Kerala, 28 ഫെബ്രുവരി (H.S.)

കണ്ണൂർ: കെ.എസ്.യു പ്രവർത്തകരുടെ കരിങ്കൊടി പ്രതിഷേധത്തിനിടയുണ്ടായ അപകടത്തിൽ പരിക്കേറ്റ് ചികിത്സയിലായിരുന്ന ആരോഗ്യ മന്ത്രി വീണാ ജോർജ് ആശുപത്രി വിട്ടു. പരിയാരം മെഡിക്കൽ കോളേജ് ഐ.സി.യുവിലായിരുന്ന മന്ത്രിയെ അതീവ രഹസ്യമായി പുലർച്ചെ നാല് മണിയോടെയാണ് ഡിസ്ചാർജ് ചെയ്തത്. കനത്ത സുരക്ഷയിൽ കാർ മാർഗ്ഗം പത്തനംതിട്ടയിലെ സ്വന്തം വീട്ടിലേക്കാണ് മന്ത്രി പോയത്. എന്നാൽ, മന്ത്രിയുടെ ഈ പുലർച്ചെയുള്ള മടക്കയാത്രയും ഡിസ്ചാർജ്ജ് തീരുമാനവും രാഷ്ട്രീയ വൃത്തങ്ങളിൽ വലിയ ചർച്ചകൾക്കും ദുരൂഹതകൾക്കും വഴിതുറന്നിരിക്കുകയാണ്.

മെഡിക്കൽ ബോർഡ് തീരുമാനവും യാത്രയും

കഴിഞ്ഞ ദിവസം രാത്രി 11 മണിയോടെ ഓൺലൈനായി ചേർന്ന മെഡിക്കൽ ബോർഡ് യോഗമാണ് മന്ത്രിയെ ഡിസ്ചാർജ് ചെയ്യാൻ തീരുമാനിച്ചത്. രക്തസമ്മർദ്ദം ഉൾപ്പെടെയുള്ള ആരോഗ്യ സൂചകങ്ങൾ സാധാരണ നിലയിലായതിനാലാണ് ഈ തീരുമാനമെന്ന് അധികൃതർ അറിയിച്ചു. പത്തനംതിട്ടയിലെ വീട്ടിലെത്തിയ മന്ത്രിക്ക് തുടർ ചികിത്സകൾ ആവശ്യമാണെങ്കിൽ തിരുവനന്തപുരം മെഡിക്കൽ കോളേജിൽ ലഭ്യമാക്കും. ഇതിനായുള്ള ചികിത്സാ രേഖകൾ കൈമാറിയിട്ടുണ്ട്. പകൽ സമയത്തെ ഗതാഗതക്കുരുക്ക് ഒഴിവാക്കാനാണ് പുലർച്ചെ തന്നെ യാത്ര തിരിച്ചതെന്നാണ് ആശുപത്രി സൂപ്പർണ്ട് ഡോ. സുദീപ് നൽകുന്ന വിശദീകരണം.

വൈരുദ്ധ്യങ്ങൾ നിറഞ്ഞ ബുള്ളറ്റിനുകൾ

മന്ത്രിയുടെ ആരോഗ്യനില സംബന്ധിച്ച് ആശുപത്രി അധികൃതർ പുറത്തിറക്കിയ മെഡിക്കൽ ബുള്ളറ്റിനുകളിലെ വൈരുദ്ധ്യമാണ് പ്രധാനമായും ചോദ്യം ചെയ്യപ്പെടുന്നത്. 26-ാം തീയതി ഉച്ചയ്ക്ക് പുറത്തിറക്കിയ ബുള്ളറ്റിനിൽ, മന്ത്രിയുടെ കഴുത്തിലെ കശേരുക്കൾക്ക് പരിക്കുണ്ടെന്നും കടുത്ത വേദനയുള്ളതിനാൽ ഐ.സി.യുവിൽ തുടരണമെന്നും വ്യക്തമാക്കിയിരുന്നു. നിലവിലെ സാഹചര്യത്തിൽ യാത്ര ചെയ്യുന്നത് അപകടകരമാണെന്നും ഡോക്ടർമാർ മുന്നറിയിപ്പ് നൽകിയിരുന്നു. എന്നാൽ, മണിക്കൂറുകൾക്കുള്ളിൽ ഈ നിലപാട് മാറി ഡിസ്ചാർജ് നൽകിയതാണ് സംശയങ്ങൾക്ക് കാരണമായത്. മന്ത്രിയെ മാഹി വരെ അനുഗമിക്കാനുള്ള പോലീസ് സംവിധാനങ്ങൾ പകൽ തന്നെ സജ്ജമാക്കിയിരുന്നതായും വിവരമുണ്ട്.

രാഷ്ട്രീയ വിവാദവും വധശ്രമക്കേസും

മന്ത്രിക്കെതിരെയുള്ള കരിങ്കൊടി പ്രതിഷേധത്തിൽ വധശ്രമക്കുറ്റം ചുമത്തിയതിനെ ചൊല്ലി വലിയ രാഷ്ട്രീയ പോര് തുടരുകയാണ്. അറസ്റ്റിലായ അഞ്ച് കെ.എസ്.യു പ്രവർത്തകരുടെ ജാമ്യാപേക്ഷ കോടതി പരിഗണിക്കാനിരിക്കെ, കേസിൽ നിന്ന് വധശ്രമ വകുപ്പ് (IPC 307) പോലീസ് ഒഴിവാക്കിയേക്കുമെന്നാണ് സൂചന. മന്ത്രിക്കെതിരെ ആസൂത്രിതമായ വധശ്രമം നടന്നുവെന്ന് സി.പി.എം ആവർത്തിക്കുമ്പോഴും, ഇത് തെളിയിക്കുന്ന ഒരു ദൃശ്യമെങ്കിലും പുറത്തുവിടാൻ പ്രതിപക്ഷം വെല്ലുവിളിക്കുന്നു. മന്ത്രി പറഞ്ഞത് ശുദ്ധ നുണയാണെന്നും സംസ്ഥാനത്ത് കലാപം സൃഷ്ടിക്കാനാണ് സർക്കാർ ശ്രമിക്കുന്നതെന്നും പ്രതിപക്ഷ നേതാവ് വി.ഡി. സതീശൻ ആരോപിച്ചു.

നിലവിൽ പത്തനംതിട്ടയിലെ വീട്ടിൽ വിശ്രമിക്കുന്ന മന്ത്രി, മാർച്ച് രണ്ട് വരെയുള്ള പൊതുപരിപാടികളെല്ലാം റദ്ദാക്കിയിട്ടുണ്ട്. രാഷ്ട്രീയ പ്രത്യാഘാതങ്ങൾ ഭയന്നാണോ പെട്ടെന്നുള്ള ഈ ഡിസ്ചാർജ് എന്ന ചോദ്യം ഇപ്പോഴും ബാക്കിനിൽക്കുന്നു.

---------------

Hindusthan Samachar / Roshith K