിനോട് സംസാരിക്കുകയായിരുന്നു അദ്ദേഹം.

മന്ത്രി വീണ ജോർജിന് മർദ്ദനമേറ്റിട്ടില്ലെന്നും ദൃശ്യങ്ങളില്ലെന്നുമാണ് യുഡിഎഫും യൂത്ത് കോൺഗ്രസും വാദിക്കുന്നത്. ഇതിനെ പരിഹസിച്ചുകൊണ്ടാണ് വസീഫിന്റെ പ്രതികരണം. ബഹുമാനത്തോടുകൂടി തന്നെ ചോദിക്കട്ടെ, ഞങ്ങൾ ഒരു ഇനാം തിരിച്ചങ്ങ് പ്രഖ്യാപിച്ചാലോ? കേരളത്തിലെ പ്രതിപക്ഷ നേതാവിന്റെ മുട്ടുകാല് ദൃശ്യങ്ങളില്ലാതെ തല്ലിയൊടിച്ചു വരുന്നവർക്ക് ഇനാം പ്രഖ്യാപിച്ചാൽ നിങ്ങൾ അത് അംഗീകരിക്കുമോ? ദൃശ്യങ്ങളില്ല എന്നതുകൊണ്ട് പ്രതിപക്ഷ നേതാവിന് മർദ്ദനമേറ്റിട്ടില്ല എന്ന് നിങ്ങൾ അപ്പോൾ പറയുമോ? വസീഫ് ചോദിച്ചു.

യൂത്ത് കോൺഗ്രസ് നേതാക്കൾ തീക്കൊള്ളികൊണ്ടാണ് തല ചൊറിയുന്നതെന്ന് വസീഫ് മുന്നറിയിപ്പ് നൽകി. പ്രകോപനപരമായ നടപടികളിലൂടെ കേരളത്തിലെ സമാധാനാന്തരീക്ഷം തകർക്കാനാണ് പ്രതിപക്ഷം ശ്രമിക്കുന്നത്. ദൃശ്യങ്ങൾ ഇല്ലെന്ന വാദം നിരത്തി ആക്രമണത്തെ ന്യായീകരിക്കുന്നത് അങ്ങേയറ്റം പ്രതിഷേധാർഹമാണ്. മുൻ യൂത്ത് കോൺഗ്രസ് അധ്യക്ഷന്റെ കുഞ്ഞുങ്ങളെ കൊന്നതിന് തെളിവ് അന്വേഷിച്ച് നടക്കുന്നവർക്ക് ഇനി അതിന്റെ തെളിവുകളായിരിക്കും ആവശ്യമായി വരിക എന്നും അദ്ദേഹം കൂട്ടിച്ചേർത്തു.

മന്ത്രിക്ക് മർദ്ദനമേറ്റ സംഭവത്തിൽ തെളിവില്ലെന്നാരോപിച്ച് പ്രതിപക്ഷം നടത്തുന്ന 'ഇനാം' പ്രഖ്യാപനം വെറും രാഷ്ട്രീയ നാടകമാണ്. ഇത്തരം വിലകുറഞ്ഞ നടപടികൾ യുഡിഎഫ് സ്വന്തം കയ്യിൽ വെച്ചാൽ മതി. സമൂഹത്തിൽ അനാവശ്യമായ പ്രകോപനങ്ങൾ ഉണ്ടാക്കി നേട്ടം കൊയ്യാമെന്ന് ആരും കരുതേണ്ടെന്നും ഡിവൈഎഫ്ഐ ഇതിനെ ശക്തമായി നേരിടുമെന്നും വസീഫ് വ്യക്തമാക്കി.

കണ്ണൂരിലുണ്ടായ പ്രതിഷേധത്തിനിടെ മന്ത്രിക്കെതിരെ മർദ്ദനമോ സുരക്ഷാ വീഴ്ചയോ ഉണ്ടായിട്ടില്ലെന്ന പോലീസിന്റെ പ്രാഥമിക വിലയിരുത്തലുകൾക്കിടെയാണ് രാഷ്ട്രീയ വിവാദം കനക്കുന്നത്. എന്നാൽ സർക്കാരിനെ പ്രതിരോധത്തിലാക്കാൻ വ്യാജ പ്രചാരണങ്ങളും പ്രകോപനങ്ങളും അഴിച്ചുവിടാനാണ് പ്രതിപക്ഷ ശ്രമമെന്ന് എൽഡിഎഫ് കേന്ദ്രങ്ങൾ ആരോപിക്കുന്നു. വി. വസീഫിന്റെ ഈ പ്രസ്താവന വരും ദിവസങ്ങളിൽ രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെക്കുമെന്ന് ഉറപ്പാണ്.

ഈ വിഷയം മുൻനിർത്തി ഭരണ-പ്രതിപക്ഷ സംഘടനകൾ തമ്മിലുള്ള പോര് തെരുവിൽ ആവർത്തിക്കാനുള്ള സാധ്യതയും നിലനിൽക്കുന്നുണ്ട്. യൂത്ത് കോൺഗ്രസിന്റെ വെല്ലുവിളി ഏറ്റെടുത്തുകൊണ്ടുള്ള ഡിവൈഎഫ്ഐയുടെ ഈ നിലപാട് രാഷ്ട്രീയ കേരളം ഉറ്റുനോക്കുകയാണ്.

---------------

Hindusthan Samachar / Roshith K