Washington, 01 മാര്ച്ച് (H.S.)

അമേരിക്കയും ഇസ്രായേലും സംയുക്തമായി ഇറാനില് നടത്തിയ 'ഓപ്പറേഷൻ എപ്പിക് ഫ്യൂരി' (Operation Epic Fury) എന്ന സൈനിക നീക്കത്തിന് ശേഷം പശ്ചിമേഷ്യയില് സംഘർഷം അതിരൂക്ഷമായിരിക്കുകയാണ്.

ഈ ഓപ്പറേഷനില് ഇറാൻ പരമോന്നത നേതാവ് ആയത്തുള്ള അലി ഖാംനഇ കൊല്ലപ്പെട്ടതായി സ്ഥിരീകരണം വന്നതോടെ, തിരിച്ചടി ഭീഷണി മുഴക്കി ഇറാൻ രംഗത്തെത്തിയിട്ടുണ്ട്. ഈ പശ്ചാത്തലത്തില് ഇറാനുനേരെ അതിശക്തമായ മുന്നറിയിപ്പുമായി അമേരിക്കൻ പ്രസിഡന്റ് ഡൊണാള്ഡ് ട്രംപ് രംഗത്തെത്തി.

ലോകം ഇതുവരെ കാണാത്ത ശക്തി ഉപയോഗിക്കും!

ഇറാൻ വളരെ ശക്തമായി തിരിച്ചടിക്കുമെന്ന് റിപ്പോർട്ടുകള് പുറത്തുവന്ന സാഹചര്യത്തില്, താൻ അത് സൂക്ഷ്മമായി നിരീക്ഷിക്കുന്നുണ്ടെന്നും എന്നാല് അത്തരം നീക്കങ്ങള് ഇറാൻ ഒഴിവാക്കുന്നതാണ് നല്ലതെന്നും ട്രംപ് സോഷ്യല് മീഡിയയിലൂടെ വ്യക്തമാക്കി. ഒരുപക്ഷേ, ലോകം ഇതുവരെ കണ്ടിട്ടില്ലാത്ത വിധം സമാനതകളില്ലാത്ത ശക്തി ഉപയോഗിച്ചാകും തങ്ങള് തിരിച്ചടിക്കുക എന്ന് അദ്ദേഹം ഇറാനിലെ നേതൃത്വത്തിന് മുന്നറിയിപ്പ് നല്കി. ഇറാനുമായുള്ള യുദ്ധം അമേരിക്കൻ ജനതയെ സംരക്ഷിക്കാനും, ആ രാജ്യത്തിന്റെ മിസൈല്, ആണവ പദ്ധതികള് മൂലമുണ്ടാകുന്ന ഭീഷണികള് ഇല്ലാതാക്കാനും യുദ്ധം അനിവാര്യമാണെന്ന് ട്രംപ് വാദിക്കുന്നു.

ഇറാനിലെ സൈനിക ഉദ്യോഗസ്ഥരോട് ആയുധം താഴെ വെക്കാൻ നിർദ്ദേശിച്ച ട്രംപ്, അല്ലാത്തപക്ഷം മരണം സുനിശ്ചിതമാണെന്നും മുന്നറിയിപ്പ് നല്കി. അതോടൊപ്പം, ഇറാനിലെ ജനങ്ങളോട് നിലവിലെ ഭരണകൂടത്തിനെതിരെ അണിനിരക്കാനും സർക്കാർ പിടിച്ചെടുക്കാനും അദ്ദേഹം ആഹ്വാനം ചെയ്തു. ഇസ്രായേലുമായി ചേർന്ന് അമേരിക്ക നടത്തിയ ഈ സൈനിക നീക്കങ്ങള് ഇറാൻ നേതൃത്വത്തിന് വലിയ തിരിച്ചടിയാണ് നല്കിയിരിക്കുന്നത്. ഖമനേയിയുടെ മരണത്തിന് പുറമെ, തെഹ്റാനിലെ മറ്റ് ഉന്നത നേതാക്കളും ആക്രമണത്തില് കൊല്ലപ്പെട്ടിട്ടുണ്ട്.

സമാധാനമില്ലാതെ പശ്ചിമേഷ്യ

ഈ സംഭവവികാസങ്ങളെ തുടർന്ന് പശ്ചിമേഷ്യയില് യുദ്ധസമാനമായ സാഹചര്യമാണ് നിലനില്ക്കുന്നത്. ഇറാൻ മിസൈലുകളും ഡ്രോണുകളും ഉപയോഗിച്ച് തിരിച്ചടി തുടങ്ങിയതോടെ പല രാജ്യങ്ങളും തങ്ങളുടെ വ്യോമപാതകള് അടച്ചുപൂട്ടിയിട്ടുണ്ട്. മേഖലയില് കൂടുതല് സൈനിക ഇടപെടലുകള് ഉണ്ടാകുമെന്ന് തന്നെയാണ് ട്രംപിന്റെ വാക്കുകള് സൂചിപ്പിക്കുന്നത്. ഒരു വശത്ത് പ്രതികാരത്തിനായി ഇറാൻ മുറവിളി കൂട്ടുമ്പോള്, മറുവശത്ത് സമാനതകളില്ലാത്ത സൈനിക ശക്തി പ്രയോഗിക്കാൻ തയ്യാറായി അമേരിക്കയും നിലയുറപ്പിച്ചിരിക്കുന്നു. മേഖലയിലെ സ്ഥിതിഗതികള് വളരെ വേഗത്തില് മാറിക്കൊണ്ടിരിക്കുകയാണ്, വരും ദിവസങ്ങളില് സംഘർഷം ഏത് തലത്തിലേക്ക് എത്തും എന്നത് ലോകരാഷ്ട്രങ്ങള് വലിയ ആശങ്കയോടെയാണ് ഉറ്റുനോക്കുന്നത്.

---------------

Hindusthan Samachar / CHANDHU CHANDRASEKHAR